Д.Трамп: Өмнөд Солонгос Аляскийн байгалийн хийн төсөлд нэгдэхгүй бол төлбөрийг хоёр дахин өсгөнө

АНУ-ын Ерөнхийлөгч Дональд Трамп баасан гарагт Өмнөд Солонгосыг 50 тэрбум ам.долларын өртөг бүхий Аляскийн шингэрүүлсэн байгалийн хийн төсөлд удахгүй нэгдэхгүй бол төлөх дүнг нь “хоёр дахин нэмэгдүүлнэ” гэдгийг мэдэгджээ. Гэхдээ тэрбээр яг ямар төлбөр, нөхцөлийг нэмэгдүүлэх талаар тодорхой тайлбарлаагүй байна. Тэрбээр энэ талаар Цагаан ордноос явахын өмнө сэтгүүлчдэд хандан “Хэрэв тэд оролцохыг хүсэхгүй бол надад асуудалгүй, би зүгээр л илүү төлбөр авна” гэдгийг онцолж, “Ойрын хугацаанд гарын үсэг зурахгүй бол хоёр дахин нэмэгдүүлнэ гэж тэдэнд хэлээрэй” хэмээжээ. Нөгөө талд Өмнөд Солонгосын зарим хэвлэл Трампын хэлсэн “хоёр дахин нэмэгдүүлэх” арга хэмжээ нь тус улсын бараанд ногдуулах тарифыг өсгөхтэй холбоотой байж болзошгүй хэмээн мэдээлсэн. Гэхдээ Трамп өөрөө тарифын талаар шууд дурдаагүй тул ямар арга хэмжээ авахыг хэлсэн нь одоогоор тодорхойгүй хэвээр байна.

Сөүл төслийн өгөөжийг үнэлж байна Трамп Аляскийн төсөлд Өмнөд Солонгос оролцохоор болсон тухай өмнө нь зарласан ч Сөүл уг асуудлаар эцсийн шийдвэр гараагүйг мэдэгдсэн. Тодруулбал, Сөүлийн тал уг төсөлд оролцох боломжийг үргэлжлүүлэн судалж буй ба хөрөнгө оруулалтын шийдвэр нь төслийн арилжааны өгөөж болон дотоодын хууль, журмын шаардлагыг хангах эсэхээс хамаарна гэж мэдэгдээд байгаа юм. Харин Цагаан ордон дахь мэдэгдлийн үеэр зарим сэтгүүлч Трампаас төслийн талаарх Өмнөд Солонгосын байр суурь эцэслэгдээгүй байхад оролцоог нь яагаад зарласан эсэх талаар асуухад “би яаравчлаагүй” хэмээн хариулжээ. Вашингтон, Сөүлийн зөрүүтэй мэдэгдэл нь талуудын хооронд хэлэлцэж буй АНУ дахь эрчим хүч, дэд бүтцийн хөрөнгө оруулалтын төслүүдийн нөхцөл бүрэн эцэслэгдээгүй байгааг харуулж байна.

Нэмэлт 8.4 тэрбум ам.долларын төсөл зарлав Трамп мөн баасан гарагт “Truth Social” платформд Өмнөд Солонгостой байгуулсан хөрөнгө оруулалтын тохиролцоо “улам сайжирч байна” хэмээн бичиж, 8.4 тэрбум ам.долларын өртөг бүхий газрын тосны олборлолтыг нэмэгдүүлэх шинэ төсөл зарласан. Уг төсөл нь газрын тосны олборлолтыг нэмэгдүүлэхийн тулд нүүрстөрөгчийн давхар исэл шахах зэрэг технологи ашиглах аргачлалтай холбоотой юм. Гэвч Өмнөд Солонгосын хэвлэлүүд тус улсын Аж үйлдвэрийн яамны мэдээллээс эш татан 8.4 тэрбум ам.долларын төсөл нь Сөүл, Вашингтоны өмнө тохиролцсон хөрөнгө оруулалтын багцад багтаагүй гэж мэдээлжээ. Мөн Трампын зарласан төслийн талаар АНУ-ын талаас худалдааны сувгаар тодруулга авахаар ажиллаж байгаа гэж орон нутгийн хэвлэлүүд мэдээлсэн байна.