«Эрдэнэт үйлдвэр»: Шинэчилсэн ТЭЗҮ-ээр геологийн нөөц 4.6 тэрбум тонн болж, 2080 он хүртэл ашиглахаар тооцов

«Эрдэнэтийн-Овоо» зэс, молибдений порфирын ордын Техник, эдийн засгийн үндэслэл (ТЭЗҮ)-ийн тодотголоор ордын геологийн нөөц 2.9 тэрбум тонноос 4.6 тэрбум тонн болж нэмэгдсэнийг Bloomberg TV Mongolia мэдээллээ.

«Эрдэнэт үйлдвэр» ТӨҮГ-ын Ерөнхий захирал Г.Ёндон шинэчилсэн ТЭЗҮ нь үйлдвэрийн 2080 он хүртэлх хөгжлийн үндэс суурийг тодорхойлсон стратегийн чухал баримт бичиг болохыг онцолжээ. Баримт бичигт ордын нөөцийг олон улсын JORC стандартад нийцүүлж, геологи, олборлолт, боловсруулалт, дэд бүтэц, хөрөнгө оруулалт, эдийн засгийн үр ашиг, байгаль орчин болон уурхайн хаалтын асуудлыг цогцоор нь тусгасан байна.

Мөн технологийн шинэчлэлийн хүрээнд уурхайн тээврийн системийг цахилгаан эрчим хүчээр хангах шийдлийг үе шаттайгаар нэвтрүүлэхээр тусгажээ. Үүнд их даацын 40 орчим тээврийн хэрэгсэл ашиглах, 10 МВт-ын сэргээгдэх эрчим хүчний эх үүсвэр барих зэрэг төлөвлөгөө багтсан бөгөөд ингэснээр нүүрстөрөгчийн ялгарлыг 40–50 хувь, эрчим хүчний зардлыг 20–25 хувиар бууруулах боломжтой гэж тооцоолсон байна.

Энэ оны эхний есөн сарын урьдчилсан гүйцэтгэлээр «Эрдэнэт үйлдвэр» ТӨҮГ цэвэр ашгийн төлөвлөгөөгөө 170 гаруй хувиар давуулан биелүүлсэн бөгөөд оны эцэс гэхэд цэвэр ашиг нь 1.7 их наяд төгрөгт хүрэх төлөвтэй байна. Өмнө нь компанийн удирдлага ордын нөөцийг 2079 он хүртэл ашиглах боломжтой гэж мэдэгдэж байсан.