Сингапур автобусанд зүй бус үйлдэл гаргасан зорчигчдыг торгодог болжээ

Сингапур нийтийн автобус болон автобусны солилцооны буудал, терминал дахь зорчигчдын зохисгүй үйлдлийг албан ёсны зөрчилд тооцох шинэ журмыг есдүгээр сарын 23-наас мөрдөж эхэллээ. Газрын тээврийн газар буюу “LTA”-ийн мэдээлснээр зохицуулалтын зорилго нь нийтийн тээврээр зорчих орчныг илүү аюулгүй, бусдад хүндэтгэлтэй, тав тухтай болгоход чиглэжээ.

Шинэ журмаар бусад зорчигчид төвөг учруулах хэмжээнд чанга хөгжим, видео болон бусад аудио тоглуулах, суудал дээр хөлөө тавих, хог хаях, автобусанд идэж уух зэрэг үйлдэлд 500 сингапур доллар хүртэл торгууль ногдуулах боломжтой болов.

Харин автобусны солилцооны буудал, терминалд бусдын хөдөлгөөнд саад учруулах, аюултай нөхцөл үүсгэх, нийтийн автобус болон буудал, терминалын аль нэг хэсгийг бохирдуулах зэрэг илүү ноцтой зөрчилд торгуулийн дээд хэмжээ 5,000 сингапур доллар байна. Торгуулийн хэмжээ нь Сингапурын метро, галт тэрэгний сүлжээнд мөрдөж буй зохицуулалттай ижил түвшинд тогтоогджээ.

Шинэ зохицуулалтын хүрээнд нийтийн автобусны операторуудын эрх бүхий ажилтнууд, тухайлбал тасалбар шалгагч болон автобусны солилцооны буудлын ажилтнууд зөрчил гаргасан гэж үзсэн зорчигчид зөрчлийн захиргааны мэдэгдэл өгөх эрхтэй. Үүний дараа “LTA” тухайн тохиолдлыг шалгана.

Харин автобусны жолоочид зөрчлийн мэдэгдэл гаргах эрхгүй. “LTA” жолоочийн үндсэн үүрэг нь автобусыг аюулгүй жолоодоход төвлөрөх ёстой гэж тайлбарлав. Гэхдээ жолооч зохисгүй үйлдлээ зогсоохыг зорчигчоос шаардах эрхтэй хэвээр байна. Шаардлагыг биелүүлэхгүй бол зорчигчийг автобуснаас буулгах боломжтой бөгөөд ноцтой тохиолдолд автобусны удирдлагын төв болон цагдаагаас тусламж хүсэж болно.

Сингапур зорчигчдын ийм төрлийн үйлдлийг хязгаарлах ажлаа өмнө нь эхлүүлсэн. 2024 оны арванхоёрдугаар сараас нийтийн тээвэрт дуу чимээг багасгах, нэгээс олон суудал эзлэхгүй байх зэрэг зорчих соёлыг сануулсан тэмдэглэгээ байршуулж, 2025 оны гуравдугаар сараас автобусанд мөрдөх зорчигчийн зан үйлийн дүрмийг нэвтрүүлжээ. Шинээр хүчин төгөлдөр болсон зохицуулалт нь өмнө нь операторын дүрмээр зохицуулж байсан зарим үйлдлийг хууль зүйн хариуцлагатай зөрчил болгон тодорхойлж буйгаараа ялгаатай.

“LTA” нийтийн тээврийг хамтын орон зай гэж тодорхойлоод, зорчигч бүр бусдад хүндэтгэлтэй, таатай орчин бүрдүүлэхэд үүрэгтэйг онцолжээ. Үүний зэрэгцээ биеийн болон сэтгэцийн эрүүл мэндийн онцлогтой зорчигчтой холбоотой тохиолдлуудад нөхцөл байдлыг харгалзан уян хатан, шударга байдлаар арга хэмжээ авна гэж мэдэгдсэн байна.