"OpenAI" компани "GPT-6 Sol", "Luna" загваруудаа танилцуулж, API ашиглалтын үнийг буурууллаа
"GPT-6 Sol" нь код бичих болон агентын төвөгтэй ажлын урсгалд, "Luna" нь их хэмжээний давтагдах даалгаврыг бага зардлаар боловсруулахад чиглэж байна.

“OpenAI” компани "GPT-6", гэр бүлийн "GPT-6 Sol" болон "GPT-6 Luna" загваруудыг танилцуулж, хэрэглээний программ хангамжийн интерфейс (API) ашиглалтын үнийг өмнөх үеийнхээс мэдэгдэхүйц бууруулахаар болжээ. Шинэ загваруудыг есдүгээр сарын 22-ноос API-д ашиглах боломж бүрдсэн бөгөөд компани тооцооллын үр ашгийг сайжруулснаар өртгийн бууралтыг хэрэглэгчдэд шилжүүлж буйгаа мэдэгдэв.
"GPT-6 Sol"-ийн стандарт API тариф нэг сая оролтын токенд 2 ам.доллар, гаралтын токенд 10 ам.доллар болжээ. "GPT-5.6 Sol"-ийн урамшууллын үнэ оролтод 4 ам.доллар, гаралтад 20 ам.доллар байсан тул тариф хоёр дахин буурсан байна.
Харин "GPT-6 Luna"-ийн нэг сая оролтын токены үнэ 0.10 ам.доллар, гаралтын токен 0.50 ам.доллар байх юм. "GPT-5.6 Luna"-ийн өмнөх тариф оролтод 0.20 ам.доллар, гаралтад 1.20 ам.доллар байжээ.
Төвөгтэй ажилд "Sol", их хэмжээний хэрэглээнд "Luna"
“OpenAI” "GPT-6 Sol"-ийг код боловсруулах, олон шаттай агентын ажлын урсгал зэрэг илүү төвөгтэй даалгаварт зориулжээ. Тус загвар нь "GPT-6" гэр бүлийн хамгийн өндөр түвшний "Astra"-гаас доогуур байрлах боловч үнэ болон чадварын тэнцвэрийг чухалчилсан хэрэглээнд чиглэж байна.
"GPT-6 Luna" нь их хэмжээний, тодорхой хүрээтэй ажлыг бага зардлаар боловсруулахад зориулагдсан. Нэг сая токены оролтын үнэ ердөө 0.10 ам.доллар байгаа нь баримт бичиг боловсруулах, мэдээлэл ангилах болон давтамж өндөртэй бусад ажлыг масштабаар ажиллуулдаг байгууллагуудад зардлаа бууруулах сонголт болж байна.
Ийнхүү нэг загвараар бүх төрлийн хэрэгцээг хангахын оронд төвөгтэй даалгавар, хурд болон зардлаас хамааран өөр түвшний загвар сонгох бүтэц улам тодорхой болж байна.
"Anthropic" өртгөө бууруулав
Хиймэл оюуны “Anthropic” компани есдүгээр сарын 22-нд "Claude Opus 5.5" загвараа танилцуулсан. Компанийн туршилтаар шинэ загвар нь ердийн ажлын ачаалалд "Opus 5"-аас ойролцоогоор 40 хувиар бага өртгөөр ажиллах боломжтой.
"Claude Opus 5.5"-ын нэг сая оролтын токены үнэ 4 ам.доллар, гаралтын токен 20 ам.доллар болсон нь "Opus 5"-аас тус бүр 20 хувиар бага байгаа юм. “Anthropic”-ийн мэдээлснээр "Opus 5.5" нэг ажлыг гүйцэтгэхдээ цөөн токен ашигладаг тул бодит ажлын нийт өртөг токены тарифаас илүү хэмжээгээр буурах боломжтой.
Шинэ загваруудын танилцуулгаас харахад хиймэл оюуны зах зээл дэх өрсөлдөөн зөвхөн хамгийн өндөр чадвартай загвар бүтээхээс гадна тухайн чадварыг ямар зардлаар ашиглуулах вэ гэсэн чиглэлд өргөжиж байна. API хэрэглээ өндөр байгууллагуудын хувьд загварын чанар, хурд, токены хэрэглээ болон нэг даалгаварт ногдох нийт өртгийг хамтад нь тооцох шаардлага улам чухал болж байна.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ





