“ЛэндМН ББСБ” ХК Европын сэргээн босголт, хөгжлийн банктай 10 сая ам.долларын санхүүжилтийн гэрээг үзэглэлээ
Дижитал санхүүгийн үйлчилгээ үзүүлэгч “ЛэндМН ББСБ” ХК Европын сэргээн босголт, хөгжлийн банктай 10 сая ам.долларын санхүүжилтийн гэрээ байгууллаа.

Технологид суурилсан дижитал санхүүгийн үйлчилгээ үзүүлэгч “ЛэндМН ББСБ” ХК Европын сэргээн босголт, хөгжлийн банктай 10 сая ам.долларын санхүүжилтийн гэрээг үзэглэлээ. Талууд “ЛэндМН” компанийн 10 жилийн ойн хүрээнд зохион байгуулсан “Reshaping MSME Finance Through Fintech” арга хэмжээний үеэр хамтын ажиллагааны гэрээнд гарын үсэг зурсан байна.
Энэхүү санхүүжилтээр тус компани 34 хүртэлх насны бизнес эрхлэгчдэд зориулсан “FlexiBusiness Youth” зээлийн бүтээгдэхүүнийг зах зээлд гаргажээ. Шинэ бүтээгдэхүүний хүрээнд зээлдэгчид 1.99 хувийн хүүтэй, барьцаа хөрөнгө шаардахгүй, бүрэн дижитал хэлбэрээр зээл авах боломж бүрдээд буй. Мөн зээлдэгч төлбөрөө хугацаанд нь төлөх бүрд зээлийн түвшин ахиж, зээлийн эрхийн хэмжээ нэмэгдэх нөхцөлтэй аж.
Олон улсын хөгжлийн банкууд залуучуудын бизнесийг дэмжих хөтөлбөрийн санхүүжилтийг ихэвчлэн арилжааны банкуудаар дамжуулан олгодог жишигтэй. Харин ББСБ-аар дамжуулан олгож буй энэхүү санхүүжилт нь бичил, жижиг, дунд бизнес эрхлэгчдэд тавигдах барьцаа хөрөнгийн шаардлагыг зөөлрүүлж, санхүүжилтийн хүртээмжийг тэлэх зорилготой ажээ.
“ЛэндМН ББСБ” ХК 2024 оноос хойш “FlexiBusiness” бүтээгдэхүүнээрээ дамжуулан 30,000 гаруй БЖДБ эрхлэгчид зээл олгосон байна.
Арга хэмжээний үеэр “ЛэндМН ББСБ” ХК-ийн гүйцэтгэх захирал Ц.Ууганбаяр “Бичил, жижиг, дунд бизнесийн санхүүжилтийн ирээдүйг шинэчлэн тодорхойлох нь” сэдвээр илтгэл тавижээ.
Харин “Reshaping MSME Finance Through Fintech” хэлэлцүүлэгт ЕСБХБ-ын Монгол дахь суурин төлөөлөгч Жахонгир Шамсиев, Монголын ББСБ-уудын холбооны ерөнхийлөгч С.Мөнхзул, “АНД Глобал” компанийн гүйцэтгэх захирал Б.Хос-Эрдэнэ нар оролцож, технологийн шийдлээр санхүүжилтийн хүртээмжийг нэмэгдүүлэх боломж, зохицуулалтын орчны талаар санал солилцсон байна.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ





