“Samsung”-ийн технологийг задруулсан ажилтанд таван жилийн хорих ял оноожээ

Өмнөд Солонгосын технологийн “Samsung Electronics” компанид ажиллаж байсан, улмаар 2016 онд ажлаа солин Хятадын санах ойн чип үйлдвэрлэгч “CXMT” компанид орсон ажилтанд технологийн нууц задруулсан хэргээр таван жилийн хорих ял оноожээ. Сөүлийн давж заалдах шатны шүүх аравдугаар сарын 22-нд уг шийдвэрийг гаргаж, дөрөвдүгээр сард анхан шатны шүүхээс оноосон долоон жилийн хорих ялыг бууруулсан байна. Энэхүү хэрэг нь хагас дамжуулагчийн салбар дахь өрсөлдөөн зөвхөн үйлдвэрлэлийн хүчин чадал, технологийн дэвшлээр хязгаарлагдахгүйгээр туршлагатай инженерүүдийн эзэмшдэг мэдлэг, үйлдвэрлэлийн ноу-хауг хамгаалах асуудалд төвлөрч байгааг харуулж байгаа юм.

Хятадын чип үйлдвэрлэгчид технологийн зөрүүгээ багасгаж байна Арван жилийн өмнө “Samsung Electronics” компани инженерүүдээ алдах эрсдэлийг голчлон Өмнөд Солонгосын “SK Hynix”, АНУ-ын “Micron Technology” зэрэг салбарын зарим өрсөлдөгчтэй холбон үздэг байжээ. Харин сүүлийн жилүүдэд Хятадын үйлдвэрлэгчид өндөр ур чадвартай инженерүүдийг идэвхтэй татах болсон нь өрсөлдөөний нөхцөлийг өөрчилж байна. АНУ-ын экспортын хязгаарлалтын улмаас Хятадын компаниуд дэвшилтэт чип үйлдвэрлэх тоног төхөөрөмж авахад хүндрэлтэй болсон. Ийм нөхцөлд туршлагатай инженерүүдийн мэдлэг нь үйлдвэрлэлийн технологийн саад бэрхшээлийг даван туулахад чухал үүрэг гүйцэтгэж байгаа юм. Энэ талаар зах зээлийн судалгааны “Counterpoint Research” компанийн ахлах шинжээч Жонкү Чойн тайлбарласнаар Хятадын хагас дамжуулагч үйлдвэрлэгчид гадаадын туршлагатай инженерүүдэд өндөр цалин, хувьцааны урамшуулал, орон сууц болон гэр бүлийн дэмжлэг санал болгон ажилд авдаг аж.

“Samsung” ажилтнаа өрсөлдөгч компаниуд руу шилжих хөдөлгөөнд хяналт тавьдаг “Samsung Electronics” технологийн чухал мэдээлэлтэй ойр ажилтнуудын өрсөлдөгч байгууллагад шилжих хөдөлгөөнд хяналт тавьсаар иржээ. Компанийн хуучин ажилтны мэдээлснээр “Samsung” ажлаас гарсан зарим инженер хаана ажилд орсныг хянаж, өрсөлдөгчид рүү шилжихэд хүндрэлтэй гэдгийг бусад ажилтандаа ойлгуулахыг зорьдог байсан аж. Мөн хөдөлмөрийн гэрээндээ ажилтан ажлаас гарснаас хойш хоёр жилийн хугацаанд өрсөлдөгч компанид ажиллахыг хязгаарласан заалт тусгадаг байжээ. Тухайлбал, 2023 онд Өмнөд Солонгосын шүүх “Samsung”-ийн DRAM санах ойн чипийн судалгааны ажилтан асан хүнийг АНУ-ын “Micron” компанид шилжин ажиллахыг хориглох хүсэлтийг хүлээн авсан байна. Шүүх хоёр жилийн хугацаатай хязгаарлалтыг компанийн технологи, бизнесийн мэдээллийг хамгаалахад шаардлагатай бөгөөд хэт урт хугацаа биш гэж үзсэнийг “JoongAng Ilbo” мэдээлжээ.