“Сэлбэ ухаалаг хот” төслийн 15 блокийн барилгын ажил эхлээгүй байна: Нэмэлт 700 тэрбум төгрөг шаардлагатай гэв
Төслийг бүрэн дуусгахад нэмэлт 700 орчим тэрбум төгрөг шаардлагатай тул орон сууц, авто зогсоолын борлуулалтыг эхлүүлэх санал гаргажээ.
Нийслэлийн гадаад бондын 1.6 их наяд төгрөгийн санхүүжилтээр хэрэгжүүлж буй “Сэлбэ ухаалаг хот” төслийн орон сууц, авто зогсоолын борлуулалтыг эхлүүлэх асуудлыг ирэх долоо хоногт болох НИТХ-аар хэлэлцүүлэхээр болжээ.
НИТХ дахь Ардчилсан намын бүлгийн хуралдаанд “Сэлбэ 20 минутын хот корпорац” ХХК-ийн гүйцэтгэх захирал Б.Мөнхбаатар төслийг бүрэн хэрэгжүүлэхэд нэмэлт 700 орчим тэрбум төгрөг шаардлагатай байгааг танилцуулсан байна. Үүнтэй холбоотойгоор компанийн дүрэмд өөрчлөлт оруулж, үл хөдлөх хөрөнгийн зуучлалын үйл ажиллагаа эрхлэх эрх олгох, орон сууцны хөрөнгийн тодорхой хэсгийг холбогдох санд төвлөрүүлэх зохицуулалт тусгах санал гаргажээ.
Нийт 8,575 айлын орон сууц бүхий 113 блок барилгаас 15-ынх нь ажил эхлээгүй байна. Үүний 11 блок нь тендерт шалгарсан компанийн гэрээг цуцлахтай холбоотой шүүхийн шийдвэрээс, үлдсэн дөрвөн блок нь газар чөлөөлөлтийн асуудлаас шалтгаалжээ.
Төслийн хүрээнд өнгөрсөн хоёр жилийн хугацаанд 157 га газрыг 500 орчим тэрбум төгрөгөөр чөлөөлсөн ч төв зам дагуу худалдаа, үйлчилгээний барилга байгууламж барихаар төлөвлөсөн дөрвөн га гаруй газар чөлөөлөгдөөгүй байна. Үүнтэй холбоотойгоор нийслэлийн Засаг даргын захирамжаар байгуулагдсан ажлын хэсэг газар эзэмшигчидтэй хэлэлцээ хийж байгаа аж.
Арваннэгдүгээр сарын 3-ны байдлаар Сэлбэ дэд төвийн төслийн гүйцэтгэл 39.8 хувь, орон сууцны долоон багцын барилга угсралтын ажлын дундаж гүйцэтгэл 26.2 хувьтай байна.
Орон сууц, авто зогсоолын борлуулалтын үнэ, нөхцөл болон эхлэх хугацааг одоогоор зарлаагүй байна.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ
