Австралийн Hunter Valley Operations нүүрсний цогцолбор олборлолтоо 2045 он хүртэл үргэлжлүүлэх зөвшөөрөл авлаа

Шинэ Өмнөд Уэльсийн Бие даасан Төлөвлөлтийн комисс Австралийн Hunter Valley Operations (HVO) нүүрсний цогцолборын олборлолтыг 2045 он хүртэл үргэлжлүүлэх зөвшөөрөл олголоо. Комисс Glencore–Yancoal хамтарсан төслийн эдийн засаг, нийгмийн өгөөж нь байгаль орчны нөлөөллөөс давна гэж дүгнэсэн байна. Шийдвэрийн хүрээнд HVO North, South ил уурхайгаас 429 сая тонн нүүрс олборлох боломж нээгдэж, төслийн нийт ялгарал 809 сая тоннд хүрнэ гэж тусгав.

Энэ зөвшөөрөлгүй байсан тохиолдолд одоогийн зөвшөөрлүүд 2026 оны эцэст хугацаа дуусах эрсдэлтэй байсныг комисс онцолжээ. Тиймээс гарсан шийдвэр нь 1,500 гаруй ажлын байрыг хамгаална гэж мэдээлсэн байна. Төсөл 800 гаруй ханган нийлүүлэгчтэй хамтран ажилладаг гэж дурдсан нь олборлолтын сунгалт бүс нутгийн нийлүүлэлтийн сүлжээ, үйлчилгээний салбарт шууд нөлөөтэйг илтгэнэ.

Комиссын хэлэлцүүлгийн явцад 10,000 гаруй олон нийтийн санал ирсний ойролцоогоор 60% нь төслийг дэмжсэн гэж мэдээлэв. Гэхдээ комисс нүүрсийг гадаадад шатааснаас үүдэх хүлэмжийн хий нь бүс нутаг, муж, цаашлаад дэлхийн хэмжээнд уур амьсгалын өөрчлөлтөд нөлөөлнө гэдгийг тэмдэглэж, эрсдэлийг шийдвэрийн үндэслэлд нь тусган авч үзсэн байна. Өөрөөр хэлбэл, зөвшөөрөл олгосон ч уур амьсгалын нөлөөллийг “зүгээр өнгөрөөхгүй” гэсэн байр суурийг нөхцөлөөр дамжуулан тусгасан хэрэг.

Тиймээс нэмэлт нөхцлөөр хүлэмжийн хийг бууруулах, сэргээгдэх эрчим хүчний хэрэглээг эхлүүлснээс хойш дөрвөн жилийн дотор дээдлэх, мөн нэмэлт нүүрстөрөгчийн нөхөн олговор худалдаж авахыг үүрэгдүүлжээ. Үүнээс гадна уурхайн хаалтын болон ажиллах хүч, орон нутгийн иргэдийн шилжилтийг дэмжих төлөвлөгөөг тогтмол шинэчилж, хэрэгжүүлэх шаардлага тавьсан байна. Комиссын өгсөн чиглэл нь олборлолт үргэлжилж байсан ч шилжилтийн зардал, нийгмийн нөлөөг “урьдчилж зохион байгуулах” логик руу түлхэж буй шийдэл гэж харагдана.

Гэвч эсэргүүцэл ч дагалдлаа. Lock the Gate байгууллага энэ хэмжээний бохирдол Австралийн ялгарлыг бууруулах зорилтыг үгүй хийх эрсдэлтэй гэж Reuters-т мэдээлсэн байна. Харин төслийн талд ажиллах хүч, нийлүүлэлтийн сүлжээнд ирэх үр нөлөөг түлхүү онцолж, Дэйв Фостер “Манай үнэнч ажиллах хүч, орон нутгийн ханган нийлүүлэгчид, өргөн хүрээний Hunter нутгийн иргэдэд чин сэтгэлийн талархал илэрхийлье” гэж хэлжээ. Зөвшөөрөл дагасан хатуу нөхцлүүд хэрэгжилтээрээ үнэлэгдэх бөгөөд төслийн эдийн засгийн ашиг тус, уур амьсгалын дарамт хоёрын тэнцвэрийг бодитоор хангаж чадах эсэх нь цаашдын гол сорилт хэвээр байна.