Бээжин автомашин үйлдвэрлэгчдэд гадаад зах зээлд үнийн өрсөлдөөнөө хязгаарлахыг анхаарууллаа

БНХАУ-ын эрх баригчид автомашин үйлдвэрлэгч компаниудад гадаад зах зээлд хэт түрэмгий үнийн бодлого хэрэгжүүлэхгүй байхыг анхааруулж, олон улсын хэмжээнд тэлэхдээ шударга өрсөлдөөний зарчим болон тухайн улсын зохицуулалтыг мөрдөхийг шаардлаа.

“Nikkei Asia”-ийн мэдээлснээр БНХАУ-ын Худалдааны яамнаас гаргасан шинэ удирдамжид автомашины үнийг огцом бууруулах, ойр ойрхон өөрчлөх, мөн худал эсвэл хэрэглэгчийг төөрөгдүүлэх мэдээлэл ашиглах нь Хятадын брэндүүдийн нэр хүндэд сөргөөр нөлөөлөх эрсдэлтэйг онцолжээ.

“Гадаад зах зээл дэх өрсөлдөөн ба нийцлийн удирдамж”-аар компаниудад үнийн стратегиа үйлдвэрлэлийн өртөг болон олон улсын зах зээлийн эрэлт, нийлүүлэлтэд тулгуурлан боловсруулахыг зөвлөсөн байна. Түүнчлэн шударга бус өрсөлдөөний давуу тал олж авах зорилгоор зах зээлийн өрсөлдөөнийг алдагдуулах үйлдлээс татгалзахыг шаарджээ.

Удирдамжийг БНХАУ-ын Худалдааны яам, Аж үйлдвэр, мэдээллийн технологийн яам болон Зах зээлийн зохицуулалтын ерөнхий газар хамтран боловсруулсан байна.

Экспорт дотоодын эрэлт саарах үеийн гарц болж байна

Хятадын дотоодын автомашины эрэлтийн өсөлт саарч буй үед үйлдвэрлэгчид борлуулалтын шинэ зах зээл эрэлхийлж, экспортын үйл ажиллагаагаа эрчимжүүлээд байна. Цахилгаан болон хосолмол хөдөлгүүртэй автомашинд олгож байсан худалдан авалтын урамшуулал, татварын хөнгөлөлтийг үе шаттай бууруулж байгаа нь үйлдвэрлэгчдийн гадаад зах зээлд анхаарах нэг шалтгаан болжээ.

Үүнтэй холбоотойгоор шинэ удирдамжид зорилтот зах зээлийн хэрэглээний нөхцөл, хэрэглэгчдийн хэрэгцээнд нийцэхгүй автомашиныг их хэмжээгээр экспортлохоос зайлсхийхийг үйлдвэрлэгчдэд анхааруулсан байна.

Хятадын автомашин үйлдвэрлэгчид Канад зэрэг шинэ зах зээлд үйл ажиллагаагаа тэлж эхэлсэн нь цаашид АНУ-ын зах зээлд нэвтрэх боломжийн хувьд чухал алхамд тооцогдож байна. Гэхдээ Хятадад үйлдвэрлэсэн автомашинд АНУ өндөр импортын тариф ногдуулдаг.

Европын тариф экспортыг зогсоосонгүй

Европын Холбоо хоёр жилийн өмнө явуулсан шалгалтаараа БНХАУ-ын төрөөс цахилгаан автомашин үйлдвэрлэгчдэд олгож буй татаас нь Европын зах зээлд бүтээгдэхүүнээ өрсөлдөгчдөөс хямд санал болгох боломж бүрдүүлж байна гэж дүгнэсэн. Үүний дараа Хятадад үйлдвэрлэсэн цахилгаан автомашинд нэмэлт тариф тогтоосон юм.

Гэсэн хэдий ч тариф Хятадын автомашины гадаад зах зээл дэх тэлэлтийг бүрэн хязгаарласангүй. Тухайлбал, нэмэлт тарифын ийм зохицуулалтгүй Австрали зэрэг зах зээл Хятадын үйлдвэрлэгчдийн экспортын чухал чиглэл болж байна.

БНХАУ-ын шинэ удирдамж зөвхөн үнийн өрсөлдөөнийг хязгаарлахгүй. Үйлдвэрлэгчдээс борлуулалтын дараах үйлчилгээ болон хэрэглэгчийн дэмжлэгээ сайжруулах, мэдээлэл цуглуулахдаа тухайн улсын хууль тогтоомжийг мөрдөх, шинэ зах зээлд үйл ажиллагаа явуулахдаа орон нутгийн зохицуулалтад нийцэхийг мөн шаарджээ.

Ингэснээр Хятадын эрх баригчид автомашин үйлдвэрлэгчдийн экспортын өсөлтийг үргэлжлүүлэхийн зэрэгцээ хэт хямд үнэ, төөрөгдүүлсэн сурталчилгаа болон зах зээлийн зохисгүй өрсөлдөөнөөс үүдэж болзошгүй худалдааны маргаан, хариу арга хэмжээний эрсдэлийг хязгаарлахыг зорьж байна.