“E.l.f. Beauty” яагаад гоо сайхнаас гадна хөгжмийн зах зээлд "урвах" болов?

Гоо сайхны компани яагаад цомог гаргах болов?

“E.l.f. Beauty”-ийн хувьд хариулт нь хөгжим зарахаас илүү хэрэглэгчийн анхаарлыг татаж, тэрхүү анхаарлыг бүтээгдэхүүний эрэлт болгон хувиргах зорилготой нь холбоотой.

Тус компани өнгөрсөн сард долоон уран бүтээлчийн дуунаас бүрдсэн “Mirror Mix” оригинал цомгоо танилцуулсан бөгөөд цомгийг “Spotify”, “Apple Music”, “Amazon”, “Roblox”-оор сонсох боломж бүрдүүлээд зогсохгүй оролцогчдын дунд WNBA-ийн тоглогч, “Грэмми”-гийн шагналт дуучин, дуу зохиогч багтжээ.

Ингэснээр “E.l.f. Beauty” уламжлалт сурталчилгааны талбараас гарч, хэрэглэгчдийн хөгжим сонсдог, видео үздэг, тоглодог орчинд брэндээ байршуулах стратегиа өргөжүүлж байна.

Маркетинг кампанит ажлаас бүтээгдэхүүн болж хувирав

“Mirror Mix” бол “E.l.f. Beauty”-ийн хөгжмийн анхны туршилт биш.

Тус компани 2024 онд “Get Ready With Music, The Album” цомгийг гаргасан бол 2019 онд цацсан “eyes.lips.face.” дуу нь цахим орчинд өргөн тархаж, брэндийг танигдахад нь нөлөөлжээ.

Үүнээс хойш “E.l.f. Beauty” “TikTok”-т реалити шоу бүтээж, “Twitch”-д суваг нээн, шууд худалдааг туршсан. Ийнхүү контент шинэ бүтээгдэхүүн гарах үед ашигладаг түр зуурын сурталчилгаа бус, хэрэглэгчтэй тогтмол харилцаж, эрэлтийг хадгалах бизнесийн хэрэгсэл болж хувирчээ.

Тоон үзүүлэлт ч стратегийн цар хүрээг харуулж байна

Тус компанийн мэдээлснээр, хэрэглэгчдээс ямар нэгэн сануулгагүйгээр гоо сайхны брэнд гэж нэрлүүлэхэд “E.l.f. Beauty”-г дурддаг үзүүлэлт сүүлийн таван жилд 13 хувиас 45 хувь болж өсөв. Хамгийн сүүлд тайлагнасан улиралд ашиг нь хоёр дахин нэмэгдэж, 30 улирал дараалан өсөлтөө хадгалсан байна.

“E.l.f. Beauty” санхүүгийн жилийн эхний улиралд цэвэр борлуулалтынхаа 20-оос дээш хувийг маркетинг болон дижитал сувгуудад дахин хөрөнгө оруулсан байна.

50 сая ам.долларыг дахин өсөлтөд зарцуулна

Маркетингийн төсвөө өсгөхөд тарифын буцаан олголт ч нэмэлт эх үүсвэр болж байна. АНУ-ын Дээд шүүх Ерөнхийлөгч Дональд Трампын “liberation day” тарифуудыг хүчингүй болгосны дараа “E.l.f. Beauty” зургаадугаар сарын 30-наар дууссан гурван сарын хугацаанд 50 сая ам.долларын буцаан олголт авчээ.

“E.l.f. Beauty”-ийн гүйцэтгэх захирал Таранг Амин CNBC-д өгсөн ярилцлагадаа уг мөнгийг компанийн брэндүүдийн маркетинг, бүтээгдэхүүний үнэ болон хэрэглэгчдэд санал болгож буй үнэ цэнд бүрэн хөрөнгө оруулна гэж мэдэгдсэн.

Т.Амин компанийн стратегийг бүр ч товч тодорхойлсон юм. Түүний хэлснээр, “E.l.f. Beauty” бол “Гоо сайхны бүтээгдэхүүн зардаг энтертайнмент компани” аж.

Уг тодорхойлолт нь “Mirror Mix”-ийг яагаад ердийн хөгжмийн төсөл гэж харахад учир дутагдалтайг тайлбарлана. “E.l.f. Beauty” контентод зарцуулсан хөрөнгийг брэндийн танигдалт, хэрэглэгчийн оролцоо, улмаар бүтээгдэхүүний эрэлтийг дэмжих хөрөнгө оруулалт гэж үзэж байна.

Лангуун дээрх өрсөлдөөн дэлгэц, чихэвч рүү шилжив

Энтертайнментын бизнес рүү ойртож буй хэрэглээний брэнд ганц “E.l.f. Beauty” биш.

Хувцас загварын “Gap” компани “Just Your Type” буюу JYT хамтлагтай олон жилийн түншлэл байгуулж, баримтат цуврал, худалдааны төвүүдээр хийх аялан тоглолт болон хувцасны коллекц хөгжүүлэхээр төлөвлөжээ.

Түргэн хоолны “Wendy’s” хүртэл “"Вендигийн зогсоолд сонсох дуунууд” нэртэй эмо цомог гаргасан байна.

Ийнхүү хэрэглээний брэндүүдийн өрсөлдөөн дэлгүүрийн лангуу, телевизийн реклам эсвэл сошиал медиа сурталчилгаагаар хязгаарлагдахаа больж, хэрэглэгч хаана цаг зарцуулж байна, брэндүүд тэр орчинд контенттойгоо очихыг зорьж эхэлжээ.

Т.Амины тайлбарласнаар, шинэ бүтээгдэхүүн сонирхлыг үргэлжлүүлэн дэмжиж, эрэлтийг тогтвортой хадгалж чадсан үед маркетинг хамгийн үр дүнтэй ажилладаг.

Тиймээс “Mirror Mix” нь нэг цомгийн тухай түүхээс илүү өргөн утгатай. Гоо сайхны брэндүүдийн дараагийн өрсөлдөгч нь заавал өөр нэг төрлийн уруулын будаг байх албагүй. Харин хэрэглэгчийн дэлгэц дээрх дараагийн видео, чихэвчин дэх дараагийн дуу, тоглоомд өнгөрүүлэх дараагийн хором ч байж болохоор төрөлжиж байна.