Г.Дамдинням: Энгийн АИ-92 бензиний үнийг 100 төгрөгөөр бууруулахаар төлөвлөж байна
Энэ сард 92,000 тонн автобензин импортлох захиалгыг баталгаажуулсан бөгөөд нөөц нэмэгдүүлэх боломж бүрдэнэ гэж үзэж байна.
Энгийн АИ-92 бензиний үнийг арваннэгдүгээр сарын захиалгаар 100 төгрөгөөр бууруулахаар төлөвлөж байгааг Аж үйлдвэр, эрдэс баялгийн сайд Г.Дамдинням арваннэгдүгээр сарын 5-нд мэдээллээ. Гэхдээ үнэ буурах тодорхой өдрийг зарлаагүй байна.
Түүний мэдээлснээр энэ сард 92,000 тонн автобензин импортлохоор баталгаажуулжээ. Монгол Улсын АИ-92 бензиний сарын ердийн хэрэглээ 75,000 тонн байдаг тул нийлүүлэлт нэмэгдэх нь нөөц бүрдүүлэх боломж олгоно гэж сайд тайлбарлав.
Өнгөрсөн долоодугаар сард автобензиний хэрэглээ 90,000 тоннд хүрсэн бол ОХУ-аас 47,000 тонн импортолсон байна. Наймдугаар сард ОХУ-аас 64,000 тонн, есдүгээр сард 67,000 тонн автобензин нийлүүлжээ. Эдгээр нь зөвхөн ОХУ-аас авсан хэмжээ юм.
Тэрбээр мөн дизель түлшний нэг сар гаруйн нөөцтэй байгааг мэдэгдэв. Харин "Евро-92" бензинийг БНХАУ зэрэг өөр эх үүсвэрээс импортолдог учраас үнэ нь ялгаатай гэж дурджээ.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ
