Дүүжин замын тээврийн 98 кабинд 73.5 тонн ачаа "аялж" байна

Улаанбаатар хотын дүүжин замын тээврийн 98 кабинд тус бүр 750 килограмм элс байршуулж, системийн ажиллагааг 73.5 тонн туршилтын ачаатай нөхцөлд шалгаж байна.

Өөрөөр хэлбэл, нэг кабинд 25 килограмм жинтэй 30 шуудай элс байршуулсан бөгөөд элсийг Стандарт, хэмжил зүйн газраас баталгаажуулсан жингээр хэмжжээ.

Энэхүү туршилтаар системийн бүх тохируулгыг хянаж, энгийн нөхцөлд системийг хэрхэн ажиллуулах ёстойг тодорхойлохоор зорьж байна.

Ачаатай туршилт долоо хоног үргэлжлэх бөгөөд энэ хугацаанд олон улсын хөндлөнгийн хяналт, баталгаажуулалтын “Bureau Veritas” байгууллага ажиллах юм.

Тус байгууллага дүүжин замын тээврийн системийн удирдлага, техникийн бүрэн бүтэн байдал, инженерийн байгууламжийн аюулгүй байдлыг шалгана. Мөн төслийн зураг төсөл, холбогдох норм, стандартын хэрэгжилт, ашигласан материал болон барилга угсралтын ажлын чанарт үнэлгээ хийхээр төлөвлөжээ. Яармаг–Арцат буудалд 40 гаруй нэр төрлийн 100 гаруй мэдрэгч, Хархорин буудалд 40 гаруй нэр төрлийн 80 гаруй мэдрэгч суурилуулсан байна. Эдгээр мэдрэгчийн ажиллагаа болон системийн удирдлагын тохируулгыг мөн хөндлөнгийн шалгалтад хамруулна.

Мэдрэгч болон системийн ажиллагааг шалгах ажил 10 гаруй хоног үргэлжлэх бөгөөд үүний дараа Улсын комисс ажиллахаар төлөвлөжээ.

Одоогоор төслийн Яармаг, Арцат болон Хархорин буудлын барилга угсралтын ажлын гүйцэтгэл 85–89 хувьтай байна.

Ачаатай туршилт болон хөндлөнгийн шалгалт нь дүүжин замын тээврийг зорчигч тээвэрлэхэд ашиглахын өмнөх техникийн аюулгүй байдлыг үнэлэх чухал үе шат аж.