CNBC Daily Open: Холимог хөдөлгөөнтэй зах зээл, Пентагоны бэлтгэл, “Google”-ийн шинэ загвар

CNBC-ийн зүгээс уншигч та бүхэнд Ази, Номхон далайн пүрэв гарагийн арилжааны нээлт болон АНУ-ын лхагва гарагийн арилжаагаар болж өнгөрсөн голлох үйл явдлыг хүргэж байна.

Ази, Номхон далайн голлох индексүүд арилжааг холимог эхлүүлжээ Ази, Номхон далайн голлох индексүүд пүрэв гарагийн арилжааг холимог байдалтай эхлүүлсэн. Хөрөнгө оруулагчид эрчим хүчний үнийн төлөв, АНУ-ын хөдөлмөрийн зах зээлийн мэдээлэл болон бүс нутгийн эдийн засгийн үзүүлэлтүүдийг үнэлж байна. Японы “Nikkei 225” индекс 67,877.56 нэгжид хүрч, 1.71 хувиар өсчээ. Харин Өмнөд Солонгосын Kospi индекс 6,838.26 нэгжид нээгдэж, 0.08 хувиар ялимгүй уналттай байгаа юм. Австралид инфляц хөрөнгө оруулагчдын анхаарлын төвд хэвээр байна. Тус улсын хэрэглээний үнийн өсөлт наймдугаар сард жилийн дүнгээр 4.0 хувьд хүрч, өмнөх сараас 0.5 хувиар өссөн бөгөөд Австралийн Төв банк бодлогын хүүгээ 4.6 хувьд хүргээд байгаа юм. Австралийн S&P/ASX 200 индекс 8,694.20 нэгжид нээгдэж, 1.05 хувийн бууралттай байна. Харин Хятадын Шанхай, Шэньжэний хөрөнгийн биржүүд Үндэсний баярын амралтаар аравдугаар сарын 1-7-нд хаалттай байх бөгөөд арилжаа аравдугаар сарын 8-наас эхлэх юм. Мөн Хонконгийн хөрөнгийн бирж мөн пүрэв гарагт Үндэсний баярын улмаас ажиллахгүй. Хятадын зах зээл амрахын өмнөхөн гарсан есдүгээр сарын үйлдвэрлэлийн худалдан авалтын менежерийн индекс буюу PMI 50.1 нэгжид хүрч, наймдугаар сарын 49.8 нэгжээс өссөнөөр тэлэлтийн бүсэд шилжсэн. PMI-ийн 50-аас дээш үзүүлэлт нь үйлдвэрлэлийн идэвх тэлж байгааг илэрхийлдэг ба хоёр сар үргэлжилсэн агшилтын дараа салбар өсөлтийн бүсэд эргэн оржээ.

Уолл Стрийт Дэлхийн зах зээлийн анхаарал эрчим хүчний нийлүүлэлт, Ираны дайн болон АНУ-ын хөдөлмөрийн зах зээлийн төлөвт төвлөрч байна. АНУ-ын Ерөнхийлөгч Дональд Трамп дизель түлшний экспортыг хориглох асуудлыг үргэлжлүүлэн авч үзэж буйгаа мэдэгдсэн нь түлшний нийлүүлэлт, үнийн цаашдын төлөвтэй холбоотой тодорхойгүй байдлыг нэмэгдүүллээ. АНУ-ын газрын тос боловсруулах салбарынхан экспортыг хязгаарлавал боловсруулах үйлдвэрүүд үйлдвэрлэлээ бууруулахад хүрч, эцэстээ дотоодын эрчим хүчний үнэ өсөх эрсдэлтэйг анхааруулж буй. Дизель түлш нь тээвэр, хөдөө аж ахуй, барилга болон үйлдвэрлэлийн салбарт өргөн хэрэглэгддэг. Иран болон Украины дайн дэлхийн эрчим хүчний урсгалд доголдол үүсгэснээр АНУ-д дизель түлшний үнэ түүхэн дээд түвшинд хүрээд байгаа юм. Мөн АНУ-ын Эрчим хүчний сайд Крис Райт боловсруулах үйлдвэрүүд өндөр хүчин чадлаар ажиллаж байгааг онцлоод, Европоос дизель түлшний шинэ нийлүүлэлт зах зээлд орж ирснээр үнийг мэдэгдэхүйц бууруулах боломжтой гэж мэдэгджээ.

АНУ, Ираны хэлэлцээ тодорхойгүй хэвээр Үүний зэрэгцээ Ираны дайныг дипломат замаар зогсоох хэлэлцээ удааширч болзошгүй гэсэн болгоомжлол мөн нэмэгдэж байна. Трамп есдүгээр сарын 30-нд Цагаан ордонд сэтгүүлчидтэй уулзах үеэр Ирантай “тохиролцоонд хүрэх цаг болсон” гэдгийг мэдэгдэж, тохиролцоо бүтэлгүйтвэл цэргийн ажиллагааг үргэлжлүүлнэ гэдгээ хатуухан илэрхийлжээ. Хоёр талын харилцаа сүүлийн өдрүүдэд “хаврын тэнгэр” шиг л буй. АНУ, Ираны төлөөлөгчид есдүгээр сарын 22-нд НҮБ-ын Ерөнхий Ассамблейн үеэр зуучлагчаар дамжуулан хэлэлцээ хийсэн бөгөөд Трамп тухайн уулзалтыг “нааштай болсон” гэж тодорхойлж байв. Гэвч Ираны зүгээс Ормузын хоолойг дахин нээхтэй холбоотой шинэ нөхцөл тавсан боловч Вашингтон уг саналыг хүлээн аваагүй байна.

АНУ-д фьючерс өсч, хөдөлмөрийн зах зээлийн тайланг хүлээж байна АНУ-ын хөрөнгийн зах зээл есдүгээр сарын сүүлийн арилжааг холимог төлөвтэй үджээ. Тодруулбал, тус улсын голлох S&P 500 индекс 7,651.54 нэгжид хүрч, 0.25 хувиар буурсан бол аж үйлдвэрийн Dow Jones индекс 443.87 нэгж буюу 0.86 хувиар унаж, 50,906.05 нэгжид хаагдлаа. Харин технологийн голлох Nasdaq индекс 0.24 хувиар өссөнөөр 26,861.064 нэгжийн түвшинд хаагдсан байна. Хөрөнгө оруулагчид энэ долоо хоногт гарах АНУ-ын хөдөлмөрийн зах зээлийн тайланг хүлээхийн зэрэгцээ Холбооны нөөцийн банкны бодлогын төлөвийг үнэлж байна. Миннеаполисын Холбооны нөөцийн банкны ерөнхийлөгч Нил Кашкари CNBC-д өгсөн ярилцлагадаа инфляц “хэт өндөр хэвээр” байгааг онцолж, хөдөлмөрийн зах зээлийг харьцангуй сайн боловч “хангалттай” гэж тодорхойлох хэмжээнд хүрээгүй байгааг хэлжээ. АНУ-ын Төв банк долдугаар сарын хурлаар бодлогын хүүг 3.50-3.75 хувьд хэвээр үлдээсэн бөгөөд өндөр инфляц хүүгийн цаашдын чиглэлийн гол хүчин зүйл хэвээр байна.

Хиймэл оюуны өрсөлдөөн шинэ шатанд Зах зээлийн өөр нэг анхаарал татсан үйл явдал нь хиймэл оюуны салбарт өрнөв. АНУ-ын технологийн “Google” компани мэргэжлийн нарийн төвөгтэй ажил, программчлал болон кибер аюулгүй байдлын чиглэлд ахиц гаргасан хэмээн тодорхойлж буй шинэ “Gemini 4 Argon” загвараа танилцууллаа. “Google” шинэ загвараа зах зээлд үе шаттай нэвтрүүлэхээр төлөвлөж байгаа бөгөөд эхний ээлжид сонгосон кибер аюулгүй байдлын түншүүдэд ашиглуулах аж. Мөн нийтэд нэвтрүүлэхээс өмнө аюулгүй байдлын үнэлгээ хийхээр АНУ-ын Засгийн газартай хамтран ажиллаж буй. Үүний зэрэгцээ АНУ-ын Батлан хамгаалах яам ирээдүйн дайнд шаардлагатай технологи, зэвсэг, цэргийн чадавхыг тодорхойлох ажилдаа “Tesla”, “SpaceX”-ийн гүйцэтгэх захирал Илон Маск, батлан хамгаалахын технологийн “Anduril”-ийг хамтран үүсгэн байгуулагч Палмер Лаки болон Төлөөлөгчдийн танхимын дарга асан Ньют Гингрич нарыг оролцуулахаар болжээ.