Azzuro Resources-ийн Ред Хилл төслийн эцсийн шинжилгээгээр 11.95 хувь хүртэл зэс илэрлээ

Azzuro Resources PLC (ASX: AZ9) 2026 оны 9 дүгээр сарын 1-нд баруун өмнөд Монгол дахь 100 хувь эзэмшлийн Ред Хилл (хуучнаар Майхан Уул) зэс-алтны вулканоген массив сульфид (VMS) төслийн 2026 оны I үе шатны өрөмдлөгийн эцсийн буюу 4 дэх багц шинжилгээний үр дүнг зарлалаа. Үүнд MU2609, MU2610, MU2610A, MU2611 цооногууд хамаарна. Энэ нь компанийн 10 дугаар сарын 1-нд зарласан MU2613A цооногийн шинэ зэсийн сульфидын бүсийн мэдээллээс тусдаа, түүнээс сарын өмнөх үр дүн юм.

2025 оны MU2501 цооногоос ойролцоогоор 85 метр өмнө зүгт, массив сульфидын үргэлжлэлийг шалгахаар өрөмдсөн MU2610A цооног 142.5 метрээс 5.0 метрт 4.92% зэс, 0.94 г/т алт, 5.05 г/т мөнгө, 0.41% цайр огтолсон бөгөөд үүнд 143.85 метрээс эхлэх 2.0 метрт 11.95% зэс, 1.99 г/т алт, 11.80 г/т мөнгө багтжээ. Мөн цооног 49.9 метрээс 1.9 метрт 6.80 г/т алт, 67.30 г/т мөнгө бүхий тусдаа гүехэн алтны бүс огтолсон. Эдгээр бүсийн хооронд зэсийн бага агуулгатай хэд хэдэн огтлол илэрсэн нь өндөр агуулгатай цөмийг тойрсон өргөн бүсчлэлтэй минералжилт байгааг харуулж, компанийн VMS загвартай нийцэж байна.

MU2604 цооногоос 85 метр орчим баруун тийш өрөмдсөн MU2609 цооног гүехэн алтны коридорыг баталж, 7.0 метрээс 10.8 метрт 0.45 г/т алт, 10.72 г/т мөнгө огтолсон. Үүнээс гадна алтны бүсээс хойд талд өмнө нь мэдэгдээгүй зэсийн минералжилт буюу 44.0 метрээс 3.0 метрт 2.40% зэс илэрсэн. MU2610 болон MU2610A цооногууд мэдэгдэж буй коридороос өмнө зүгт алтны шинэ талбай нээсэн. Харин баруун өмнөд хэсэгт өрөмдсөн MU2611 цооногт мэдэгдэхүйц алт, зэс илрээгүй бөгөөд MU2610 цооногийг хагарлын бүсэд кернийн гарц муу байсан тул 47.4 метрт зогсоосон байна.

Бүх шинжилгээ дууссанаар Azzuro-гийн өрөмдсөн 14 цооногийн 8-д нь өндөр агуулгатай минералжилт ойролцоогоор 550 метр суналын дагуу, 150 метр орчим гүн хүртэл тогтоогдож, зүүн, баруун болон уналын дагуу нээлттэй хэвээр байна. Компанийн тооцоолсон JORC стандартын хайгуулын зорилт нь 15–30 сая тонн, 0.71–0.9% зэс, 0.26–0.4 г/т алт бөгөөд энэ нь онолын төсөөлөл, эрдсийн нөөц тооцоход хангалттай хайгуул хараахан хийгдээгүй гэж компани анхааруулжээ.

II үе шатны өрөмдлөг эхэлж, эхний ээлжинд гүехэн алтны бүсэд төвлөрч байгаа бөгөөд 2026 оны цооногуудад DHEM хэмжилт хийгдэж, зэс-алтны сульфидын дээжинд флотацийн урьдчилсан металлургийн туршилт эхэлсэн. Гүйцэтгэх захирал Ган-Очир Зундуйсүрэн «Бид шинжилгээний энэхүү эцсийн багцыг амжилттай дуусгалаа. Зэсээр баялаг массив сульфид болон гүехэн алтны бүсүүдийг баталгаажуулаад зогсохгүй, зэсийн хайгуулын нэмэлт талбай болон алтны шинэ талбайг илрүүллээ» гэж мэдэгджээ.

Эх сурвалж: Azzuro Resources PLC-ийн ASX зарлал (2026.09.01), Market Index, Investing News Network (INN), MiningHub.