Чингис хааны хөргийг архи, тамхины шошгод ашиглахыг хориглох саналыг Байнгын хороо дэмжжээ
Чингис хааны эш хөргийг согтууруулах ундаа, тамхинд ашиглахыг хориглох саналыг хуралдаанд оролцсон 17 гишүүний 12 нь буюу 70.6 хувь нь дэмжжээ.
УИХ-ын Төрийн байгуулалтын байнгын хороо арваннэгдүгээр сарын 4-ний хуралдаанаар Чингис хааны эш хөргийг архи, тамхины шошгод ашиглахыг хориглох саналыг дэмжлээ. УИХ-ын гишүүн Л.Гантөмөрийн гаргасан уг саналд хуралдаанд оролцсон 17 гишүүний 12 нь буюу 70.6 хувь нь саналаар дэмжсэн байна.
Саналыг “Их Монгол Улс байгуулагдсаны 820 жилийн ойг тохиолдуулан Их Эзэн Чингис хааны төрт ёсны өв уламжлалыг дээдлэн мөнхжүүлэх тухай” тогтоолын төслийг хэлэлцэх үеэр гаргажээ. Тодруулбал, Чингис хааны эш хөргийг эрхэмлэн дээдлэх агуулгатай нийцүүлэн согтууруулах ундаа, тамхины шошгод хэрэглэхгүй байх нь зүйтэй гэж тайлбарласан байна.
Түүх, соёлын өвийг хамгаалах тусгай сангийн санал боловсруулна
Төсөлд Чингис хааны нэрээр нэрлэсэн бараа, бүтээгдэхүүний онцгой албан татварын тодорхой хувиар санхүүжих тусгай сан байгуулах санал боловсруулж, УИХ-д танилцуулах чиглэлийг Засгийн газарт өгөхөөр тусгажээ.
УИХ-ын дарга С.Бямбацогтын тайлбарласнаар сангийн хөрөнгөөр Чингис хааны үйл хэрэг, Их Монгол Улсын түүхийг хамгаалах, судлах, сурталчлах үйл ажиллагааг санхүүжүүлэх зорилготой аж.
Тогтоолын төсөл нь түүхэн баримт, сурвалжийг судлах, соёлын дурсгалыг хамгаалах, гадаадад хадгалагдаж буй олдворыг Монголд авчран олон нийтэд үзүүлэх үйл ажиллагааг дэмжинэ гэж тайлбарласан байна. Түүнчлэн “Монголын нууц товчоо”-нд гардаг үйл явдлын газар нутгийг тогтоож, түүхэн өвийг таниулах асуудлыг хамруулжээ.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ
