Нэгдүгээр эмнэлэг: Бөөр, түрүү булчирхайн мэс засалд робот "дайчилна"

Улсын Нэгдүгээр төв эмнэлэг мэс заслын үйлчилгээндээ технологийн шинэчлэл хийж, “Revo-I” робот мэс заслын системийг албан ёсоор ашиглалтад орууллаа. Ингэснээр робот технологид суурилсан мэс заслын үйлчилгээ Монголын эрүүл мэндийн салбарт дахин нэг байгууллагаар тэлжээ.

Шинэ системийг эхний ээлжид Урологи-Андрологийн төвд ашиглаж, түрүү булчирхай, бөөр зэрэг эрхтний мэс засалд түлхүү нэвтрүүлэхээр төлөвлөж байна. “Revo-I” нь мэс заслыг бие даан гүйцэтгэдэг автомат төхөөрөмж биш, харин эмчийн бүрэн удирдлагаар ажилладаг робот систем юм. Мэс заслын эмч төхөөрөмжийг удирдахад гарын хөдөлгөөн робот гарт бодит цагт дамжиж, хүний гараар шууд хийхэд хүндрэлтэй нарийн хөдөлгөөнийг тогтвортой гүйцэтгэх боломж бүрддэг.

Технологийн тусламжтайгаар эмч эд, эрхтнийг илүү нарийн ялган харахаас гадна оёдол тавих, хайчлах, тайрах болон эдийг салгах зэрэг мэс заслын үндсэн үйлдлийг өндөр нарийвчлалтай гүйцэтгэх боломжтой.

Робот мэс заслын системүүд мэс заслын талбайг томруулсан, өндөр нягтралтай гурван хэмжээст дүрслэлээр харуулж, эмчийн хөдөлгөөний уян хатан байдал, хяналтыг нэмэгдүүлдэг. Ингэснээр хүрэхэд төвөгтэй байрлалд байгаа эд, судас болон мэдрэлийн ойролцоо нарийн ажилбар хийх боломж өргөждөг байна. “Revo-I” системийг олон улсад урологи, ерөнхий мэс засал, эмэгтэйчүүд, чих, хамар, хоолойн мэс заслын чиглэлээр ашиглаж байна.

Үйлдвэрлэгч “Meerecompany” өнгөрсөн долоодугаар сард “Revo-I” системийг Улсын нэгдүгээр төв эмнэлэгт нийлүүлж дуусчээ. Энэ нь тус компанийн Монголд нийлүүлсэн хоёр дахь робот мэс заслын систем юм.