Япон ETF-ийн борлуулалтаас олох нэмэлт орлогоор стратегийн салбаруудад хөрөнгө оруулна

Японы Ерөнхий сайд Санаэ Такаичи өнөөдрийн парламентын хуралдааны үеэр тус улсын Төв банкны ETF буюу хөрөнгө оруулалтын сангийн борлуулалтыг нэмэгдүүлснээр улсын төсөвт төвлөрөх орлогыг эдийн засгийн аюулгүй байдал, хямралын удирдлага болон өсөлтийн стратегийн салбаруудад дахин хөрөнгө оруулахад ашиглахаар төлөвлөж буйгаа мэдэгдлээ. Тэрбээр ETF-ийн борлуулалтаас бий болох нэмэлт орлогыг Японы эдийн засгийн өсөлтийн үр өгөөж хэмээн тодорхойлж, уг хөрөнгийг эдийн засгийн өсөлтийг дэмжихэд зарцуулах нь “зүйтэй алхам” гэдгийг тайлбарлажээ. Такаичигийн Засгийн газар төсвийн томоохон зардлуудаа санхүүжүүлэхдээ улсын өрийг нэмэгдүүлэхээс илүүтэй татварын бус орлогын эх үүсвэрийг өргөжүүлэхийг эрмэлзэж буй.

ETF-ийн жилийн борлуулалтыг 2.6 дахин нэмэгдүүлнэ Японы Төв банк аравдугаар сарын 30-нд өөрийн эзэмшлийн ETF-ийн жилийн борлуулалтыг дансны үнэлгээгээр 330 тэрбум иенээс 860 тэрбум иен болгон нэмэгдүүлэх шийдвэр гаргасан. Ингэснээр борлуулалтын жилийн хэмжээ 530 тэрбум иенээр буюу 161 орчим хувиар өсөх тооцоо гарчээ Шинэ зохицуулалт 2027 оны нэгдүгээр сараас хэрэгжих бөгөөд одоогийн борлуулалтын хурдыг хадгалсан тохиолдолд ETF-ийн хөрөнгийг бүрэн худалдахад шаардагдах тооцоолсон хугацаа 112 жилээс 43 жил болж богиносох юм. Японы Төв банк ETF-ийг зах зээлд борлуулснаас олсон цэвэр ашгийнхаа тодорхой хэсгийг улсын төсөвт шилжүүлдэг. Иймээс борлуулалтын хурдыг нэмэгдүүлснээр Засгийн газарт шилжүүлэх орлогын хэмжээ өсөх боломжтой гэж үзэж буй. Гэхдээ 860 тэрбум иен нь Засгийн газарт шууд төвлөрөх орлого биш, харин Төв банкны жилд борлуулах ETF-ийн дансны үнэлгээ юм. Төсөвт шилжүүлэх бодит дүн нь борлуулалтын ашиг болон Төв банкны бусад орлого, зардлаас хамаарах ажээ.

Хувьцааны зах зээлийн уналтыг анхааралтай ажиглаж байна Үүний зэрэгцээ АНУ-ын Конгрессын завсрын сонгуулийн үр дүнд дэлхийн хөрөнгийн зах зээлд борлуулалтын давалгааны үүсээд буй бөгөөд Такаичи “Зах зээлийн хэлбэлзэл олон улсын эдийн засагт нөлөөлж байна” гэдгийг онцолж, “Иймээс нөхцөл байдлыг анхааралтай ажиглаж байна’ гэдгээ илэрхийлжээ. Тэрбээр ялангуяа хиймэл оюун болон хагас дамжуулагчийн салбарын компаниудын хувьцааны ханш огцом буурч байгааг онцолсон байна. Үүнтэй холбогдуулан Япон улс өрсөлдөөнд давуу талтай үйлдвэрлэлийн салбаруудаа бэхжүүлэх замаар эдийн засгийн өсөлтийг дэмжих бодлогод анхаарлаа төвлөрүүлэхээ мэдэгдэв.