Хейли Биберийн үүсгэн байгуулсан “Rhode” брэнд бизнесээ олон улсын зах зээлд улам тэлэх боллоо

АНУ-ын гоо сайхны бүтээгдэхүүн үйлдвэрлэгч “Elf Beauty” компаниийн орлого шинжээчдийн хүлээлтээс давсантай холбоотойгоор бүтэн жилийн өсөлтийн төлөвөө нэмэгдүүллээ. Тус компанийн орлого гуравдугаар улиралд өмнөх оны мөн үеэс 51 хувиар өсч, 520.8 сая ам.долларт хүрсэн нь Уолл Стритийн шинжээчдийн 470.3 сая ам.долларын таамгаас 50.5 сая ам.доллароор өндөр дүн болж байна.

Компанийн мэдээлснээр орлого ийнхүү өсөхөд АНУ болон олон улсын зах зээл дэх жижиглэн худалдаа, цахим борлуулалтын өсөлт голлон нөлөөлсөн байна.

Үүний зэрэгцээ “Elf Beauty” бүтэн жилийн борлуулалтын өсөлтийн төлөвөө өмнөх 18–20 хувиас 22–24 хувь болгон ахиулжээ. Үүнд маркетингийн кампанит ажлууд болон өнгөрсөн оны наймдугаар сард худалдан авсан дээд зэрэглэлийн гоо сайхны “Rhode” брэндийн олон улсын зах зээлд эзлэх байр суурийг улам тэлэх нь голлох үүрэг гүйцэтгэнэ гэж үзэж байна.

Тус компанийн санхүү хариуцсан захирал Мэнди Филдс “Reuters” агентлагт өгсөн ярилцлагадаа “Rhode” брэндийн хэрэглэгчдийн 75 хувь нь АНУ-аас гадна амьдардаг тул олон улсын зах зээлд өсөх томоохон боломж байгааг онцолжээ.

Залуу хэрэглэгчдийн дунд дээд зэрэглэлийн гоо сайхан, арьс арчилгааны бүтээгдэхүүний эрэлт нэмэгдэж байгаа нь “Rhode” брэндийн борлуулалтын боломжийг дэмжиж байна.

“Rhode” Европын 19 улсын зах зээлд нэвтэрчээ “Rhode” брэнд Францын тансаг хэрэглээний “LVMH” группийн харьяа “Sephora” сүлжээгээр дамжуулан Европын 19 улсад үйл ажиллагаагаа өргөжүүлээд буй.

Компанийн удирдлагуудын мэдээлснээр тус брэнд одоогоор “Sephora”-ийн нийт дэлгүүрийн 40 орчим хувьд худалдаалагдаж байгаа нь цаашид жижиглэн худалдааны сүлжээгээр дамжуулан борлуулалтаа нэмэгдүүлэх боломжтойг харуулж байгаа юм.

Гэхдээ “Rhode” брэндийн бүтээгдэхүүнийг илүү олон биет дэлгүүрт нийлүүлэхийн хэрээр нийт ашгийн маржин буурах төлөвтэй байгааг компани анхааруулжээ.

Маркетингийн зардал өссөнөөр цэвэр ашиг хүлээлтэд хүрсэнгүй “Elf Beauty”-ийн нийт ашгийн маржин 1.6 хувиар нэмэгдэж, 71 хувьд хүрсэн нь шинжээчдийн 70.2 хувийн төсөөллөөс давсан үзүүлэлт болжээ.

Харин компанийн GAAP стандартын дагуух цэвэр ашиг 30 сая ам.долларт хүрч, шинжээчдийн таамагласан 34.9 сая ам.долларт хүрсэнгүй. Мөн нэгж хувьцаанд ногдох тохируулсан ашиг 0.50 ам.доллар болсон нь 0.60 ам.долларын хүлээлтээс доогуур дүн болж байна.

Гэхдээ тайлант хугацаанд борлуулалт, ерөнхий удирдлага болон захиргааны зардал 69 сая ам.доллароор нэмэгдэж, 300.1 сая ам.долларт хүрсэн нь шинжээчдийн таамагласан 277.8 сая ам.доллароос 22.3 сая ам.доллароор өндөр дүн юм.

Зардлын өсөлтөд АНУ болон олон улсын зах зээл дэх маркетинг, худалдааны үйл ажиллагаа, түгээлтийн зардал голлон нөлөөлсөн байна.

Тус компани АНУ-ын тарифын буцаан олголтоос авсан 52 сая ам.долларыг маркетингийн кампанит ажилд зарцуулж, нийт бүтээгдэхүүнийхээ ойролцоогоор 10 хувийн үнийг бууруулахад ашиглажээ.

Гэхдээ уг буцаан олголт нэг удаагийн шинжтэй тул маркетингийн зардлыг ирэх санхүүгийн жилд ижил түвшинд хадгалахгүй гэдгийг санхүү хариуцсан захирал Мэнди Филдс мэдэгдсэн байна.

Хиймэл оюун, технологи болон шинэ бүтээгдэхүүнд хөрөнгө оруулна “Elf Beauty” цаашид бизнесийн өсөлт, технологи, хиймэл оюуны шийдэл болон жижиглэн худалдааны дэлгүүрүүд дэх брэндийн байр сууриа бэхжүүлэхэд хөрөнгө оруулалтаа чиглүүлэхээр төлөвлөжээ.

Компанийн гүйцэтгэх захирал Таранг Амин лхагва гарагийн санхүүгийн тайлангийн хурлын үеэр арьс арчилгааны бүтээгдэхүүний борлуулалтад ашигласан стратегиа үс арчилгааны бүтээгдэхүүнд хэрэгжүүлж, бусад дэлгүүрт нийлүүлэлтээ өргөжүүлэхээр төлөвлөж байгааг мэдэгдсэн байна.

Мөн тус компани бүтэн жилийн тохируулсан, нэгж хувьцаанд ногдох тохируулсан ашгийн төлөвөө 3.50–3.55 ам.доллароос 3.82–3.86 ам.доллар болгон нэмэгдүүлжээ.