Баян-Өлгий, Ховдын нутгаар их цас орж, цасан шуурга шуурахыг анхаарууллаа

Арваннэгдүгээр сарын 12-нд баруун аймгуудын нутгаар цаг агаарын нөхцөл муудаж, Баян-Өлгий аймгийн нутаг, Ховд аймгийн хойд хэсгээр их цас орох төлөвтэй байна.

Өдрийн 08:00–20:00 цагийн урьдчилсан мэдээгээр Баян-Өлгий, Ховд аймгийн ихэнх нутаг, Увс аймгийн өмнөд хэсэг, Завхан аймгийн баруун сумдаар 0.2–9.0 мм нойтон цас, цас орж, цасан шуурга шуурах төлөвтэй. Баруун аймгуудын нутгийн баруун хэсгээр салхи баруун өмнөөс баруун хойш эргэж, Алтайн уулархаг нутгаар секундэд 12–14 метр хүрч ширүүснэ.

Цас, цасан шуурганы улмаас зам, даваа, гүвээнд үзэгдэх орчин хязгаарлагдаж, халтиргаа гулгаа үүсэх эрсдэлтэй байна. Иймд баруун аймгуудын нутгаар зорчих иргэд, тээвэрчид замын нөхцөл байдлыг харгалзан хөдөлгөөнд оролцох шаардлагатай.

Агаарын температур Завхан, Заг-Байдраг голын эхээр -2...-7 градус, Дархадын хотгор, Монгол-Алтайн уулархаг нутаг, Идэр, Тэс голын хөндийгөөр -2...+3 градус байна. Харин говийн бүс нутгийн өмнөд хэсгээр +10...+15 градус, бусад нутгаар +4...+9 градус дулаан байх төлөвтэй.

Улаанбаатар хотод арваннэгдүгээр сарын 12-нд үүл багасаж, цас орохгүй. Салхи баруунаас секундэд 3–8 метр, өдөртөө агаарын температур +6...+8 градус дулаан байна.