Хятадын "Z.ai" компани дотоодын чипээр ажиллах хиймэл оюуны GLM-5.3-Flash загвараа танилцууллаа
БНХАУ-ын хиймэл оюуны “Z.ai” компани дотоодод үйлдвэрлэсэн чипээр бүрэн ажиллах GLM-5.3-Flash шинэ загвараа танилцууллаа. Компанийн мэдээлснээр шинэ загвар нь Хятадад үйлдвэрлэсэн 100,0000 чип ашиглан хэрэглэгчдийн цахим хүсэлтийг боловсруулж байгаа юм байна. Мөн GLM-5.3-Flash нь хиймэл оюуны загваруудын гүйцэтгэлийг үнэлэх Artificial Analysis Intelligence индексэд 10 дугаарт эрэмбэлэгджээ.

Хятадын хиймэл оюуны “Z.ai” компани дотоодод үйлдвэрлэсэн чипээр бүрэн ажиллах GLM-5.3-Flash хэмээх шинэ загвараа танилцууллаа. АНУ өндөр хүчин чадлын чипийн экспортод хязгаарлалт тогтоогоод буй үед энэхүү нээлт нь Хятадын хиймэл оюуны салбар импортын технологийн хамаарлаа бууруулж чадах эсэхэд анхаарал татаж байна.
Компанийн мэдээлснээр шинэ загвар нь Хятадад үйлдвэрлэсэн 100,0000 нэгж чип ашиглан хэрэглэгчдийн цахим хүсэлтийг боловсруулж байгаа бөгөөд хиймэл оюуны загваруудын гүйцэтгэлийг үнэлэх Artificial Analysis Intelligence индексэд 10 дугаарт эрэмбэлэгджээ. Мөн энэ сарын 20-нд “Ox Alpha” код нэрээр гаргасан уг загвар өнгөрсөн долоо хоногт “OpenRouter” платформ дээр хэрэглээгээр дэлхийд тэргүүлсэн байна.
Гэхдээ “Z.ai” ямар үйлдвэрлэгчийн чип ашигласнаа тодруулаагүй бөгөөд CNBC одоогоор “цэвэр дотоодын хагас дамжуулагч” ашигласан гэх компанийн мэдэгдлийг бие даан баталгаажуулж чадаагүй байна. АНУ-ын экспортын хязгаарлалтын улмаас Хятадын компаниуд “Nvidia”-ийн өндөр хүчин чадлын чипийн өөр хувилбар эрэлхийлж байгаа энэ үед дотоодын чипээр хиймэл оюуны загвар ажиллуулах боломж зах зээлийн гол анхаарлын нэг болоод байна.
Хөрөнгө оруулагчид мэдээллийг эергээр хүлээн авч, Хонконгийн хөрөнгийн биржийн пүрэв гарагийн арилжаагаар “Z.ai”-ийн хувьцааны ханш 8 гаруй хувиар өслөө. Мөн IPO хийснээс хойш тус компанийн хувьцааны ханш 800 гаруй хувиар өсөөд байна.
“Z.ai” нь санхүүгийн оны эхний хагас жилийн тайлангаа ирэх даваа гарагт танилцуулах товтой байгаа юм.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ




