Пуужин хөөрөх мөчөөс ашиг хүртэх Хятадын шинэ бизнесүүд цар хүрээгээ тэлж байна

Хятадын сансрын хөтөлбөр эрчимжихийн хэрээр пуужин хөөргөх үйл явц зөвхөн шинжлэх ухаан, технологийн салбарын үйл явдал байхаа больж, аялал жуулчлал, үзвэр үйлчилгээ, жижиг бизнесийн шинэ зах зээл болон өргөжиж байна.

Наймдугаар сарын бүгчим нэгэн орой Хайнань арлын Вэньчан сансрын хөөргөх төвийн ойролцоох эрэгт олон мянган хүн цуглаж, "Long March 7A" пуужингийн хөөрөлтийг үзжээ.

Оройн 20:00 цаг өнгөрсний дараа хөөрсөн нисгэгчгүй пуужин удалгүй агаарт дэлбэрсэн бөгөөд Хятадын төрийн хэвлэлүүд ослыг хэдэн цагийн дараа баталгаажуулсан байна. Гэвч эрэг дээрээс хөөрөлтийг ажиглаж байсан хүмүүсийн олонх тухайн мөчид юу болсныг ойлгоогүй ба тэнгэрт үүссэн галт үзэгдлийг харан уухайлж байжээ.

Энэ дүр зураг Хятадын сансрын салбарт гарч буй өөр нэг өөрчлөлтийг харуулж байна. Урьд өмнө алслагдсан цөлийн бүсэд өндөр нууцлалтай явагддаг байсан пуужингийн хөөргөлтүүд өдгөө олон нийтэд нээлттэй болж, жуулчдын сонирхлыг татах болжээ.

Пуужин хөөргөхийг үзэх нь аяллын нэг хэсэг болов

Хөөрөлтийг үзэхээр ирсэн хүмүүсийн нэг нь Гуандун мужаас аялж ирсэн 38 настай Фү Жиньхуа байв. Тэрбээр бүр Янзай нэртэй тэжээвэр тоть шувуугаа дагуулан иржээ. Фүгийн төсөөлж буйгаар ойрын 10-20 жилийн дотор сансарт аялах нь чинээлэг цөөн хүний боломж бус, энгийн иргэдийн хувьд хурдны галт тэрэг эсвэл онгоцоор зорчихтой адил үйлчилгээ болж магадгүй ажээ.

Өмнөх үеийнхэн маань далайн салхинд сууж, өөрийн улсын пуужин хөөрөхийг харна гэж төсөөлөх ч үгүй байсан байх. БНХАУ-ын Гуандун мужаас аялж ирсэн 38 настай Фү Жиньхуа Тэрбээр цаашлаад Хятадаас өөрийн Илон Маск төрөн гарч, Ангараг гараг руу аялах боломж ч бий болно гэж үзэж байна.

Хятад анх 1960 онд анхны пуужингаа хөөргөснөөс хойш сансрын хөтөлбөрөө хурдацтай хөгжүүлжээ. Тус улс 2003 онд анхны сансрын нисэгчээ хөөргөж, 2008 онд анхны задгай сансрын алхалтаа хийсэн бол 2022 он гэхэд өөрийн сансрын станцыг байгуулж дуусгасан. Мөн сарны цаад талд анх удаа аппарат буулгаж, тэндээс дээж авчирсан улс болсон юм. Одоо Хятад улс 2030 он гэхэд саран дээр хүн буулгаж, цаашид Ангараг гараг руу хүнтэй нислэг хийх зорилт тавиад байна.

"Ангараг"-ийн орчин жижиг бизнесийн зах зээл болжээ

Сансрын сэдэвтэй хэрэглээ зөвхөн пуужин хөөргөх талбайгаар хязгаарлагдахгүй байна.

Тухайлбал, Өвөр Монголын Өөртөө Засах Орны Улаанхада галт уулын геологийн паркийн хар өнгийн галт уулын чулуулаг Ангараг гарагийн гадаргуутай төстэй байдгаараа жуулчдын анхаарлыг татах болжээ. Энд ирсэн хүмүүс цагаан, ягаан өнгийн сансрын нисэгчийн хувцас түрээслэн зураг авахуулдаг бол худалдаачид сансрын нисэгчийн хэлбэртэй, гүзээлзгэнийн амттай зайрмаг хүртэл худалдаалдаг.

50 настай Түмүсэ 2022 онд оюутнууд сансрын хувцастайгаа галт уулын дэргэд зургаа авахуулсан зураг цахим орчинд эрчимтэй тархсаны дараа хувцас түрээсийн бизнесээ эхлүүлжээ.

Тэрбээр урьд өмнө нэг иж бүрдэл сансрын хувцсыг 80-100 юань буюу 11.90-14.85 ам.доллароор түрээслүүлдэг байсан бол ижил үйлчилгээ үзүүлэгчдийн тоо нэмэгдсэнээр үнэ нь 20 юань хүртэл буурсан байна.

Энэ хандлага нь сошиал орчинд түгсэн нэг тренд богино хугацаанд шинэ үйлчилгээний эрэлт бий болгож, улмаар өрсөлдөөн нэмэгдэхийн хэрээр хэрэглэгчдэд хүрэх үнэ хэрхэн буурч болдгийн нэг жишээ болж байна.

Сансрын сэдэв урлаг, тоглоомын зах зээлд нэвтэрч байна

Бээжинд ч сансар огторгуйн сэдэв хэрэглээний соёлтой улам нягт холбогджээ.

Сүнжуан урлагийн дүүрэгт дизайнер, шинжлэх ухааны уран зөгнөлт зохиолч Ян Ваньтиний бүтээсэн унтаж буй эмэгтэй сансрын нисэгчийн аварга баримал хүмүүсийн зураг авахуулах дуртай газруудын нэг болсон байна.

33 настай Ян сансар огторгуйтай холбоотой хамгийн тод дурсамжаа 2003 онтой холбон ярьжээ. Тухайн үед Ян Ливэй Хятадын анхны сансрын нисэгч болохыг тэрээр өвөөтэйгөө хамт телевизээр үзсэн байна.

Харин Бээжингийн баруун хэсгийн хуучин гангийн үйлдвэрийг соёл, амралтын бүс болгон өөрчилсөн Шоуган паркт сансрын сэдэв бүр ч арилжааны шинжтэй болжээ.

Энд Хятадын тоглоом үйлдвэрлэгч "Pop Mart" компанийн сансрын нисэгчийн дуулгатай "Space Molly" дүрийн аварга баримал байрлах бөгөөд жуулчдын зураг авахуулах гол цэгүүдийн нэг болж байна.

Ийнхүү Хятадад сансар огторгуй нь зөвхөн төрийн телевизийн шууд дамжуулалт, шинжлэх ухааны уран зөгнөлт киноноос хардаг алс холын ойлголт байхаа больж байна. Пуужин хөөргөхийг үзэх аяллаас эхлээд хувцас түрээс, зайрмаг, нийтийн урлаг, цуглуулгын тоглоом хүртэл сансрын сэдэв хэрэглэгчдийн зарцуулалт бий болгох шинэ бүтээгдэхүүн, үйлчилгээний зах зээл болон хувирч эхэлжээ.

Хятадын сансрын амбиц нэмэгдэхийн хэрээр энэ зах зээл цаашид аялал жуулчлал, энтертайнмент болон жижиглэн худалдааны салбарт илүү том эдийн засгийн боломж бий болгох эсэх нь анхаарал татаж байна.