"Amazon" жижиглэн худалдааны нэгжээсээ мянга хүрэхгүй ажилтан цомхотгожээ

АНУ-ын цахим худалдаа, технологийн “Amazon” компани үндсэн цахим худалдааны вэбсайтаа хариуцдаг “Stores” нэгжийнхээ зарим ажлын байрыг цомхотгосноо лхагва гарагт мэдэгдлээ.

Цомхотголд 1,000 хүрэхгүй оффисын ажилтан хамрагдсан хэмээн ойрын эх сурвалж “Reuters” агентлагт мэдээлжээ. “Amazon”-ийн төлөөлөгч энэ талаар "Бид тэргүүлэх зорилтуудаа илүү үр дүнтэй хэрэгжүүлэх боломж бүрдэнэ гэж үзэн ‘Stores’ бизнесийнхээ зарим хэсгийн бүтцийг өөрчилсөн” гэдгийг онцолсон байна.

Компанийн дотоод “Slack” сувгуудад нийтлэгдсэн мэдээллээс үзэхэд хэрэглэгчийн үйлчилгээ, борлуулагч түншүүдэд үйлчилгээ үзүүлдэг баг зэрэг “Stores”-ийн хэд хэдэн нэгжийг цомхотгосон байна. Мөн АНУ, Энэтхэг, Их Британийн салбар нэгжүүдэд ажилладаг зарим ажилтанд ажлаас чөлөөлөх мэдэгдэл хүргүүлжээ.

Томоохон цомхотголын дараах бүтцийн өөрчлөлт

Энэхүү шийдвэр нь “Amazon”-ийн өнгөрсөн оноос хэрэгжүүлж эхэлсэн 30,000 ажлын байрны цомхотголын дараа хийж буй хэд хэдэн жижиг бүтцийн өөрчлөлтийн нэг боллоо. Тухайн томоохон цомхотгол энэ оны нэгдүгээр сар хүртэл үргэлжилсэн байна.

“Amazon”-ийг үүсгэн байгуулагч, ТУЗ-ийн дарга Жефф Безос лхагва гарагт цацагдсан “Fox News”-ийн ярилцлагын үеэр цар тахлын жилүүдэд компани ажиллах хүчээ хэт хурдтай нэмэгдүүлсэн нь сүүлийн үеийн цомхотгол хийх нэг шалтгаан болсон гэж тайлбарлав.

Цар тахлын үед хүмүүс гэрээсээ худалдан авалт хийх нь эрс нэмэгдэж, “Amazon”-ийн үйл ажиллагаа богино хугацаанд тэлсэн ажээ. Безос энэ талаар “Бид ажиллах хүчнийхээ тоог үнэхээр их нэмэгдүүлсэн” гэж хэлсэн байна.

Цомхотгол “Amazon”-ийн жил бүр уламжлал болгон зохион байгуулдаг томоохон худалдааны арга хэмжээний нэг болох “Prime Big Deal Days”-тай давхцаж байна. Хямдралын арга хэмжээ мягмар гарагт эхэлж, лхагва гараг хүртэл үргэлжилжээ.