АНУ-ын инфляц таамгаас доогуур гарснаар энэ сард бодлогын хүү өсөх хүлээлт буурлаа

АНУ-ын инфляц наймдугаар сард эдийн засагчдын төсөөлж байснаас доогуур өсөлттэй гарч, өмнөх сарын үзүүлэлтүүд ч буурч шинэчлэгдсэнээр Холбооны нөөцийн банк аравдугаар сард бодлогын хүүгээ дахин нэмэгдүүлэх шаардлага багасч магадгүй байна. Гэсэн хэдий ч баярын улирлын хэрэглээ огцом нэмэгдэж, эдийн засгийн эрэлт тогтвортой байгаа тул оны эцэс гэхэд бодлогын хүү дахин өсөх магадлал өндөр хэвээр байна.

АНУ-ын Худалдааны яамны Эдийн засгийн шинжилгээний хорооны мэдээллээр хэрэглээний инфляц наймдугаар сард 3.4 хувьд хүрч, өмнөх сараас 0.3 хувиар өсчээ. "Reuters"-ийн санал асуулгад оролцсон эдийн засагчид 0.4 хувийн өсөлт хүлээж байжээ. Мөн долдугаар сарын өсөлтийг өмнө мэдээлсэн 0.2 хувиас бууруулж, 0.1 хувь болгон шинэчилсэн байна.

Харин хүнс, эрчим хүчний үнийг хасч тооцсон суурь инфляц 3.0 хувийн түвшинд хүрч, сарын дүнгээр хувиар өссөн байна. Холбооны нөөцийн банк инфляцын хоёр хувийн зорилтоо үнэлэхдээ суурь инфляцын тоон үзүүлэлтийг гол хэмжүүрүүдийн нэг болгон ашигладаг.

Инфляц 3.4 хувьтай гарахад бензиний үнэ 4.4 хувиар нэмэгдсэн нь голлон нөлөөлсөн бол хүнсний үнэ өөрчлөлтгүй хэвээр хадгалагджээ. Харин суурь инфляцад тээврийн үйлчилгээ, ресторан, баар болон зочид буудлын үйлчилгээний зардлын өсөлт нөлөөлжээ.

Мөн Эдийн засгийн шинжилгээний хороо инфляцыг бүрдүүлж буй зарим үйлчилгээний үнийг тооцох аргачлалаа шинэчилж, 2021 оноос хойших мэдээллийг засварласан байна. Үүний үр дүнд инфляц долдугаар сард 3.7 хувьтай гарсныг 3.4 хувь болгон шинэчилсэн бол суурь инфляцыг 3.3 хувиас бууруулан 3.0 хувьд хүргэжээ.

“BMO Capital Markets”-ийн ахлах эдийн засагч Сал Гуатьеригийн үзэж буйгаар наймдугаар сарын үнийн өсөлт төсөөлж байснаас зөөлөн гарсан нь Холбооны нөөцийн банкинд нэмэлт мэдээлэл хүлээж, аравдугаар сарын хурлаар хүүгээ хэвээр үлдээх боломж олгож байна. Гэхдээ инфляц өндөр, хэрэглэгч болон эдийн засгийн идэвх тогтвортой байгаа нь оны эцэс гэхэд дахин хүү өсгөх нөхцөл бүрдүүлж болзошгүйг тэрээр онцолжээ.

Хэрэглээ 0.9 хувиар өсчээ

Инфляцын үзүүлэлт зөөлөрсөн ч АНУ-ын хэрэглэгчдийн зарцуулалт эрчимтэй нэмэгдсэн байна. Тодруулбал, өрхийн хэрэглээ наймдугаар сард өмнөх сараас 0.9 хувиар буюу 190.8 тэрбум ам.доллароор өссөнийг албан ёсны мэдээлэлд дурджээ. Харин инфляцын нөлөөг хасч тооцсон бодит хэрэглээ 0.6 хувиар нэмэгджээ.

Хэрэглээ нь АНУ-ын эдийн засгийн идэвхийн гуравны хоёроос илүү хувийг бүрдүүлдэг. Мөн Эдийн засгийн шинжилгээний хорооноос мэдээлснээр бодит ДНБ-ий өсөлт хоёрдугаар улиралд жилийн тооцоолсон дүнгээр 2.2 хувьтай гарахад хэрэглээ, хөрөнгө оруулалт болон экспорт голлон нөлөөлжээ.

Гэхдээ өрхийн орлогын өсөлт хэрэглээний хурдыг гүйцээгүй байна. Хувийн орлого наймдугаар сард 0.2 хувь, татварын дараах орлого 0.3 хувиар өссөн бол хуримтлалын түвшин 4.1 хувь болжээ.

“Citigroup”-ийн эдийн засагч Вероника Кларк шатахууны өндөр үнэ бодит хөдөлмөрийн орлогын өсөлтийг сааруулж байгаа тул ирэх саруудад хэрэглээ сулрах эрсдэл байгааг анхааруулсан байна.

Бодлогын хүүг өсгөх зах зээлийн хүлээлт буурлаа

Холбооны нөөцийн банк есдүгээр сард бодлогын хүүгээ 3.75-4.00 хувийн интервалд хүргэж, гурван жилийн дараа анх удаа нэмэгдүүлсэн. Инфляцын шинэ мэдээлэл гарсны дараа зах зээл аравдугаар сарын 27-28-ны хурлаар бодлогын хүү дахин өсөх магадлалыг 41.5 хувиар үнэлсэн нь мэдээлэл гарахаас өмнөх 51.5 хувь, даваа гарагийн 70 хувийн түвшнээс буурсан үзүүлэлт болж буйг “CME FedWatch” харуулжээ.

Гэсэн хэдий ч инфляц Холбооны нөөцийн банкны хоёр хувийн зорилтот түвшнээс өндөр хэвээр байгаа бөгөөд хэрэглээ эрчимтэй өссөн нь мөнгөний бодлогын цаашдын чиглэлийг тодорхойлоход инфляцын дараагийн үзүүлэлтүүд болон хөдөлмөрийн зах зээлийн мэдээлэл чухал хэвээр байгааг харуулж байна.