Улаанбаатар хотын метро төслийг хэрэгжүүлэх өртөг ₮10 их наядыг давж магадгүй

Улаанбаатар хотын метро төслийг одоогийн нөхцөлд үргэлжлүүлэхэд хүндрэлтэй болсон талаар хотын дарга Нийслэлийн Иргэдийн Төлөөлөгчдийн Хурал дахь Ардчилсан намын бүлгийн хуралд оролцох үеэрээ мэдэгдсэн байна. Тэрбээр төслийн санхүүжилтийн бүтэц, нарийвчилсан зураг төсөл болон шаардлагатай баталгаанууд бүрдээгүй байхад барилгын ажлын тендер зарласан гэж тайлбарлажээ.

Хотын даргын мэдээлснээр метро төсөлд өнөөдрийн байдлаар 59 тэрбум төгрөг зарцуулсан бөгөөд БНСУ-ын “Dohwa Engineering” компанитай 156 тэрбум төгрөгийн зөвлөх үйлчилгээний гэрээ байгуулсан байна. Тус компани ажлын гүйцэтгэлд үндэслэн төлбөр авдаг бөгөөд нэмэлтээр хоёр тэрбум төгрөгийн нэхэмжлэл ирүүлжээ.

Метро төслийн нийт зардал 10 их наяд төгрөг давж болзошгүй Нийслэлийн удирдлагын танилцуулснаар метро барих тендерийн суурь өртөг 8.3 их наяд төгрөгөөр тооцогдсон ч уг дүнд санхүүжилтийн зардал, валютын ханшийн зөрүү, зээлийн хүүгийн тооцоолол тусгагдаагүй байна.

Эдгээрийг нэмж тооцвол төслийн нийт өртөг 10 их наяд төгрөг давж болзошгүй гэж хотын дарга үзэж байгаа юм.

Тэрбээр 1.8 сая хүн амтай Улаанбаатар хотод ийм хэмжээний хөрөнгө оруулалтаар метро барьсан тохиолдолд зардлаа хэдэн жилийн хугацаанд нөхөх нь тодорхойгүй байгааг онцолжээ. Мөн БНХАУ-ын Хөх хотын метроны ашиглалтын талаар өөрийн ажиглалтыг дурдсан байна.

Нийслэл 2027 онд нийтийн тээврийн өөр хувилбаруудыг хэрэгжүүлэхээр төлөвлөжээ Нийслэлийн удирдлага метро төслийг эргэн харахын зэрэгцээ харьцангуй бага хөрөнгөөр, богино хугацаанд түгжрэлийг бууруулах боломжтой тээврийн шийдлүүдийг судалж байна.

Хотын даргын танилцуулснаар 2027 онд Зунжин–32-ын тойрог, Архивын ерөнхий газар–120 мянгат болон Энхтайвны өргөн чөлөө гэсэн гурван чиглэлд их багтаамжийн нийтийн тээврийн үйлчилгээ нэвтрүүлэхээр төлөвлөжээ.

Түүнчлэн зуслангийн бүс болон Сэлбэ хотын чиглэлд “Sky Shuttle” төслийг хэрэгжүүлэх, Яармагийн замд “Sky Shuttle” болон тусгай зам шаардахгүй ART төрлийн тээврийн хэрэгсэл ашиглах хувилбарыг танилцуулсан байна. Эдгээр төслийн санхүүжилтийг улсын төсвөөс бус, хөрөнгө оруулалтын бусад эх үүсвэрээс бүрдүүлэх боломжийг эрэлхийлэхээр болжээ.

Ойрын хугацаанд хэрэгжих боломжгүй төслийн нэгжүүдийг татан буулгана Нийслэлийн удирдлага томоохон дэд бүтцийн төслүүдийн бэлтгэл ажил, санхүүжилт, хэрэгжих боломжийг дахин үнэлэхээр төлөвлөж байна.

Тухайлбал, нэгдүгээр болон хоёрдугаар тойрог замын төслийн техник, эдийн засгийн үндэслэл боловсруулагдсан боловч нарийвчилсан зураг төсөл, байгаль орчны үнэлгээ, газар чөлөөлөлтийн ажил хийгдээгүй байгааг хотын дарга дурджээ. Иймээс ойрын хугацаанд хэрэгжих боломжгүй төслийн нэгжүүдийг татан буулгахаар төлөвлөсөн байна.

Харин Сэлбэ дэд төвийн төслийг үргэлжлүүлэх шаардлагатай гэж үзжээ. Уг төслийн хүрээнд 157 га талбайг чөлөөлөхөд 470 тэрбум төгрөг зарцуулсан талаар хотын дарга мэдээлсэн байна.

Нийслэлийн удирдлагын энэхүү байр суурь нь метро төслийг албан ёсоор цуцалсан шийдвэр биш бөгөөд төслийн санхүүжилт, эдийн засгийн үр ашгийг дахин үнэлэх шаардлагатай гэж үзэж буйг илэрхийлж байна.