Дэлхийн бондын зах зээл сүүлийн хэдэн жилийн хамгийн өндөр өсөлттэй сарыг үдэхээр байна

Дэлхийн томоохон эдийн засгуудын Засгийн газрын бонд сүүлийн хэдэн жилийн хамгийн өндөр өсөлттэй сарыг үдэхээр байна. Тодруулбал, АНУ-ын Засгийн газрын хоёр жилийн хугацаатай бондын өгөөж энэ сард 60 орчим суурь нэгжээр өсч, сарын дүнгээр 2023 оны эхэн үеэс хойших хамгийн өндөр өсөлтөө үзүүлэх төлөвтэй байна. Мөн Франц, Герман, Их Британи болон Австралийн ижил төрлийн бондын өгөөж Ираны дайн эхэлснээс хойших огцом өсөлттэйгээр шинэ сарыг угтах нь. Түүнчлэн АНУ-ын Засгийн газрын 10 жилийн хугацаатай бондын өгөөж 2007 оноос хойш анх удаа 5 хувийг давж, энэ сарыг 50 орчим суурь нэгжийн өсөлттэйгээр өндөрлүүлэх төлөвтэй байна. Харин сарын өсөлтийн хэмжээгээр 2022 оноос хойших хамгийн өндөр үзүүлэлт болохоор байгаа юм. Францын “Société Générale” банкны тайлбарласнаар хөрөнгө оруулагчид эрчим хүч болон инфляцтай холбоотой эрсдэл ойрын хугацаанд буурах шинжгүй байгааг ойлгож эхэлсэн төдийгүй бондын зах зээл уг нөхцөлд тохируулан үнэлгээгээ өөрчилж байна. Засгийн газрын бондын өгөөжийн хөдөлгөөн илүү өргөн цар хүрээг хамардаг актив юм. Тухайлбал, бондын өгөөж нь ипотекийн зээлээс өгсүүлээд компаниудын санхүүжилтийн өртөг хүртэл өргөн хүрээнд зээлийн хүүг тогтоох суурь үзүүлэлт болдог аж.

Хиймэл оюуны хөрөнгө оруулалт бондын нийлүүлэлтийг өсгөлөө Өгөөж өссөнөөр Засгийн газрын бонд зарим хөрөнгө оруулагчийн хувьд анхаарал татахуйц актив болж байна. Тодруулбал, Швейцарын хөрөнгө оруулалтын “Lombard Odier Investment Managers”-ийн тайлбарласнаар хөрөнгө оруулагчид өндөр өгөөжид нь хошууран Засгийн газрын бондод илүү нааштай хандах болжээ. Гэхдээ хиймэл оюуны дэд бүтцэд зарцуулж буй технологийн компаниудын хөрөнгө оруулалт бондын зах зээлд шинэ нийлүүлэлт бий болгож буй. Томоохон дата төв, үүлэн тооцооллын үйлчилгээ үзүүлэгч компаниудын гаргасан бондын хэмжээ энэ онд хоёр дахин гаруй нэмэгдэж, 200 тэрбум ам.долларыг давсныг “LSEG”-ийн мэдээлэл харуулжээ. “Financial Times”-ийн мэдээлснээр “Meta”, “Amazon”, “Alphabet”, “Microsoft” болон “Oracle” зэрэг томоохон технологийн компаниуд хиймэл оюуны дата төв, тооцооллын хүчин чадлаа нэмэгдүүлэхийн тулд урьд байгаагүй хэмжээгээр өрийн санхүүжилт татаж байна. Ингэснээр технологийн компаниудын их хэмжээний бондын нийлүүлэлт нь хөрөнгө оруулагчдын капиталыг өөртөө татаж, бусад салбарын компаниуд төдийгүй Засгийн газруудын санхүүжилтийн нөхцөлд нөлөөлөх хэмжээнд хүрснийг тус хэвлэл онцолжээ. “Bridgewater”-ийн хөрөнгө оруулалтын стратеги хариуцсан захирал асан Ребекка Паттерсоны онцолсноор хиймэл оюуны хөрөнгө оруулалт нэмэгдэх тусам АНУ-ын Засгийн газар бондоороо дамжуулан хөрөнгө босгох боломж тодорхой хэмжээнд шахагдаж байна.