“Boroo” компани Канадын “Victoria Gold”-ийг $140 саяар худалдан авах гэрээ байгуулав

Сингапурт төвтэй уул уурхайн хөрөнгө оруулалтын “Boroo” компани Канадын “Victoria Gold” корпорацыг 140 сая хүртэлх канад доллароор худалдан авах гэрээ байгуулжээ. Хэлэлцээр хэрэгжсэнээр тус компанийн эзэмшлийн Канадын Юкон муж дахь “Eagle Gold” алтны уурхай шинэ өмчлөгчтэй болж, 2024 оны ослоос хойш зогссон үйл ажиллагааг сэргээх боломж бүрдэх юм. “Boroo”-ийн албан ёсны мэдэгдэлд худалдан авалтыг тус компанийн бүрэн эзэмшлийн “Gatsuurt Mining Inc.” охин компаниар дамжуулан хэрэгжүүлнэ. Гэрээг “Victoria Gold”-ийн хөрөнгийг шүүхийн шийдвэрээр удирдаж буй “PricewaterhouseCoopers” компанитай байгуулжээ. Худалдан авалтаас гадна 1.4 тэрбум канад долларын хөрөнгө оруулалт төлөвлөжээ. Гэрээний дагуу “Boroo” компани эхний ээлжид 40 сая канад доллар бэлнээр төлөх бөгөөд үлдсэн 100 сая канад долларыг уурхайн зөвшөөрөл болон арилжааны үйлдвэрлэлтэй холбоотой шалгуур үзүүлэлтүүд биелсэн тохиолдолд үе шаттай шилжүүлэхээр тохиролцсон байна. Түүнчлэн 2027–оос 2029 онд уурхайн байгаль орчны нөхөн сэргээлт, ус цэвэршүүлэх байгууламж, геотехникийн тогтворжуулалт болон үйлдвэрлэлийг үе шаттай сэргээхэд 800 сая орчим канад доллар зарцуулахаар төлөвлөсөн байна. Уурхайн ашиглалтын эхний хугацаанд үйл ажиллагааг дэмжих, өргөжүүлэхэд 600 сая гаруй канад долларын нэмэлт хөрөнгө оруулалт хийхээр тооцжээ. Ингэснээр худалдан авалтын төлбөрийг оролцуулахад Канад дахь нийт хөрөнгө оруулалтын хэмжээ 1.5 тэрбум канад доллароос давах төлөвтэй байна.

2024 оны ослоос хойш үйл ажиллагаа нь зогссон уурхай “Eagle Gold” уурхайн овоолох байгууламж 2024 оны зургаадугаар сарын 24-нд нурж, цианид агуулсан материал болон бохирдсон ус алдагдах эрсдэл үүссэн. Уг ослын дараа байгаль орчны хохирлыг хязгаарлах, ус цэвэршүүлэх, уурхайн талбайг тогтворжуулах арга хэмжээ авах шаардлагатай болж, 2024 оны наймдугаар сарын 14-нд Онтариогийн Дээд шүүх “PricewaterhouseCoopers”-ийг “Victoria Gold”-ийн хөрөнгийн хүлээн авагч, удирдагчаар томилжээ. “Boroo”-ийн төлөвлөгөөнд эвдэрсэн овоолгын байгууламжийг тогтворжуулах, цианидын нөлөөлөлд өртсөн усыг цуглуулж цэвэршүүлэх, уурхайн тоног төхөөрөмжийг сэргээн засварлах болон үйлдвэрлэлийг аюулгүй эхлүүлэх ажлууд багтсан байна.

Шүүхийн зөвшөөрлийг арванхоёрдугаар сард авахаар төлөвлөж байна “PricewaterhouseCoopers” компани ирэх арванхоёрдугаар сарын эхээр Онтариогийн Дээд шүүхээс зөвшөөрөл хүсэх бөгөөд хэлцлийг арванхоёрдугаар сарын 31 орчимд дуусгахаар төлөвлөжээ. Үүнээс гадна Канадын өрсөлдөөний зохицуулалтын шаардлага, Юкон мужийн Засгийн газрын холбогдох зөвшөөрөл болон бусад нөхцөлийг хангах шаардлагатай. “Boroo” болон Юконы Засгийн газар уурхайн нөхөн сэргээлт, үйл ажиллагааг сэргээх, цаашдын хаалтын үүрэгтэй холбоотой хүрээний хэлэлцээрийн нөхцөлийг тохиролцсон байна. Уг хэлэлцээр нь худалдан авалт эцэслэснээр хүчин төгөлдөр болохоор тусгагджээ. Харин уурхайн нутаг дэвсгэрийн уламжлалт эзэмшигч болох На-Чо Няк Дун уугуул үндэстний төлөөлөлтэй хийх хэлэлцээ үргэлжилж байна. Хэлцэл батлагдсанаар уурхайн өмчлөл өөрчлөгдөх боловч үйлдвэрлэлийг дахин эхлүүлэхэд шаардлагатай байгаль орчин, техникийн болон зохицуулалтын зөвшөөрлийг тусад нь авах шаардлагатай аж.