“Эрдэнэс Тавантолгой” ХК БНХАУ-ын “Норинко” компанитай дэд бүтэц, түлшний хангамжийн чиглэлээр хамтран ажиллана

“Эрдэнэс Тавантолгой” ХК болон БНХАУ-ын “Норинко” компани дэд бүтэц, үйлдвэрлэл, тээвэр логистик, түлшний хангамжийн чиглэлээр хамтын ажиллагааг хөгжүүлэх санамж бичигт гарын үсэг зурлаа.

Санамж бичгийн хүрээнд “Норинко” компани “Эрдэнэс Тавантолгой” ХК болон түүний гэрээт компаниудын дизель түлшний хангамжийн найдвартай байдлыг хангах чиглэлээр хамтран ажиллахаар тусгажээ.

Түүнчлэн талууд байгаль орчинд ээлтэй, эрчим хүчний хэмнэлттэй технологийн шийдэл нэвтрүүлэх, орон нутгийн хөгжлийг дэмжих чиглэлээр хамтын ажиллагаагаа өргөжүүлэхээр тохиролцсон байна.

Хамтын ажиллагааны хүрээнд оюутан, залуусыг сургах, мэргэжлийн боловсон хүчин бэлтгэх боломжийг бүрдүүлэхээр тусгасан нь санамж бичгийн бас нэг чиглэл болжээ.

Санамж бичигт гарын үсэг зурсан нь дээрх чиглэлүүдээр хамтран ажиллах суурь болж байгаа бөгөөд тодорхой төслүүдийн хөрөнгө оруулалтын хэмжээ, хэрэгжүүлэх хугацаа болон түлш нийлүүлэх нөхцөл одоогоор тодорхойгүй байна.