Өмнөд Солонгосын тусгай хүчний цэргүүдийг загварын тайзны алхаагаар сургасан нь шүүмжлэл дагууллаа

Өмнөд Солонгосын армийн элит тусгай хүчний цэргүүдийг загвар өмсөгчдийн тайзны алхаа, хөдөлгөөнөөр сургасан арга хэмжээ олон нийтийн шүүмжлэл дагуулжээ. Тус улсын Агаарын десантын тусгай хүчний 1 дүгээр бригад цэргийн баазын спорт зааланд “K-Walking Performance Military Festival” нэртэй арга хэмжээ зохион байгуулсан нь цэргийн сахилга бат, сургалтын агуулгатай холбоотой маргаан үүсгэсэн байна.

Өмнө нь тусгай хүчинд алба хааж байсан нэгэн YouTube контент бүтээгчийн TV Chosun телевизэд онцгойлон өгсөн бичлэгт цэргийн өнгөлөн далдлах хувцас, өндөр өсгийтэй гутал өмссөн эмэгтэй загвар өмсөгчид цэргүүдэд тайзны алхаа зааж буй нь дүрслэгджээ. Загвар өмсөгчид нэг хөлөө нөгөөгийнхөө урдуур зөрүүлэн алхаж, биеэ эргүүлэн чиглэлээ өөрчилж, гараа нугалан зогсолт үзүүлсэн байна. Харин эгнэн зогссон эрэгтэй цэргүүд тэдний хөдөлгөөнийг дуурайн давтаж, дараа нь ээлжлэн урагш гарч өөрсдийн сурсан хөдөлгөөнөө үзүүлжээ. Бичлэг олон нийтэд түгсний дараа тусгай ажиллагаа гүйцэтгэх үүрэгтэй цэргийн ангид ийм сургалт зохион байгуулсан нь хэр зохистой талаар шүүмжлэл өрнөсөн байна. X платформын нэгэн хэрэглэгч тусгай хүчний ангийн үүрэг, хариуцлагыг харгалзан үзвэл ийм сургалт ямар зорилготой байсныг ойлгоход хүндрэлтэй хэмээн шүүмжилжээ. Өмнөд Солонгосын арми уг арга хэмжээг жилд хоёр удаа зохион байгуулдаг цэргүүдийн хүмүүжил, хувь хүний хөгжлийн сургалтын хүрээнд явуулсан интерактив хөтөлбөр гэж тайлбарлав. Тус хөтөлбөр нь цэргүүдийн биеийн зөв байрлал, зогсолтыг сайжруулах зорилготой байжээ. Гэвч армийн албан тушаалтан орон нутгийн хэвлэлд өгсөн тайлбартаа сургалтын агуулга нь тухайн ангийн онцлог болон цэргүүдийн хэрэгцээ шаардлагад нийцээгүй, зохион байгуулахаас өмнө хөтөлбөрийг хангалттай нягтлаагүй гэдгийг хүлээн зөвшөөрсөн байна. Цаашид сургалтын хөтөлбөр боловсруулахдаа цэргүүдийн саналыг авч, зохион байгуулах арга хэмжээний тохиромжтой эсэхийг илүү нарийвчлан үнэлэхээ армийн зүгээс мэдэгджээ.