Хиймэл оюуны өсөлт Өмнөд Солонгосын болзоо, хөрөнгө оруулалт, мэргэжил сонголтыг өөрчилж байна
Өмнөд Солонгост хиймэл оюун, хагас дамжуулагчийн салбарын өсөлт “Samsung Electronics”, “SK Hynix”-ийн ажилтнуудыг болзооны зах зээлд эрэлттэй сонголт болгожээ. “SK Hynix”-ийн ашиг хуваарилах шинэ тогтолцоогоор нэг ажилтанд ногдох урамшуулал ойролцоогоор 700 сая вонд хүрэх тооцоо гарсан нь Солонгосын жилийн дундаж цалингаас 15 дахин өндөр үзүүлэлт юм. Хагас дамжуулагчийн салбарын өндөр орлого, ажлын байрны тогтвортой байдал нь зөвхөн болзоо төдийгүй хөрөнгө оруулалтын соёл, оюутнуудын мэргэжил сонголтод нөлөөлж эхэллээ.
Өмнөд Солонгосын хиймэл оюун, хагас дамжуулагчийн салбарын өсөлт хөрөнгийн зах зээлээс хальж, хүмүүсийн хэнтэй болзох, юунд хөрөнгө оруулах, ямар мэргэжил эзэмших сонголтод хүртэл нөлөөлж байна.
Тус улсын болзооны зах зээлд эмч, хуульч, шүүгч зэрэг мэргэжил уламжлал ёсоор хамгийн эрэлттэйд тооцогддог байв. Харин хиймэл оюуны өсөлтийг даган өндөр урамшуулал авах болсон хагас дамжуулагчийн салбарын ажилтнууд шинэ эрэлттэй бүлэг болжээ.
Солонгосын хос зуучлалын “Gayeon” компанийн төлөөлөгчийн мэдээлснээр сүүлийн үед “SK Hynix”, “Samsung Electronics” зэрэг хагас дамжуулагчийн компани болон хиймэл оюунтай холбоотой салбарт ажилладаг хүмүүсийг сонирхох хандлага нэмэгдсэн байна.
Хагас дамжуулагчийн “Samsung Electronics”, “SK Hynix” компаниудын зах зээлийн үнэлгээ энэ оны эхээр тус бүр нэг их наяд ам.долларын босгыг давсан. Он гарсаар “Samsung Electronics”-ийн хувьцааны ханш ойролцоогоор 95 хувь, “SK Hynix”-ийнх 135 орчим хувиар өсжээ.
Өндөр урамшуулал болзооны зах зээлд давуу тал болов
Хагас дамжуулагч үйлдвэрлэгчдийн ажилтнуудын сонирхол татах болсон нэг шалтгаан нь орлогын огцом өсөлт юм.
“SK Hynix” өнгөрсөн онд үйл ажиллагааны ашгийнхаа 10 хувийг ажилтнуудтайгаа хуваарилахаар тохиролцсон. “Reuters”-ийн тооцоогоор уг тогтолцооны хүрээнд нэг ажилтанд ногдох хэмжээ ойролцоогоор 700 сая вон буюу хагас сая гаруй ам.доллартай тэнцэж байна. Уг дүн нь Өмнөд Солонгосын ажилтнуудын өнгөрсөн оны жилийн дундаж цалингаас 15 дахин өндөр үзүүлэлт юм.
“Samsung Electronics”-ийн цалингийн шинэ тохиролцоогоор санах ойн чипийн салбарын ажилтнууд мөн өндөр урамшуулал авах боловч хэмжээ нь “SK Hynix”-ийнхээс бага байх төлөвтэй байна.
Хагас дамжуулагчийн ажилтнуудын орлого өсөж буй үе нь солонгос залуус гэрлэлтийг санхүүгийн давуу тал гэж үзэх хандлага нэмэгдэж буйтай давхцав. Орон нутгийн хэвлэлүүд хоёр хүний орлогыг нэгтгэн орон сууцны барьцаа хөрөнгө бүрдүүлэх, хөрөнгө оруулалтын багцаа хурдан өсгөх боломжийг “wedding leverage” буюу гэрлэлтийн санхүүгийн хөшүүрэг хэмээн нэрлэх болжээ.
Гэхдээ хагас дамжуулагчийн салбарын ажилтнууд өөрсдөө хамтрагч сонгохдоо зөвхөн ажил мэргэжил, орлогыг харгалзахаа больж, илүү олон хүчин зүйлд ач холбогдол өгөх болсон гэж “Gayeon” мэдээлэв. ** Чипийн өсөлт реалити шоу, хөрөнгө оруулалтад хүрэв**
“Samsung Electronics”, “SK Hynix”-ийн ажилтнуудын нэр хүнд өссөн нь энтертайнмент салбарын шинэ контентын сэдэв ч болжээ. YouTube-ийн “Teo” суваг наймдугаар сарын 13-нд хоёр компанийн ажилтнуудыг хооронд нь болзуулсан реалити шоу гаргасан бөгөөд үзэлт нь 650 мянга орчимд хүрсэн байна.
“Teo”-гийн төлөөлөгчийн тайлбарласнаар нэвтрүүлгийг оффисын ажилтнуудын завгүй амьдралыг болзоо гэх нийтлэг сэдвээр харуулах зорилготой бүтээжээ. Харин хоёр компанийн хиймэл оюунаас үүдэлтэй өсөлттэй цаг үе давхацсан нь илүү өргөн хүрээний үзэгч татахад нөлөөлсөн гэж тус компани үзэж байна.
Хөрөнгө оруулалтын соёлд ч ижил өөрчлөлт ажиглагдав. Стриймингийн “Netflix” платформ өнгөрсөн сард алдартай комедиан хувьцааны арилжаанд оролцож буйг харуулсан “Rookie Kim’s Stock Market Mission” нэвтрүүлгийг гаргажээ. Нэвтрүүлгийн эхэнд гол дүр “SK Hynix”-ийн цөөн хэдэн хувьцааг худалдан авдаг. Өмнөд Солонгосын дөрвөн хүн тутмын нэг нь жижиг хөрөнгө оруулагчид тооцогддог тул уг сэдэв өргөн хүрээний үзэгчдэд ойр байв.
Оюутнууд хиймэл оюуны ажлын байр руу чиглэж байна
Хиймэл оюуны өсөлт их сургуулийн мэргэжил сонголтод ч илэрч эхэлжээ. Өмнөд Солонгосын тэргүүлэх “Сөүлийн үндэсний их сургууль”-ийн Инженерийн сургуульд мэргэжлээ хараахан сонгоогүй оюутнуудын 90 хувь нь энэ онд цахилгаан болон компьютерын инженерчлэлийг сонгосон байна. 2023 онд уг үзүүлэлт ердөө 20 хувь байжээ.
Мэргэжил сонголтын өөрчлөлт нь хиймэл оюун гэх өргөн ойлголтыг дагасан түр зуурын сонирхлоос илүүтэй “Samsung Electronics”, “SK Hynix” зэрэг дотоодын томоохон компанид ажиллах тодорхой замтай холбоотой гэж шинжээч Лим тайлбарлав.
Түүний үзэж буйгаар хагас дамжуулагчийн салбар тогтвортой ажлын байр, өндөр орлого зэрэг бусад карьерын замаас илүү тодорхой, богино хугацаанд мэдрэгдэх үр өгөөж санал болгож байна. Ийнхүү хиймэл оюуны өсөлт Өмнөд Солонгост хөрөнгийн зах зээлийн ралли төдий бус, залуусын карьер, хөрөнгө оруулалт, бүр хосоо сонгох шалгуурт хүртэл нөлөөлөх болжээ.
Холбоотой мэдээ
БНСУ-ын нийт компаниудын 58 хувь нь хиймэл оюун ашиглаж байна
БНСУ-ын компаниудын хиймэл оюуны хэрэглээ нэг жилийн дотор 48 хувиас 58 хувь болж өсөж, сүүлийн 12 сард 624 мянга орчим компани шинээр нэвтрүүлжээ. Хиймэл оюун ашигладаг компаниудын 81 хувь нь бүтээмж нэмэгдсэн гэж хариулсан бол долоо хоногт дунджаар 14 цаг хэмнэж, 58 хувь нь борлуулалтаа өсгөсөн байна. Хэрэглээ эрчимтэй тэлж байгаа ч компаниудын ердөө 27 хувь нь байгууллагын хэмжээнд хэрэгжүүлэх албан ёсны хиймэл оюуны стратегитай байгаа нь дараагийн шатны гол сорилт болж байна.
Дональд Трамп хиймэл оюуны эрсдэлийг багасган тайлбарлаж, хөгжлийн хурдыг сааруулах уриалгатай зөрөв
Дональд Трамп ирландад хиймэл оюуны эрсдэлийн анхааруулгыг намжааж, өрсөлдөөнд байр сууриа хамгаалахыг чухалчлав Anthropic-ийн өмнөх судлаач ойрын ирээдүйд хүн төрөлхтөн мөхөх өндөр магадлалтай гэж BBC-д ярьжээ Салбарын дотоод маргаан гүнзгийрэхийн хэрээр зохицуулалт, хөрөнгө оруулалтын чиглэл өрсөлдөөний логикоор тогтох төлөвтэй байна
Хиймэл оюун нөхөрлөлийн орон зайг нөхөх үү, эсвэл ганцаардлыг даамжруулах уу?
Хиймэл оюунт чатботыг нөхөрлөлийн зорилгоор ашиглах нь зарим хэрэглэгчийн хувьд бодит харилцааг орлох түвшинд хүрч болзошгүй. Стэнфордын их сургуулийн "Character.AI" хэрэглэгчдийг хамарсан судалгаагаар нийгмийн хүрээлэл багатай хүмүүс чатботод түшиглэх хандлагатай байна. Чатботууд өдөр тутмын харилцаа, анхаарал халамжийн мэдрэмж өгч болох ч хүний бодит дотно харилцаа, санал зөрөлдөөн, итгэлцлийг бүрэн орлодоггүй.
Хятад улс 2030 он гэхэд өөрөө жолооддог автомашины хэрэглээг өргөн хүрээнд нэвтрүүлэх зорилт тавилаа
Хятад 2030 он гэхэд өөрөө жолоодох технологитой автомашиныг өргөн хүрээнд нэвтрүүлж, хурдны зам болон хотын зарим замд автомат жолоодлогыг ашиглахаар зорьж байна. Бээжин борлуулалтаараа дэлхийн эхний 10-т багтах хэд хэдэн Хятадын автомашин үйлдвэрлэгчийг бий болгож, дотоодын брэндүүдийн олон улсын өрсөлдөх чадварыг нэмэгдүүлэхээр төлөвлөжээ. Мөн үйлдвэрлэлийн илүүдэл хүчин чадал, хэт их хөрөнгө оруулалтыг хязгаарлаж, салбарын нэгдэл болон шударга өрсөлдөөнийг дэмжих бодлого баримтална.
Техасын шүүх “TikTok” хүүхдийн контент шүүлтийн талаар хэрэглэгчдийг төөрөгдүүлсэн гэж үзлээ
Техасын шүүх “TikTok” насанд хүрээгүй хэрэглэгчдэд зориулсан контентын шүүлтийн талаар төөрөгдүүлсэн нь хэрэглэгчийн эрхийг хамгаалах хууль зөрчсөн гэж үзлээ. Шүүхийн шийдвэрт “TikTok” дүрэм зөрчсөн зарим контентыг устгахын оронд олоход хүндрэлтэй ангилалд оруулж, платформ дээр үлдээж байсан гэж дурджээ. Хэргийг шүүх хурлаар үргэлжлүүлэн хэлэлцэж, компанид ногдуулах торгууль болон бусад арга хэмжээг тогтоохоор байна.
Шанхайн хөрөнгийн зах зээлд IPO гаргасны дараа “Enflame” компанийн хувьцааны ханш 206 хувиар өсчээ
Жижиглэнгийн хөрөнгө оруулагчдын захиалга санал болгосон хэмжээнээс 6,000 дахин давжээ. Энэ нь Хятадын дотоодын хиймэл оюуны чип үйлдвэрлэгчдэд чиглэсэн эрэлт өндөр байгааг харууллаа. Дотоодын компаниуд бүтээгдэхүүн, үйлдвэрлэл, экосистемийн түвшинд өрсөлдөх шаардлага тулгарч байна.