Монгол Улсын эдийн засаг бодит өсөлт 7.3%-аар өсч, ДНБ ₮78.4 их наядад хүрлээ
Монгол Улсын дотоодын нийт бүтээгдэхүүн 2026 оны эхний есөн сард 78.4 их наяд төгрөгт хүрч, өмнөх оны мөн үеэс 30.4 хувиар нэмэгджээ.

Үндэсний статистикийн хорооноос мягмар гарагт танилцуулсан урьдчилсан гүйцэтгэлээр Монгол Улсын дотоодын нийт бүтээгдэхүүн 2026 оны эхний есөн сард 78.4 их наяд төгрөгт хүрч, өмнөх оны мөн үеэс 30.4 хувиар нэмэгджээ. Харин үнийн өөрчлөлтийг арилган тооцсон эдийн засгийн бодит өсөлт 7.3 хувьтай гарч, өмнөх оны мөн үеэс 1.4 нэгж хувиар өслөө.
Эдийн засгийн өсөлтөд уул уурхайн салбар голлох нөлөө үзүүлжээ. Тус салбарын бодит нэмэгдэл өртөг өмнөх оны мөн үеэс 25.4 хувиар өсч, нийт эдийн засгийн өсөлтийн 3.4 нэгж хувийг бүрдүүлсэн байна. Мөн хөдөө аж ахуйн салбар 11.8 хувиар ахиж, үйлчилгээний салбар 3.3 хувиар нэмэгдсэн бол үйлдвэрлэл, барилгын салбар 3.5 хувийн өсөлт үзүүлжээ.
Харин эдийн засгийн өсөлт өрхийн хэрэглээнд төдийлөн туссангүй. Үнийн өөрчлөлтийг тооцсон өрхийн эцсийн хэрэглээ өмнөх оны мөн үеэс 2.0 хувиар буурч, 18.4 их наяд төгрөг болсон байна. Түүнчлэн хөрөнгийн нийт хуримтлал 6.9 хувиар буурчээ.
Нөгөө талаас бараа, үйлчилгээний бодит экспорт 36.8 хувиар өссөн бол импорт 11.6 хувиар нэмэгдсэн байна. Үүний үр дүнд цэвэр экспорт эдийн засгийн өсөлтөд 12.3 нэгж хувийн эерэг нөлөө үзүүлжээ.
Ийнхүү 2026 оны эхний есөн сарын эдийн засгийн өсөлтийг уул уурхай болон экспорт голлон дэмжсэн ч өрхийн хэрэглээ, хөрөнгийн хуримтлал буурсан нь өсөлтийн бүтэц харилцан адилгүй байгааг харуулж байна.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ





