“McDonald’s”-ийн АНУ дахь борлуулалт сэргэх шинж тэмдэг илэрснээр хувьцааны ханш нь 6.5 хувиар өслөө

АНУ-ын түргэн хоолны томоохон сүлжээ “McDonald’s”-ийн бизнесийг сэргээх арга хэмжээ үр дүнгээ өгч эхэлсэн шинж тэмдэг тус компанийн санхүүгийн гуравдугаар улирлын тайлангаас ажиглагджээ. Компанийн АНУ дахь ижил салбаруудын борлуулалт өмнөх оны мөн үеэс 0.2 хувиар буурсан ч шинжээчдийн хүлээлтээс давсан нь хөрөнгө оруулагчдын итгэлийг нэмэгдүүлэв.

Компанийн хувьцааны ханш лхагва гарагийн арилжаагаар 6.5 хувиар өсч, аравдугаар сарын эхэн үеийн доод түвшнээсээ 20 гаруй хувиар сэргээд байна. Үүнээс өмнө АНУ дахь борлуулалт суларч, шинэчлэгдсэн стратегитай “Burger King”-ийн өрсөлдөөн ширүүссэнээр хувьцааны ханш гуравдугаар сард тогтоосон түүхэн дээд түвшнээсээ 30 орчим хувийг нь алдаад байв.

Хямд үнэтэй багц бүтээгдэхүүн борлуулалтыг дэмжжээ “McDonald’s” гуравдугаар улиралд бүтээгдэхүүний хүртээмжтэй үнэд анхаарч, цахим урамшууллаа сэргээхийн зэрэгцээ 5 болон 6 ам.долларын багц хоолны сурталчилгааг эрчимжүүлсэн байна.

Үүний зэрэгцээ АНУ дахь борлуулалт долоо, наймдугаар сард буурсан ч есдүгээр сард өсөлт үзүүлж, хэрэглэгчдийн урсгал аравдугаар сард ч сайжрах хандлагатай байжээ.

“McDonald’s”-ийн гүйцэтгэх захирал Крис Кемпчински CNBC-ийн “Mad Money” нэвтрүүлгийн хөтлөгч Жим Крамерт өгсөн ярилцлагадаа АНУ-ын зах зээлд хэрэгжүүлсэн арга хэмжээнүүдийн үр дүнд хэрэглэгчдийн урсгал тогтворжиж эхэлсэн бөгөөд улирлын турш ахиц гарсныг онцолсон байна.

Гэсэн хэдий ч компанийн орлого шинжээчдийн хүлээлтэд хүрээгүй бөгөөд орлого хүлээлтээс доогуур гарахад Франц дахь бизнесийн сул гүйцэтгэл голлон нөлөөлжээ.

2027 онд хямд үнэтэй шинэ цэс нэвтрүүлэхээр төлөвлөж байна “McDonald’s” цаашид хямд үнэтэй бүтээгдэхүүний сонголтоо өргөжүүлэх, цахим урамшууллыг нэмэгдүүлэх, хоолны чанар болон үйлчилгээний стандартыг сайжруулахаар төлөвлөжээ.

Тус компани одоогоор хямд үнэтэй хоёр шинэ цэс туршиж байгаа бөгөөд илүү үр дүнтэй хувилбарыг 2027 оны эхээр АНУ даяар нэвтрүүлэхээр зорьж байна.

Үүний зэрэгцээ Жим Крамер “McDonald’s”-ийн сэргэлтийг эерэгээр үнэлж, хувьцааны ханш цаашид өсөх боломжтой гэж үзжээ. Гэхдээ хувьцааны ханш аравдугаар сарын доод түвшнээс мэдэгдэхүйц сэргэсэн тул цаашдын өсөлт нь компанийн стратегийн бодит хэрэгжилтээс шалтгаална гэдгийг анхааруулсан байна.

Түүний үзэж буйгаар хувьцааны ханш доод түвшинд байх үед үнэлгээ нь хөрөнгө оруулагчдад сонирхол татахуйц байсан бол одоо бизнесийн үзүүлэлтүүд тогтвортой сайжрах шаардлагатай болжээ.