АНУ-ын “Гайхамшигт 7” компанийн зах зээлийн үнэлгээ нэг өдрийн дотор $1 их наядаар уналаа

АНУ-ын хөрөнгийн зах зээл пүрэв гарагийн арилжаагаар 2025 оны дөрөвдүгээр сараас хойших хамгийн огцом уналтуудын нэгийг үзүүллээ. Хөрөнгө оруулагчид хиймэл оюуны дата төвүүдийн бүтээн байгуулалт, хөрөнгө оруулалтын өсөлт удааширч болзошгүй гэж болгоомжилсноор технологийн компаниудын хувьцааны ханш огцом буурч, улмаар зах зээлийн бусад салбарт нөлөөлөв. Технологийн компаниудын хувьцаа давамгайлдаг Nasdaq Composite индекс 5.5 хувиар буурч, аравдугаар сард тогтоосон дээд түвшнээсээ 10 гаруй хувиар унаснаар зах зээлийн коррекц буюу засварын мөчлөгт шилжжээ. Харин АНУ-ын голлох S&P 500 индекс 4.4 хувиар буурсан бол аж үйлдвэрийн Dow Jones индекс 3.4 хувиар буюу 1,833 нэгжээр доошилсон байна. Ингэснээр зах зээл АНУ-ын Конгрессын завсрын сонгуулийн дараа лхагва гарагт ажиглагдсан өсөлтөө бүрэн алдаж, голлох гурван индекс 2025 оны дөрөвдүгээр сарын 4-нөөс хойших хамгийн муу өдрийн үзүүлэлтээ бүртгүүлэв.

“Nvidia”-ийн зах зээлийн үнэлгээ 440 тэрбум гаруй ам.доллароор буурав Хиймэл оюуны салбарын голлох тоглогчдын нэг “Nvidia” компанийн хувьцааны ханш нэг өдөрт 9 гаруй хувиар унаж, он гарснаас хойших өөрчлөлт нь хасах 2.6 хувьд хүрчээ. Мөн тус компанийн зах зээлийн үнэлгээ 440 тэрбум гаруй ам.доллароор буурснаар тухайн өдрийн технологийн компаниудын уналтыг тэргүүллээ. Үүнтэй зэрэгцэн “Гайхамшигт Долоо” буюу “Apple”, “Microsoft”, “Alphabet”, “Amazon”, “Meta”, “Nvidia”, “Tesla” гэсэн технологийн долоон компанийн зах зээлийн нийт үнэлгээ 1 их наяд гаруй ам.доллароор буурсан байна. Мөн хагас дамжуулагч үйлдвэрлэгчдийн хувьцааны ханш огцом унасан бөгөөд “AMD”, “Micron Technology”, “Marvell Technology” компаниудын ханш тус бүр 17 орчим хувиар уруудав.

Технологийн салбарын уналт зах зээлийг бүхэлд нь хамарч байна S&P 500 индексийн сагсанд бүртгэлтэй нийт компаниудын үйл ажиллагаа эрхэлдэг 11 салбар бүгд уналттай арилжаалагдсанаас мэдээллийн технологийн салбар 7.3 хувиар буурч, 2020 оны гуравдугаар сарын 16-наас хойших хамгийн муу өдрөө үзүүллээ. Технологийн салбарын компаниудад хөрөнгө оруулдаг “Technology Select Sector SPDR Fund” сангийн нэгж эрхийн ханш 8.04 хувиар буурч, арилжааны хэмжээ нь 33 саяас давжээ. Энэ тоо нь сүүлийн 30 өдрийн дундаж болох 9.2 саяас гурав дахин өндөр үзүүлэлт юм. Уналтын цар хүрээ зөвхөн томоохон технологийн компаниудаар хязгаарлагдсангүй. Нью-Йоркийн хөрөнгийн биржид хувьцааны ханш нь буурсан компанийн тоо өссөн компанийнхаас бараг зургаа дахин олон байсан бол Nasdaq биржид энэ харьцаа тав орчим дахин зөрүүтэй байв. Мөн S&P 500 индексийн сагсан дахь 310 компанийн хувьцааны ханш сүүлийн 52 долоо хоногийн дээд түвшнээсээ 10 гаруй хувиар унаад байгаа бол 174 компанийнх 20 гаруй хувиар буурсан байжээ. Хиймэл оюуны дата төвүүдийн ирээдүйд эргэлзээ нэмэгдэв Хөрөнгийн зах зээлийн уналтад АНУ-ын завсрын сонгуулийн үр дүнтэй холбоотой зохицуулалтын болгоомжлол голлон нөлөөлсөн гэж зах зээлийн шинжээчид үзэж байна. Ардчилсан намын сонгуулийн амжилтын дараа дата төвүүдийн барилгын зөвшөөрөл, эрчим хүчний хэрэглээ болон хиймэл оюуны дэд бүтцийн хөгжүүлэлтэд тавих хяналт чангарч болзошгүй гэсэн хүлээлт үүсчээ. Улмаар дата төвийн тоног төхөөрөмж, хагас дамжуулагчийн эрэлтэд сөргөөр нөлөөлөх эрсдэлийг хөрөнгө оруулагчид дахин үнэлж эхэлсэн байна.