УИХ-ын нэгдсэн хуралдаан: Эрүүл мэндийн ажилтнуудын 89 хувь нь зээлтэй, 46.9 хувь нь галлагаатай сууцанд амьдарч байна

Эрүүл мэндийн салбарт ажиллаж буй эмч, сувилагчдын 89 хувь нь банк болон банк бус санхүүгийн байгууллагад дунджаар хоёр төрлийн зээлтэй, судалгаанд хамрагдсан ажилтнуудын 46.9 хувь нь галлагаатай сууцад амьдарч байгааг УИХ-ын гишүүн Т.Мөнхсайхан мэдээллээ.

Тэрбээр өнөөдөр буюу арваннэгдүгээр сарын 5-ны УИХ-ын чуулганы нэгдсэн хуралдаанд "Эрүүл мэндийн ажилтны тухай" хуулийн төсөл болон хамт өргөн мэдүүлсэн хуулийн төслүүдийн үзэл баримтлалыг танилцуулах үеэрээ ийн тодотгосон байна.

Уг хуулийн төслийг өнгөрсөн долоодугаар сарын 1-нд өргөн мэдүүлсэн бөгөөд өнөөдрийн чуулганаар хэлэлцэх эсэхийг шийдвэрлэхээр төлөвлөжээ.

Эрүүл мэндийн ажилтнуудын 58.5 хувь нь нийслэлд төвлөрсөн

Өнөөгийн байдлаар Монгол Улсад 4,914 гаруй эрүүл мэндийн байгууллагад 69.7 мянган хүн ажиллаж байна. Тэдгээрийн 41.5 хувь нь хөдөө орон нутаг, алслагдсан сум, багт ажиллаж байгаа бол үлдсэн 58.5 хувь нь Улаанбаатар хотод төвлөрчээ.

Мөн 10 мянган хүн амд ногдох их эмчийн тоо 44.3 байгаа нь танилцуулгад дурдсанаар дэлхийн дунджаас 2.6 дахин өндөр үзүүлэлт юм.

Гэвч улсын хэмжээнд эмчийн тоо харьцангуй өндөр байгаа нь орон нутгийн эрүүл мэндийн байгууллагуудын хүний нөөцийн хэрэгцээ бүрэн хангагдсан гэсэн үг биш юм. Хот, хөдөөгийн эмнэлгийн ажилтнуудын байршлын ялгаа нь эрүүл мэндийн тусламж, үйлчилгээний хүртээмжид анхаарах шаардлагатайг харуулж байна.

Судалгаанд хамрагдсан ажилтнуудын 44.2 хувь нь бага насны хүүхэдтэй

Хуулийн төслийн танилцуулгад эрүүл мэндийн ажилтнуудын санхүүгийн болон амьдрах орчны нөхцөл байдлыг мөн онцолжээ.

Тухайлбал, эмч, сувилагчдын 89 хувь нь банк болон банк бус санхүүгийн байгууллагад зээлтэй бөгөөд дунджаар хоёр төрлийн зээлийн төлбөр төлж байна.

Мөн 44.2 хувь нь бага насны хүүхэдтэй, 46.9 хувь нь галлагаатай сууцад амьдардаг гэсэн мэдээллийг танилцуулжээ.

Эдгээр үзүүлэлт нь эрүүл мэндийн салбарын ажилтнуудын орон сууц, санхүүгийн болон нийгмийн баталгааг сайжруулах асуудлыг хуулийн түвшинд авч үзэх шаардлагын нэг үндэслэл болж байна.

Сүүлийн таван жилд 149 эмч, мэргэжилтнийг эрүүгийн хэрэгт холбогдуулан шалгажээ

Эрүүл мэндийн ажилтнуудын эрх зүйн орчинтой холбоотой мэдээллийг мөн танилцуулсан байна.

Сүүлийн таван жилийн хугацаанд цагдаагийн байгууллага Эрүүгийн хуулийн 15.1 дүгээр зүйлд заасан гэмт хэргийн шинжтэй үйлдэлтэй холбогдуулан 149 эмч, эмнэлгийн мэргэжилтэнд эрүүгийн хэрэг үүсгэн шалгажээ.

Харин Шүүхийн ерөнхий зөвлөлийн мэдээллээр 2021–2024 онд нийт 40 хэрэгт 83 эмч, эмнэлгийн мэргэжилтнийг холбогдуулан шүүхээр шийдвэрлэж, 44 эмчид ял шийтгэл оногдуулсан байна. УИХ-ын чуулганы нэгдсэн хуралдаанаар Эрүүл мэндийн ажилтны тухай хуулийн төсөл болон холбогдох бусад төслийг хэлэлцэх эсэхийг шийдвэрлэх бөгөөд хэлэлцүүлгийн үеэр гишүүдийн асуулт асуух хугацаа 90 минут юм.