Азийн бар Сингапурын хүн амын бүтэц "хэт хөгширсөн" ангилалд шилжжээ

Сингапурын 65 ба түүнээс дээш насны иргэдийн эзлэх хувь 2026 онд 21.4 хувьд хүрснээр тус улс “хэт хөгширсөн” нийгмийн ангилалд шилжлээ. НҮБ-ын тодорхойлолтоор 65-аас дээш насныхан хүн амын 21 хувьд хүрсэн улсыг ийм ангилалд тооцдог байна.

Сингапурын Үндэсний хүн ам, авьяас чадварын хэлтсээс есдүгээр сарын 25-нд танилцуулсан “Population in Brief 2026” тайланд дурдсанаар 65-аас дээш насны иргэдийн эзлэх хувь 2025 оны 20.7 хувиас өсч, 21.4 хувьд хүрчээ. Тооноос харахад нээх сүртэй мэт биш боловч хүн амын таван хүн тутмын нэг нь "хэт хөгширсөн" ангилалд багтаж байгаа нь анхаарал хандуулахгүй байхын аргагүй үзэгдэл аж. Түүнчлэн арван жилийн өмнө буюу 2016 онд уг үзүүлэлт 13.7 хувь байсан нь хүн амын насны бүтэц богино хугацаанд мэдэгдэхүйц өөрчлөгдсөнийг харуулж байгаа юм.

Хөгшрөлт хурдасч буй гол шалтгааны нэг нь 1946-1964 онд төрсөн “baby boomer” үеийнхэн олноороо 65 насны босгыг давж буйтай холбоотой юм. Засгийн газрын тооцоогоор 2035 он гэхэд Сингапурын дөрвөн иргэн тутмын нэг гаруй нь 65 ба түүнээс дээш настай ахимаг насны иргэн болохоор байна.

Төрөлт түүхэн доод түвшинд хүрчээ

Хүн амын хөгшрөлт нэмэгдэхийн зэрэгцээ төрөлт буурсаар байна. Сингапурын байнгын оршин суугчдын төрөлтийн нийлбэр коэффициент буюу нэг эмэгтэйн амьдралынхаа туршид төрүүлэх хүүхдийн дундаж тоо 2025 онд 0.87 болж, өмнөх оны 0.97-оос буурснаар түүхэн доод түвшинд хүрчээ.

Мөн 2025 онд нийт 26,071 хүүхэд төрсөн нь өмнөх оны 29,237 төрөлтөөс 10.8 хувиар цөөрсөн үзүүлэлт болж буй. Сүүлийн таван жилд жилд дунджаар авч үзвэл 29,300 хүүхэд төрсөн бол 2016-2020 онд уг үзүүлэлт 32,500 байжээ.

Харин хөдөлмөрийн насны буюу 20-64 насны иргэдийн эзлэх хувь 2030-2035 онд харьцангуй тогтвортой байх төлөвтэй байна. Засгийн газар үүнийг 65 нас давж буй үеийнхний тоо багасахын зэрэгцээ залуу үе болон зохицуулалттай цагаачлалын бодлогоор шинээр ирсэн хүмүүс хөдөлмөрийн насанд шилжихтэй холбон тайлбарлажээ.

Хүн амын насжилттай уялдуулан Сингапур 2026 онд тэтгэвэрт гарах насыг 63-аас 64, дахин ажиллуулах насыг 68-аас 69 болгон нэмэгдүүлсэн. Эдгээр босгыг 2030 он гэхэд тус тус 65 болон 70 нас болгохоор төлөвлөж байгаа нь ахмад настнуудыг хүсвэл хөдөлмөрийн зах зээлд удаан хугацаанд оролцох боломжийг нэмэгдүүлэх бодлогын нэг хэсэг болж байна.