"Meta" өсвөр насныханд сэтгэл зүйн хохирол учруулсан гэх нотлох баримтаа нуусан байж магадгүй
“Meta” компанийг өсвөр үеийнхний сэтгэцийн эрүүл мэндтэй холбоотой шүүхийн маргаанд чухал нотлох баримтыг зориудаар нуун дарагдуулсан гэж нэхэмжлэгчдийн өмгөөлөгчид буруутгажээ.

АНУ-д өсвөр үеийнхний сэтгэл зүйд хохирол учруулсан гэх үндэслэлээр “Meta” компанийг шүүхэд өгсөн иргэд болон өмгөөлөгчид тус компанийг чухал нотлох баримт бичгийг нуун дарагдуулсан хэмээн буруутгаж, шүүхээс хариуцлагын арга хэмжээ авахыг хүслээ.
“Reuters” агентлагийн мэдээлснээр, “Meta” компани олон мянган баримт бичгийг өмгөөлөгч, үйлчлүүлэгчийн хоорондын нууцлалд үндэслэлгүйгээр хамааруулж, шүүхэд гаргаж өгөхөөс татгалзсан байна. Мөн нэхэмжлэгчдийн сэжиглэж буйгаар компанийн хуульчид нотлох баримтыг бүрдүүлэхэд зориудаар нөлөөлсөн хэмээн буруутгажээ.
Шүүхийн шаардлагаар “Meta” компани нууцалсан баримтуудаа дахин шалгаж эхлээд буй бөгөөд долоо хоногт 20,000 баримт бичиг хянаж байгаа аж. Нэхэмжлэгчдийн мэдээлснээр одоогоор дахин шалгасан баримтуудын 93 орчим хувийг өмнө нь үндэслэлгүйгээр халхалсан эсвэл өгөхөөс татгалзсан байв.
Улмаар нэхэмжлэгчид шүүхийн тогтоосон хугацаанаас жил хагас гаруйн дараа хэдэн арван мянган шинэ баримт хүлээн авсан байна. Үүгээрээ нэхэмжлэгч тал ирэх хоёрдугаар сарын шүүх хуралдаанаар шүүгчдэд компанийн "булхайг дэлгэж", “Meta"-ийн зүгээс ирэх эсэргүүцлийг эдгээр бичиг баримтаар няцаахыг зорьж байгаа юм.
Одоогоор АНУ-ын холбооны шүүхэд “Meta” болон бусад нийгмийн сүлжээний компаниудтай холбоотой 4,300 орчим хэрэг бүртгэгдээд буй. Нэхэмжлэгчид эдгээр платформыг өсвөр үеийнхнийг донтуулах байдлаар бүтээж, сэтгэл гутрал, түгшүүр зэрэг асуудалд нөлөөлсөн гэж буруутгаж байгаа юм.
Харин “Meta” компани дээрх буруутгалыг няцааж, баримт бичгийг нууцалсан нь хууль ёсны үндэслэлтэй байсан хэмээн мэдэгджээ. Тус компани баримтуудыг дахин шалгах ажиллагаагаа оны эцэс гэхэд дуусгах үүрэгтэй байна.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ





