БНСУ АНУ-д хийх $200 тэрбумын хөрөнгө оруулалтын зарим төслөө эцэслээгүй байна

БНСУ-ын Ерөнхийлөгч И Жэ Мён тус улсын АНУ-д хийхээр амалсан 200 тэрбум ам.долларын хөрөнгө оруулалтын багцын зарим томоохон төсөл арилжааны нөхцөлөөс хамаарч эцэслэн шийдэгдээгүй байгааг тодотголоо. АНУ-ын Ерөнхийлөгч Дональд Трамп лхагва гарагт “Truth Social”-д нийтэлсэн мэдэгдэлдээ хоёр улс 50 тэрбум ам.долларын өртөг бүхий байгалийн шингэрүүлсэн хийн “Alaska LNG” төсөл дээр хамтран ажиллахаар тохиролцсон хэмээн мэдээлсэн юм. Харин И Жэ Мён пүрэв гарагт “X” платформд хийсэн мэдэгдэлдээ Өмнөд Солонгос уг төсөлд оролцох эсэхийг санхүүгийн өгөөж болон хууль эрх зүйн шаардлагад нийцэж буй эсэхийг харгалзан шийдвэрлэнэ гэдгийг мэдэгдэв. АНУ-д барих цөмийн цахилгаан станцуудын хөрөнгө оруулалтыг ч төсөл тус бүрээр нь арилжааны үр ашигт үндэслэн үнэлэхээр байна. Хоёр улсын лхагва гарагт гаргасан хамтарсан мэдэгдэлд “Alaska LNG” төсөл дээр хамтран ажиллах боломжийг дурдсан ч хэрэгжилтийг арилжааны үндэслэлтэй байх нөхцөлтэй холбожээ.

Аляскийн LNG төсөлд эргэлзээ төрсөн хэвээр байна “Alaska LNG” төсөл нь Аляскийн хойд хэсгийн байгалийн хийн ордуудаас 1,300 орчим километр дамжуулах хоолойгоор шингэрүүлсэн хий тээвэрлэн, мужийн өмнөд хэсэгт шингэрүүлж, Азийн зах зээл зэрэг гадаадын худалдан авагчдад экспортлох зорилготой юм. Гэвч төсөлд эхний шатанд их хэмжээний хөрөнгө шаардлагатай тул эдийн засгийн үр ашиг нь олон жилийн турш маргаан дагуулж иржээ. Өмнөд Солонгосын Аж үйлдвэрийн сайд Ким Жон Куан өнгөрсөн онд төслийг “өндөр эрсдэлтэй” хэмээн тодорхойлж, хангалттай мөнгөн урсгал бий болгохгүй бол оролцоход хүндрэлтэй гэж мэдэгдэж байсан юм. Иймээс Трампын дурдсан 50 тэрбум ам.долларын хөрөнгө оруулалт нь Солонгосын баталгаажсан хөрөнгө оруулалтын хэмжээ гэхээсээ илүү төслийн нийт үнэлгээ бөгөөд Сөүлийн хэрхэн оролцох нь одоогоор тодорхой болоогүй байна.

Дата төвүүдэд зориулсан 22.3 тэрбум ам.долларын цахилгаан станц Харин хөрөнгө оруулалтын багцад илүү тодорхой туссан төслүүдийн нэг нь Техас мужийн Энсиналд байгуулах 22.3 тэрбум ам.долларын байгалийн хийн цахилгаан станц юм. Нийт 6,472 мегаваттын хүчин чадалтай уг байгууламж нь нэг байршилд төвлөрөх дата төвүүдийг цахилгаанаар хангах аж. Уг төслийг үл хөдлөх хөрөнгө, дэд бүтцийн “Related Companies” болон АНУ-ын эрчим хүчний “NextEra Energy” компани хамтран хэрэгжүүлэхээр төлөвлөжээ. Уг төсөл эхний ээлжинд арилжааны үйл ажиллагаагаа 2029 онд эхлүүлэх бол нийт хүчин чадлыг 2032 он хүртэл үе шаттай ашиглалтад оруулах юм. Түүнчлэн хоёр улсын тохиролцоогоор Өмнөд Солонгосын компаниуд тоног төхөөрөмж нийлүүлэхээс гадна инженерчлэл, барилга угсралт, урт хугацааны ашиглалт, засвар үйлчилгээний ажилд оролцох боломжтой. Мөн АНУ цаашид хэрэгжүүлэх ижил төрлийн төслүүдэд Солонгосын компаниудад турбин зэрэг тоног төхөөрөмж нийлүүлэх боломж олгохоор төлөвлөжээ.

Найман цөмийн реакторт 120 тэрбум ам.доллар төлөвлөсөн Хөрөнгө оруулалтын багцын хамгийн том хэсэг болох 120 тэрбум ам.долларыг АНУ-д найман том оврын цөмийн реактор байгуулах төлөвлөгөөнд хуваарилжээ. Үүнээс 100 тэрбум ам.долларыг барилгын зардалд, үлдсэн 20 тэрбум ам.долларыг болзошгүй нэмэлт зардлын нөөцөд зориулах юм байна. Цөмийн эрчим хүчний хамтын ажиллагааны хэлэлцээрт хоёр улсын Засгийн газраас гадна АНУ-ын цөмийн эрчим хүчний “Westinghouse Electric” болон Солонгосын “Korea Electric Power Corp.”, мөн “Korea Hydro & Nuclear Power” компани оролцсон байна. Төлөвлөгөөнд Өмнөд Солонгосын компаниуд “Westinghouse”-ийн томоохон хэмжээний цөөнхийн эзэмшлийг худалдан авах боломжийг мөн судлахаар тусгажээ. Гэхдээ хөрөнгө оруулалтын нөхцөлийг талуудын арилжааны хэлэлцээгээр эцэслэн тогтоох юм.