Хятадад өрхүүд зардлаа хямгадаж, эдийн засгийн сэргэлтэд дарамт учруулж байна

БНХАУ-ын өрхийн орлогын өсөлт удааширч, орон сууцны үнэ буурснаар хэрэглэгчдийн зарлагадаа хандах болгоомжлол нэмэгдэж байна. Өрхийн санхүүгийн итгэл суларч буй нь Бээжингийн эдийн засгийн өсөлтийг дотоод хэрэглээгээр илүү тэтгэх зорилтыг хүндрүүлж эхэлжээ.

“Wind”-ийн мэдээллээр 2020 оноос өмнө БНХАУ-ын хотын өрхийн бэлэн орлого жилд ойролцоогоор 10 хувь болон түүнээс дээш хурдаар өсдөг байв. Харин өнгөрсөн онд өсөлт 4.3 хувь болж саарсан нь АНУ-ын 3.8 хувийн өсөлттэй ойртжээ.

Орлогын өсөлт саарахын зэрэгцээ өрхийн гол хөрөнгө болох орон сууцны үнэ буурсан нь хэрэглэгчдийн санхүүгийн мэдрэмжийг улам сулруулж байна. Австралийн санхүүгийн үйлчилгээний “Macquarie” компанийн эдийн засагч Ларри Хугийн тооцоогоор тус улсын орон сууцны үнэ 2021 оны оргил үеэс хойш 2016 оны түвшин рүү бууж, 2012-оос 2021 онд бий болсон үнийн өсөлтийн 85 орчим хувийг бууруулжээ.

Өрхийн хөрөнгийн үнэ цэн буурч, орлогын өсөлт саарснаар хэрэглэгчид зайлшгүй шаардлагатай зардлыг илүү тэргүүнд тавих болжээ. БНХАУ-ын Ардын банкны өнгөрсөн оны судалгаагаар хэрэглэгчдийн зардлын тэргүүлэх чиглэлд боловсрол, эрүүл мэнд, аялал багтжээ. Ийм бүтэц үргэлжилбэл өргөн хэрэглээний бусад бараа, үйлчилгээний эрэлт жигд сэргэхэд илүү хугацаа шаардагдаж болзошгүй.

Экспорт өсөлтийг тэтгэсээр байна

Дотоод хэрэглээ нь сул байгаа ч БНХАУ-ын экспорт эдийн засгийн өсөлтийг дэмжсээр байна. Зургаадугаар сард импортын өсөлт сүүлийн таван жилийн хамгийн өндөр түвшинд хүрсэн ч худалдааны ашиг өндөр үлджээ. Үүний зэрэгцээ БНХАУ-д үйлдвэрлэсэн дата төвийн эд ангиудын дэлхийн эрэлт нэмэгдсэн нь тарифын нөлөөг үл харгалзан экспортын өсөлтийг дэмжиж байна. Гэхдээ гадаад эрэлт дотоод хэрэглээний сулралыг бүрэн нөхөж, эдийн засгийн бүтцийн тэнцвэргүй байдлыг засах боломж хязгаарлагдмал гэж шинжээчид үзэж байна. Ларри Ху БНХАУ-ын орон сууцны зах зээлийн төлөв экспортын нөхцөлтэй нягт холбоотой гэж тайлбарлав. Түүний үзэж буйгаар бодлого тодорхойлогчид өсөлтийг экспортоор хангалттай тэтгэх боломжгүй болсон үед үл хөдлөх хөрөнгийн зах зээлийг илүү хүчтэй дэмжих шаардлага үүсч болзошгүй.

Өсөлтийн загварт олон улсын анхаарал нэмэгдэв

Хятадын экспортод түшиглэсэн өсөлтийн загвар олон улсын түвшинд ч анхаарал татаж байна. “Их 20”-ийн Сангийн сайд нарын хамтарсан мэдэгдэлд дотоод хэрэглээг хязгаарлаж буй эдийн засгийн “гажуудал”-ыг бууруулах тухай агуулга тусгах оролдлогод Бээжин эсэргүүцжээ. Дотоод эрэлт удаан хугацаанд сул хэвээр байвал Хятад илүүдэл үйлдвэрлэлээ гадаад зах зээлд гаргах шаардлага нэмэгдэх бөгөөд худалдааны түнш орнуудын шүүмжлэл, худалдааны хязгаарлалт нэмэгдэх эрсдэлтэй.

“Bank of China”-ийн ахлах судлаач асан Зун Лян БНХАУ оны эхэнд нөхцөл байдал ийм чиглэлд өөрчлөгдөнө гэж тооцоолоогүйг онцолжээ.

Хятадын дотоод хэрэглээг тогтвортой сэргээхийн тулд зөвхөн богино хугацааны урамшуулал бус, өрхийн орлогын өсөлт, үл хөдлөх хөрөнгийн зах зээлийн тогтворжилт болон хэрэглэгчдийн санхүүгийн итгэл зэрэг хэд хэдэн хүчин зүйл зэрэг сайжрах шаардлагатайг одоогийн нөхцөл харуулж байна.