“Huawei” гурван нугалаатай шинэ загварын “Mate XT2” ухаалаг гар утсаа танилцууллаа
“Huawei” гурван хэсэгт нугаларч, дэлгэхэд таблетын хэмжээтэй болдог шинэ загварын “Mate XT2” ухаалаг утсаа даваа гарагт танилцууллаа. “Mate XT2” нь шинэ “Kirin 9050 Pro” чиптэй бөгөөд компанийн туршилтаар өмнөх загвараасаа нийт гүйцэтгэлээр 42 хувиар сайжирчээ. “Huawei” Хятадын ухаалаг утасны зах зээлийн 22%-ийг, нугардаг утасны нийлүүлэлтийн 68-ийг эзэлж буй ба “Apple”, “Xiaomi”-тэй өрсөлддөг байна.

Хятадын технологийн “Huawei” компани премиум ухаалаг утасны дотоодын зах зээл дэх тэргүүлэх байр сууриа хадгалах зорилгоор гурван хэсэгт нугалдаг шинэ загварын “Mate XT2” гар утсаа даваа гарагт танилцууллаа. Уг төхөөрөмжийг хоёр удаа дэлгэхэд таблетын хэмжээтэй дэлгэцтэй болдог бөгөөд “Huawei”-ийн шинэ “Kirin 9050 Pro” чипээр тоногложээ.
Компанийн мэдээлснээр шинэ чипийн загвар нь цахилгаан зарцуулалтыг бууруулахын зэрэгцээ тооцоолох хүчин чадлыг нэмэгдүүлэх боломжтой. “Huawei” АНУ-ын технологийн хоригийн улмаас дэвшилтэт технологи, чип үйлдвэрлэлийн тоног төхөөрөмжид нэвтрэх боломж хязгаарлагдсан хэвээр байгаа тул дотооддоо хөгжүүлсэн чипийн хүчин чадал нь бүтээгдэхүүний өрсөлдөх чадварт чухал ач холбогдолтой болж байна.
“Mate XT2”-ийн нугалах механизмыг шинэчилж, усны хамгаалалтыг сайжруулсан бөгөөд ойр байгаа хүмүүс дэлгэц дээрх мэдээллийг харахаас сэргийлэх нэмэлт дэлгэцийн сонголттой. Камерын системийг мөн шинэчилсэн бөгөөд компанийн туршилтаар нийт гүйцэтгэл нь өмнөх загвараасаа 42 хувиар сайжирчээ.
Шинэ загварын нээлт Хятадын премиум ухаалаг утасны зах зээлд өрсөлдөөн нэмэгдэж буй үетэй давхцав. “Xiaomi” даваа гарагт өрсөлдөгч нугардаг утсаа танилцуулахаар байгаа бол АНУ-ын технологийн “Apple” компани лхагва гарагт шинэ “iPhone” цувралаа зарлана. Тус компани нугардаг загвар танилцуулж магадгүй гэсэн хүлээлт мөн үүсээд байна.
Зах зээлийн судалгааны “IDC”-ийн мэдээллээр “Huawei” хоёрдугаар улиралд БНХАУ-ын ухаалаг утасны зах зээлийн 22.6 хувийг эзэлж тэргүүлсэн бол “Apple” 18.1 хувь, “Xiaomi” 12.4 хувийн эзлэх хувьтай байжээ.
Харин нугардаг ухаалаг утасны сегментэд “Huawei”-ийн байр суурь илүү хүчтэй байна. АНУ-д төвтэй судалгааны “Smart Analytics Global”-ийн тооцоогоор тус компани хоёрдугаар улиралд БНХАУ-д нийлүүлсэн нугардаг утасны 68 хувийг дангаараа бүрдүүлжээ.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ




