Америкийн бизнес эрхлэгч бүсгүй хэрэглэгчдийнхээ итгэлийг алдахгүйн тулд $10 саяын алдагдал хүлээх шийдвэр гаргажээ

АНУ-ын спорт болон өдөр тутмын хувцасны “Set Active” компанийн үүсгэн байгуулагч, гүйцэтгэх захирал Линдси Картер аравдугаар сарын 19-нд Black Friday болон Cyber Monday-ийн үеэр төлөвлөсөн шинэ бүтээгдэхүүний худалдаагаа тодорхойгүй хугацаагаар цуцалж буйгаа Instagram хуудсаараа мэдэгджээ. Тус компани энэ онд хэрэглэгчдийн захиалгыг товлосон хугацаанд нь хүргэхэд хүндрэлтэй тулгарсан байна. Картер саатал хэд хэдэн шалтгаантайг дурдсан ч дэлгэрэнгүй тайлбар өгөөгүй аж. Иймээс шинэ бүтээгдэхүүнүүд Лос-Анжелес дахь агуулахад нь бодитоор ирэхээс өмнө худалдаанд гаргахгүй байхаар шийдвэрлэжээ. Уг шийдвэр нь жилийн хамгийн идэвхтэй худалдааны үеэр олох төлөвлөгөөтэй байсан 10 сая гаруй ам.долларын борлуулалтад эрсдэл учруулж байна. Картер борлуулалтын томоохон боломжоо алдаж байгааг хүлээн зөвшөөрсөн ч хэрэглэгчдийн итгэлийг хадгалах нь орлогын зорилтоо биелүүлэхээс илүү чухал гэж тайлбарлажээ.

Спорт хувцасны зах зээлийн өсөлт саарч байна Зах зээлийн судалгааны “Circana” компанийн мэдээллээр 2025 оны аравдугаар сараас 2026 оны есдүгээр сар хүртэлх 12 сарын хугацаанд АНУ-ын эмэгтэйчүүдийн спорт хувцасны хэрэглээний зардал өмнөх оны мөн үеэс 2 хувиар өсжээ. Харин үүнээс өмнөх 12 сарын өсөлт 7 хувьтай байв. Гэсэн хэдий ч спорт хувцас АНУ-ын хувцасны нийт хэрэглээний зардлын 30 хувийг бүрдүүлсэн хэвээр байгааг “Circana”-ийн хувцасны салбарын шинжээч Кристен Класси-Зуммо онцолжээ. Түүний тайлбарласнаар хэрэглэгчид леггинс, спорт хөхний даруулга зэрэг дасгал хөдөлгөөнд зориулсан хувцаснаас илүүтэй спорт өмд, цамц зэрэг өдөр тутам болон гэртээ өмсөхөд тохиромжтой хувцсыг сонирхох болжээ.

20,000 ам.долларын өрөөс ашигтай бизнес хүртэл Линдси Картер 2018 оны тавдугаар сард “Set Active”-ийг байгуулахдаа хувийн зээлийн картуудаараа 20,000 ам.долларын өр тавьж, Лос-Анжелес дахь гэрээ бараа бүтээгдэхүүний агуулах болгон ашиглаж байжээ. Өмнө нь сошиал медиа чиглэлийн бизнес эрхэлж байсан тэрбээр дасгал хийхээс гадна ажиллах, кофе уух, өдөр тутмын ажлаа амжуулахдаа өмсөх боломжтой хослол хувцас зах зээлд дутагдаж байгааг анзаарсан байна. Тэрбээр анхны загваруудынхаа материалыг захиалан, найзуудаасаа санал авч, шаардлагатай өөрчлөлтүүдийг бүтээгдэхүүн дээрээ маркераар тэмдэглэн үйлдвэрлэгчид буцааж өгдөг байжээ. Өдгөө “Set Active” салбарын томоохон компаниудын хэмжээнд хүрээгүй ч 2025 онд 10 саяас дээш ам.доллараар хэмжигдэх цэвэр борлуулалттай, ашигтай ажилласан байна. Эдгээр үзүүлэлтийг CNBC Make It-ээс компанийн холбогдох баримт бичгүүдтэй танилцан мэдээлжээ.

Бизнесийн өсөлтийн цаана хувийн амьдралын сорилтууд байв Картер бизнесээ эхлүүлснээс хойш хоёр хүүхэд төрүүлсэн ч жирэмсний болон амаржсаны чөлөө огт аваагүй аж. Тэрбээр уг шийдвэрээ амьдралдаа гаргасан хамгийн том алдаануудын нэг гэж тодорхойлжээ. 2023 онд төрсний дараах сэтгэл гутралтай төстэй шинж тэмдэг илэрч, компанийн үйл ажиллагааг удирдахын зэрэгцээ хувийн амьдралдаа хүндрэлтэй тулгарсан тухайгаа ярьсан байна. Өмнө нь ажлын бүтэлгүйтэл бүрийн дараа нойргүй хонож, найзууддаа уйлан ярьдаг байсан тэрбээр бизнесийн саад бэрхшээлийг заавал буруу шийдвэрийн үр дагавар гэж үзэхээ больжээ. Картерын хэлснээр том зорилготой бизнес байгуулахад хүндрэл тулгарах нь зайлшгүй бөгөөд аливаа саад бэрхшээлийг хувийн аз жаргалаасаа салгаж ойлгох нь түүнд тус болсон байна. Түүний хувьд энэ удаагийн худалдааг цуцалсан шийдвэр нь орлогоо нэмэгдүүлэх боломж болон хэрэглэгчдийн өмнө хүлээсэн үүргийн аль нэгийг сонгох шаардлага тулгарсны тодорхой жишээ болжээ.