Уолл Стрийтийн “улаан давалгаа” Азийн технологийн зах зээлд үргэлжилж байна

Уолл Стрийтийг нөмөрсөн “улаан давалгаа” Азийн зах зээлд үргэлжилж, бүс нутгийн технологийн компаниудын хувьцааны ханш баасан гарагийн арилжааны эхэнд огцом уналт үзүүлж байна. АНУ-ын технологийн томоохон компаниудын хувьцааны ханш өнгөрсөн шөнө огцом унаж, “Гайхамшигт 7”-ийн зах зээлийн үнэлгээнээс нэг өдрийн дотор 1 их наяд ам.доллар арчигдаад байгаа юм.

Өмнөд Солонгос, Япон, Тайванийн технологийн компаниуд уналтад өртлөө Уолл Стрийтийн шинжээчдийн дүгнэж буйгаар технологийн салбарт “коррекц” буюу засвар хөдөлгөөн орж эхэлсэн бөгөөд Өмнөд Солонгос, Япон болон Тайванийн компаниудад жинтэй цохилт ирж байна. Тухайлбал, Өмнөд Солонгосын санах ойн чип үйлдвэрлэгч “SK Hynix”-ийн хувьцааны ханш баасан гарагийн арилжааны үеэр 8 гаруй хувиар, “Samsung Electronics”-ийнх 7 хувиар буурав. Мөн технологийн эд анги үйлдвэрлэгч “LG Innotek”-ийн хувьцааны ханш 10 хувиар доошилсон бол дэлгэц үйлдвэрлэгч “LG Display”-ийнх 7.7 уруудсан байна. Үүний зэрэгцээ Японд хагас дамжуулагчийн туршилтын тоног төхөөрөмж үйлдвэрлэгч “Advantest”-ийн хувьцааны ханш 12.2 хувиар, чип үйлдвэрлэлийн тоног төхөөрөмж нийлүүлэгч “Tokyo Electron”-ийнх 7.3 хувиар буурсан байна. Мөн технологийн хөрөнгө оруулалтын “SoftBank Group”-ийн хувьцааны ханш 11.6 хувиар унасан бол санах ойн чип үйлдвэрлэгч “Kioxia Holdings”-ийнх бараг 10 хувиар, “Renesas Electronics”-ийнх 7.5 хувиар буурав. Харин Тайванийн зах зээлд дэлхийн томоохон гэрээт чип үйлдвэрлэгч “TSMC”-ийн хувьцааны ханш 9.6 хувиар буурсан бол “Foxconn” нэрээр танигдсан “Hon Hai Precision Industry”-ийнх 9.4 хувиар, “Foxconn Technology”-ийнх 9.1 хувиар уналаа. АНУ-ын сонгуулийн үр дүн хиймэл оюуны хөрөнгө оруулалтад эргэлзээ төрүүллээ Арваннэгдүгээр сарын 3-нд болсон АНУ-ын Конгрессын завсрын сонгуульд Ардчилсан нам Конгрессын хоёр танхимд олонх болсон нь дата төвийн бүтээн байгуулалтад тавих зохицуулалт чангарах хүлээлтийг нэмэгдүүлжээ. Тухайлбал, хиймэл оюуны дата төвүүд голчлон төвлөрдөг Техас, Жоржиа зэрэг мужид эдгээр дэд бүтцийн бүтээн байгуулалтыг илүү хумих, хязгаарлах чиглэлээр бодлого баримталдаг Ардчилсан намын нэр дэвшигчид мужийн амбан захирагчийн сонгуульд ялалт байгуулаад буй. Дата төвүүдийн цахилгаан, усны хэрэглээ, байгаль орчинд үзүүлэх нөлөө болон орон нутгийн иргэдийн эсэргүүцэл сонгуулийн үеэр анхаарал татсан асуудлуудын нэг байв. Хөрөнгө оруулагчдын хувьд дата төвийн шинэ төслүүдэд хязгаарлалт тогтоовол хиймэл оюуны тооцоололд ашигладаг чип, санах ой, сервер болон бусад тоног төхөөрөмжийн ирээдүйн эрэлт упаашрах эрсдэл үүсч байна. Үүний зэрэгцээ технологийн томоохон компаниуд хиймэл оюуны дэд бүтцэд хэдэн зуун тэрбум ам.доллар зарцуулж байгаа ч уг хөрөнгө оруулалт хэр хурдан ашиг авчрах нь тодорхойгүй хэвээр байна. “Microsoft”, “Amazon”, “Alphabet”, “Meta” компаниудын энэ оны хиймэл оюуны дэд бүтцийн нийт зардал 600 орчим тэрбум ам.долларт хүрэх төлөвтэй байгаа юм.