АНУ-ын Орегон муж ChatGPT хүүхдийн аюулгүй байдлыг хангахгүй байна хэмээн OpenAI-г 2 тэрбум гаруй ам.доллараар шүүхэд өгчээ
Орегон мужийн Ерөнхий прокурор Дэн Рэйфилд OpenAI нь ChatGPT-г хүүхдэд аюулгүй гэж олон нийтийг төөрөгдүүлж, хэрэглэгчийн эрхийн хуулийг зөрчсөн гэж үзэн дор хаяж 2.035 тэрбум ам.долларын хохирол нэхэмжилсэн нэхэмжлэл гаргалаа.

АНУ-ын Орегон мужийн Ерөнхий прокурор Дэн Рэйфилд 11-р сарын 17-нд OpenAI-г Малтнома тойргийн шүүхэд өгч, компани ChatGPT чатботыг хүүхдэд аюулгүй гэж олон нийт, эцэг эхчүүдийг төөрөгдүүлсэн гэж буруутгалаа. Нэхэмжлэлд дор хаяж 2.035 тэрбум ам.долларын хохирол нэхэмжилсэн бөгөөд энэ нь торгууль бус, шүүх хурлаар нотлогдох хохирлын доод хэмжээ юм.
Нэхэмжлэлийн гол үндэслэл
Мужийн Хууль зүйн газрын мэдэгдлээр OpenAI нь Орегоны хэрэглэгчийг хамгаалах Шударга бус худалдааны үйл ажиллагааны тухай хуулийг дараах байдлаар зөрчсөн гэж үзэж байна. Үүнд:
- ChatGPT хүүхдэд хэр аюулгүй талаар олон нийтийг төөрөгдүүлсэн;
- ноцтой аюулгүй байдлын асуудлыг ил болгоогүй бүтээгдэхүүн борлуулсан;
- хүүхэд, өсвөр насныханд чиглэсэн шударга бус маркетингийн арга хэрэглэсэн.
Түүнчлэн нэхэмжлэлд компанийг хайхрамжгүй хандсан, Орегоны иргэдийн зардлаар үндэслэлгүй ашиг олсон, олон нийтэд саад учруулах нөхцөл (public nuisance) үүсгэсэн гэж буруутгажээ. Муж улс шүүхээс OpenAI-д төөрөгдүүлэхээ зогсоож, үр дүнтэй хамгаалалтын арга хэмжээ авахыг даалгахыг хүссэн байна.
OPB-ийн мэдээлснээр 53 хуудас нэхэмжлэлд OpenAI 13-аас дээш насны хүүхдэд эцэг эх, асран хамгаалагчийн зөвшөөрөлтэйгөөр ашиглахыг зөвшөөрдөг ч зөвшөөрөл авсан эсэхийг ихэнхдээ шалгадаггүй гэж дурджээ. Мөн саяхан гаргасан “ChatGPT for Teens” хувилбарын хамгаалалтыг амархан тойрч болдог бөгөөд хүүхэд амиа хорлох, өөрийгөө гэмтээх, хооллолтын эмгэг зэрэг сэдвээр асуухад эцэг эхэд мэдэгдэл өгдөггүй гэж мужийн Хууль зүйн газар үзжээ.
Талуудын байр суурь
“OpenAI ChatGPT хүүхдэд хор хөнөөл учруулж байгааг мэдсээр байж аюултай платформоо бодитоор засаагүй” гэж Рэйфилд мэдэгдэлдээ дурджээ. Тэрээр Орегонд гарсан тодорхой нэг хэрэг шүүхэд хандах шалтгаан болоогүй, харин улс даяар гарсан тохиолдлууд болон технологийн хөгжил хэрэглэгчийн хамгааллаас түрүүлж буйд санаа зовсноор нэхэмжлэл гаргасан гэж OPB-д ярьжээ.
OPB-ийн мэдээлснээр OpenAI-ийн төлөөлөгч Дрю Пусатери компани зөвхөн нэг компанид бус, хиймэл оюуны салбарт бүхэлд нь хамаарах бодлого боловсруулахыг дэмжиж буйгаа илэрхийлжээ. Компани өмнө нь мэргэжилтнүүдтэй хамтран эцэг эхийн хяналт, завсарлага сануулах, насанд тохирсон загварын хамгаалалт зэрэг нэмэлт арга хэмжээ авсаар байгаа гэж мэдэгдэж байсан. Үүнээс гадна 10-р сард АНУ-ын найман муж OpenAI-г өсвөр насныханд үзүүлж буй нөлөөний улмаас шүүхэд өгсөн юм.
Уг нэхэмжлэл нь Орегоны Хууль зүйн газрын шинээр эхлүүлсэн “Keeping Kids Safe” санаачилгын нэг хэсэг бөгөөд тус санаачилгад Meta-тай байгуулсан 125 сая ам.долларын эвлэрэл, Discord-ын эсрэг мөрдөн шалгалт зэрэг багтаж байна.
Эх сурвалж: Орегон мужийн Хууль зүйн газар, OPB, Нэхэмжлэл (PDF)
Шинэ мэдээг цахим шуудангаар авах бол бүртгүүлнэ үү.
Холбоотой мэдээ




