‘Нью Прогресс Групп’ BARILGA EXPO дээр түүхий эдээс эцсийн бүтээгдэхүүн хүртэлх үйлдвэрлэлийн гинжин стратегиа танилцуулав

BARILGA EXPO олон улсын үзэсгэлэн, яармагийн үеэр “Нью Прогресс Групп” барилгын материалын түүхий эдээс эцсийн бүтээгдэхүүн хүртэлх үйлдвэрлэлийн гинжин стратегиа олон нийтэд танилцууллаа. Монгол Улсад барилгын салбар үүсэж хөгжсөний 100 жилийн ой тохиож буй энэ жил тус групп Монголд үйлдвэрлэлийн цогц тогтолцоо бүрдүүлэх зорилт тавьснаа онцолсон. Үзэсгэлэнгийн талбар дээр цемент, ханын блок, гипсэн хавтан зэрэг бүтээгдэхүүнтэй холбоотой төслүүдийн явц, хүчин чадлыг нэг дор дэлгэжээ.

Танилцуулгын гол хэсэгт “Ховд Эко Цемент” үйлдвэр багтсан байна. Тус үйлдвэр орчин үеийн хуурай аргын технологид суурилж, жилд 300,000 тонн портланд цемент үйлдвэрлэх хүчин чадалтай гэж мэдээлсэн. Мөн 2026 оны наймдугаар сараас Оросын Холбооны Улс руу цемент экспортолж эхэлсэн гэдгээ дурдав. “Ховд Эко Цемент” ОХУ-ын зах зээлд гарах эрх авсныг экспортын өрсөлдөх зорилгын эхлэл гэж тодотгосон юм.

Үйлдвэр ашиглалтад орсноор Ховд болон баруун бүсийн цементийн хэрэгцээг орон нутагтаа үйлдвэрлэн хангах боломж бүрдсэн гэж компанийн зүгээс тайлбарлав. Ингэснээр тээвэр, ложистикийн зардал буурах, нийлүүлэлтийн тогтвортой байдал нэмэгдэх нөлөөтэй гэж онцоллоо. “Ховд Эко Цемент” үйлдвэрийн Маркетинг, борлуулалтын хэлтсийн дарга М.Хонгор “ОХУ-аас тавьсан өндөр чанарын шаардлагыг бүрэн хангасан” гэж мэдэгдсэн нь экспортын сувагт чанарын шалгуур хэр өндөр тавигддагийг давхар сануулж байна.

Үйлдвэрлэлээ эрчим хүчний шийдэлтэй уялдуулж буйгаа тус групп мөн танилцуулсан. “Ховд Эко Цемент” үйлдвэрийн дэргэд 8 МВт хүчин чадалтай “Ховд Эко НЦС” төслийг хэрэгжүүлж байгаа бөгөөд цементийн үйлдвэр жилд ойролцоогоор 18,000 МВт.цаг цахилгаан хэрэглэдэг, үүний 13,000 МВт.цагийг нарны эрчим хүчээр хангах боломжтой гэсэн тооцоололтой гэв. Ийм зохион байгуулалт нь үйлдвэрлэлийн тасралтгүй ажиллагаа, өртгийн тогтвортой байдалд чиглэсэн шийдэл болохыг салбарынхан ярьж байна.

Бүтээгдэхүүний төрлөө өргөтгөх хүрээнд “Ховд Эко Блок” үйлдвэр CLC технологид суурилж, жилд 30,000 м³ хүртэл дүүргэлтийн ханын блок үйлдвэрлэх хүчин чадалтай гэж мэдээлжээ. Харин охин компани “Эко Драйволл” ХХК-ийн “ALPHA” эко гипсэн хавтангийн үйлдвэр 2026 оны 5 дугаар сарын 24-нд албан ёсоор нээлтээ хийсэн байна. “ALPHA” үйлдвэр жилд 10 сая м² буюу 3.5 сая ширхэг гипсэн хавтан үйлдвэрлэж, дотоодын хэрэгцээг 100% хангах түвшинд хүрэхээр танилцуулсан бөгөөд 9.5 мм болон 12.5 мм-ийн үндсэн бүтээгдэхүүнээс гадна ус, чийгт болон галд тэсвэртэй төрлийг нэмэгдүүлэх зорилт тавьжээ.

Чанар, стандартын хэсэг энэ удаад тодорхой баримтаар дэмжигдсэн. Тус лаборатори гипсэн хавтан дээр 25-30 төрлийн үзүүлэлт шинжилж, түүхий эдийн хяналт, туршилт, баталгаажуулалтын шинжилгээг хийдэг гэж мэдээлсэн бөгөөд Лабораторын эрхлэгч О.Оргил-Эрдэнэ “Манай гипсэн хавтан нь дотоодын гөлтгөнө чулууг ашигладаг” гэв. Мөн 2025 онд “ALPHA” эко гипсэн хавтангийн стандартыг MNS EN 520:2025 болгон Монголын үндэсний стандарт болгосон гэж дурдсан нь дотоод үйлдвэрлэлийн суурь дэд бүтцэд стандартчилал ямар үүрэгтэйг харуулж байна.

Эдгээр төслийг нэгтгэн харвал импорт орлох, экспорт нэмэх, нийлүүлэлтийн тогтвортой байдлыг сайжруулах зорилго нэг шугамд харагдаж байна. Нью прогресс группийн Дэд Ерөнхийлөгч Д.Базаргүрүү “Монгол Улс өмнө нь хэрэглэгч байсан бол одоо бүтээгч ард түмэн болох ёстой” хэмээгээд, “Дараагийн 100 жилд Монгол Улс зөвхөн барилга барьдаг бус, барилгад шаардлагатай материалыг өөрсдөө үйлдвэрлэдэг байх шаардлагатай” гэж онцолсон. МНБМ ХХК-ийн Гүйцэтгэх захирал Г.Боролзой ч “Импортыг орлох бараа бүтээгдэхүүнийг Монголдоо үйлдвэрлэх нь үндсэн зорилго” гэж тайлбарласан нь үзэсгэлэн дээрх байр суурийг нэг өгүүлбэрээр зангидав.