АНУ-д цалингийн өсөлт сүүлийн таван жилд байгаагүйгээр саарах төлөвтэй байна

АНУ-д ажлын байрны тоо нэмэгдэж байгаа ч ажиллагсдын цалингийн өсөлт удааширч, шинэ ажилд орох боломж улам хумигдахаар байна. "Reuters" агентлагийн эдийн засагчдын дунд явуулсан судалгаагаар аравдугаар сард 65,000 ажлын байр шинээр бий болох төлөвтэй байгаа нь есдүгээр сарын 29,000-аас хоёр дахин өндөр үзүүлэлт юм.

Гэхдээ цалингийн өсөлт эсрэг чиглэлд хөдөлж байна. Тодруулбал, ажиллагсдын цагийн дундаж цалин аравдугаар сард өмнөх оноос 2.9 хувиар өсөх хүлээлттэй байгаа бөгөөд уг тоо нь 2021 оны тавдугаар сараас хойш анх удаа 3 хувийн босгоос буурсан үзүүлэлт болох юм.

Эдийн засаг өссөн ч ажиллагсдын тоо нэмэгдэхгүй байна

АНУ-ын эдийн засаг гуравдугаар улиралд өмнөх оноос 3.4 хувиар өссөн ч ажлын байрны өсөлт харьцангуй сул хэвээр байна. Тухайлбал, он гарсаар сард дунджаар 68,000 ажлын байр бий болсон нь компаниудын шинэ ажилтан авах идэвх төдийлөн нэмэгдээгүйг харуулж байна.

Үүний нэг шалтгаан нь компаниуд хиймэл оюун болон шинэ технологид хөрөнгө оруулж, шинээр хүн ажилд авахын оронд одоогийн ажилтнуудынхаа хамт автоматжуулсан бүтцээр ажлаа үргэлжлүүлэхийг илүүд үзэж байгаад оршино. Мөн цар тахлын үеэр болзошгүй эрсдэлд бэлтгэн олон тооны ажилтан авсан зарим компани хүний нөөцөө дахин нэмэгдүүлэх шаардлагагүй гэж үзэж байгаа юм.

"EY-Parthenon"-ийн ахлах эдийн засагч Грегори Дакогийн тайлбарласнаар одоо хөдөлмөрлөж хүмүүсийн хувьд ажлын байр нь харьцангуй тогтвортой байгаа ч шинээр ажил хайж буй хүмүүс болон ажлаа солих хүсэлтэй байгаа хүмүүст боломж улам хумигджээ.

Ялангуяа саяхан их, дээд сургуулиа төгссөн залуус болон ажилгүй иргэдэд шинэ ажил олоход хүндрэлтэй байгаа аж.

Цалингийн өсөлт саарах нь сайн мэдээ юу?

Гэхдээ цалингийн өсөлт удаашрах нь ажиллагсдын хувьд таатай мэдээ биш байж болох ч инфляцыг бууруулахад эерэг нөлөөтэй байж болно. Учир нь компаниудын томоохон зардлын нэг нь ажиллагсдын цалин бөгөөд цалингийн зардал нэмэгдэхгүй байх нь бараа, үйлчилгээний үнэ буурахад ялимгүй тустай байдаг.

"ING" банкны олон улсын ахлах эдийн засагч Жеймс Найтлигийн үзэж буйгаар цалингийн өсөлт сул байгаа нь инфляц цаашид буурах боломжтой гэсэн итгэлийг АНУ-ын Холбооны нөөцийн банкид төрүүлж байна.

Гэхдээ үүний нөгөө талд өрхийн орлогын асуудал бий. Есдүгээр сард инфляц болон татварыг хасч тооцсон америк өрхүүдийн зарцуулах боломжтой бодит орлого буурчээ. Өөрөөр хэлбэл, цалин нэмэгдэж байгаа ч үнийн өсөлтийг гүйцэхгүй байгаа тул иргэдийн худалдан авах чадвар суларч байгаа аж.

Эдийн засагчид үүнээс шалтгаалан иргэдийн хэрэглээ болон АНУ-ын эдийн засгийн өсөлт 2026 оны сүүлч, 2027 оны эхээр удааширч болзошгүй гэж үзэж байна.