Майхан уул ордоос зэс-сульфидын эрдэсжилтийн шинэ бүс илэрлээ

Монгол дахь “Red Hill” буюу Майхан Уул зэс-алтны төслийг хэрэгжүүлэгч, Австралийн хөрөнгийн биржид бүртгэлтэй “Azzuro Resources PLC” компани хайгуулын өрөмдлөгийн явцад зэс агуулсан сульфидын эрдсийн шинж тэмдэг бүхий шинэ бүс илрүүлснээ мэдээллээ.

Тус компани есдүгээр сарын 1-нээс өнгөц хэсгийн алтны эрдэсжилтийг шалгах өрөмдлөг эхлүүлж, одоогоор зургаан цооногт 442.6 метр өрөмдлөг хийгээд байгаа аж.

"MU2613A" цооногийн 72.3 метрийн гүнээс эхлэн 7 метрийн интервалд хагас массив болон массив сульфид ажиглагдсан бөгөөд зэс агуулдаг борнит, халькопирит эрдэс байгааг ч мөн тодотгожээ. Гэхдээ тухайн интервал дахь зэс, алт болон бусад металлын агуулга лабораторийн шинжилгээгээр хараахан баталгаажаагүй байна.

Шинээр огтолсон сульфидын бүс нь өмнө тогтоосон эрдэсжилтийн цэгээс хойд зүгт 70-аас 80 метрийн зайд байрладаг. Тиймээс уг үр дүн зэсийн эрдэсжилт өмнө судалсан талбайгаас цааш үргэлжлэх боломжийг шалгах үндэслэл болж байгаа ч хэмжээ, агуулга болон үргэлжлэлийг тогтооход нэмэлт өрөмдлөг, лабораторийн шинжилгээ шаардлагатай аж.

Өрөмдлөгийн дээжийн шинжилгээний хариу ойролцоогоор 4-өөс 5 долоо хоногийн дараа гарах юм.

Үүний зэрэгцээ цооногийн цахилгаан соронзон буюу DHEM судалгаагаар A, B, C гэсэн гурван цахилгаан дамжуулагч биет тогтоожээ. Тэдгээрээс ойролцоогоор 1,000 сименсийн дамжуулалттай B бүсийг компани дараагийн өрөмдлөгийн нэн тэргүүний зорилт болгосон байна.

Зэсийн эрдэсжилт газрын гүн болон суналтын дагуу үргэлжилж байгаа эсэхийг шалгахын тулд “Azzuro Resources” илүү гүн өрөмдөх хүчин чадалтай хоёр дахь төхөөрөмжийг талбайд ажиллуулж эхэлжээ.

Тус компани өнгөц хэсгийн алтны эрдэсжилтийг үргэлжлүүлэн шинжлэхээр 1,200 метр өрөмдлөг хийхээр төлөвлөсөн байна. Мөн “Red Hill” төслийн металлургийн туршилтыг энэ оны дөрөвдүгээр улирлын эхээр дуусгахаар төлөвлөжээ. Харин “Oval” буюу Ямбат зэс-никелийн төсөлд газрын гадаргын 3D IP судалгааг аравдугаар сард дуусгахаар ажиллаж байна.