Ихэнх нутгаар цаг агаар тогтуун, өдөртөө дулаарах төлөвтэй байна

2026 оны арваннэгдүгээр сарын 10-ны өдөр Монгол орны ихэнх нутгаар цаг агаар тогтуун, өдөртөө дулаарах төлөвтэй байгааг Цаг уур, орчны шинжилгээний газраас мэдээллээ.

Арваннэгдүгээр сарын 8-11-ний өдрүүдэд ихэнх нутгаар өдөртөө дулаарч, хур тунадас орохгүй байх төлөвтэй байна. Салхи ихэнх нутгаар секундэд 5-10 метрийн хурдтай салхилна.

Энэ хугацаанд Дархадын хотгор, Алтай, Хангай, Хөвсгөл, Хэнтийн уулархаг нутаг, Завхан, Заг-Байдраг, Идэр, Тэс голын хөндийгөөр өдөртөө -3...+2 градус, говийн бүс нутгийн өмнөд хэсгээр +10...+15 градус, бусад нутгаар +4...+9 градус дулаан байх төлөвтэй байна.

Улаанбаатар хот орчмоор арваннэгдүгээр сарын 10-нд багавтар үүлтэй, цас орохгүй. Шөнөдөө -7 градус хүйтэн, өдөртөө +10 градус дулаан байна. Салхины хурд шөнөдөө секундэд 4 метр, өдөртөө секундэд 7 метр орчим байх төлөвтэй байна.

Харин арваннэгдүгээр сарын 12-ноос нутгийн баруун хэсгээр, 13-наас нутгийн хойд хэсгээр цас орж, цасан шуурга шуурах төлөвтэй байгаа тул иргэд, тээвэрчдийг цаг агаарын өөрчлөлтөд анхаарал хандуулахыг зөвлөж байна.