“Солонго 1, 2” төслийн сонгон шалгаруулалт ирэх сарын 10-наас эхэлнэ

Түрээслээд өмчлөх нөхцөлтэй “Солонго 1, 2” орон сууцны төслийн сонгон шалгаруулалт сонгон шалгаруулалт аравдугаар сарын 10-наас эхэлж, 14 хоног үргэлжилнэ. Иргэд материалаа цахимаар илгээх бөгөөд систем хүсэлтүүдийг 100 онооны шалгуураар үнэлж, эрэмбэлэхээр зохицуулсан байна.

Өөрөөр хэлбэл, сонгон шалгаруулалтыг цахимаар хийх тул хүний шууд оролцоогүйгээр хүсэлт гаргагчдыг шалгуурын дагуу харьцуулж үзэх юм.

“Солонго 1, 2” нь төр, хувийн хэвшлийн хамтын ажиллагаанд тулгуурласан төсөл бөгөөд нэг ам метр талбайн үнэлгээг 4.428 сая төгрөгөөр тогтоожээ.

Түрээслэгч орон сууцандаа тав хүртэлх жил амьдрах хугацаандаа сарын түрээсээс гадна нэмэлт төлбөр төлж, байрны урьдчилгаагаа хуримтлуулах боломжтой. Орон сууцны нийт үнийн 30 хувьтай тэнцэх урьдчилгааг бүрдүүлсний дараа үлдэгдэл төлбөрөө орон сууцны зээлээр санхүүжүүлэх нөхцөлтэй.

Тухайлбал, 45 ам метр орон сууц 199.26 сая төгрөгийн үнэлгээтэй бол 30 хувийн урьдчилгаа нь 59.78 сая төгрөг болно. Түрээслэгч уг дүнг тав хүртэлх жилийн хугацаанд шат дараатай бүрдүүлнэ.

Түрээсийн хэмжээг орон сууцны нэг ам метр тутамд сарын 11-ээс 15 мянган төгрөг байхаар зохицуулжээ. Ийм тарифаар 42 ам метр орон сууцны сарын түрээс ойролцоогоор 462-оос 630 мянган төгрөгт хэлбэлзэнэ.

Иргэд хүсэлт илгээхдээ хэрэгжиж буй төсөл болон авахыг хүсч буй орон сууцны талбайн хэмжээ, өөрийн хамаарах бүлгийг сонгоод регистрийн дугаар, утасны дугаар, цахим шуудангийн хаяг зэрэг мэдээллээ оруулна.

Түрээслээд өмчлөгч нь гэрээнд заасан төлөлтийн хуваарийн дагуу төлбөрөө 14 болон түүнээс дээш хоног хэтрүүлсэн тохиолдолд хугацаа хэтрүүлсэн хоног тутамд 0.5 хувийн алданги тооцох аж.