"Тэмкагийн маажуурын салон" Хятадад нээгджээ: Хятадад загатнаа маажих үйлчилгээ шинэ бизнес болж байна

Хэдэн жилийн өмнө хошин урлагийн тайзнаа “Тэмкагийн маажуурын салон” гэх нэршил “Сэгсийтэл маажна” гэсэн уриатайгаа алдаршиж, монголчууд бид ийм бизнес үнэхээр нээгдвэл яах бол хэмээн багагүй хошигнож байв. Тэгвэл тухайн үед хошигнол мэт сонсогдож байсан “маажуурын салон” өдгөө Хятадад бодит бизнес болжээ.

Тодруулбал, Хятадын Шэньжэнь хотод хүмүүсийн нуруу болон загатнасан хэсгийг мэргэжлийн аргаар маажиж, тайвшруулах үйлчилгээ шинэ төрлийн бизнес болж байна. 32 настай Жан Сяоцяо “Suma” нэртэй хоёр салбар нээж, нэг цагийн үйлчилгээг 300 юаниар санал болгож байгаа талаар “South China Morning Post” мэдээлжээ. Жан эхний салбараа тавдугаар сард Шэньжэний Баоань дүүрэгт нээсэн бол сарын дараа Фүтиань дүүрэгт хоёр дахь салбараа ажиллуулж эхэлсэн байна. Үйлчилгээний орчин нь массажны газартай төстэй бөгөөд үйлчлүүлэгч доош харан хэвтэж, ажилтнууд тусгайлан хэлбэржүүлсэн урт хумсаар нуруу болон хүссэн хэсгийг нь мааждаг аж. Үүсгэн байгуулагчийн тайлбарласнаар үйлчилгээ нь үйлчлүүлэгчийг тайвшруулах, стрессийг бууруулах, нойрыг сайжруулахад чиглэдэг. Зарим үйлчлүүлэгч уг үйлчилгээг уламжлалт массажаас ч илүү тайвшруулдаг гэж үнэлсэн талаар Жан “South China Morning Post”-д ярьжээ. Бизнесийн эхний үзүүлэлтүүд ч эрэлт байгааг харуулж байна. Хоёр салбар нийлээд сард ойролцоогоор 100 мянган юанийн нийт орлого олж байгаа бөгөөд үйл ажиллагааны зардлаа нөхөх түвшинд хүрч, ашигтай ажиллаж эхэлсэн гэж Жан мэдээлэв. Үйлчлүүлэгчдийн 70 орчим хувийг эрэгтэйчүүд эзэлж байгаа ч эрэгтэй, эмэгтэй аль аль нь уг үйлчилгээг авч байна.

Сошиал медиа бичлэгээс бизнесийн санаа төржээ Жанд бизнесийн санаа өнгөрсөн онд сошиал медиагаар эхнэр нь нөхрийнхөө нурууг маажиж буй богино бичлэг үзсэний дараа төрсөн байна. Бичлэгийн сэтгэгдэл хэсэгт зарим хэрэглэгч ийм үйлчилгээний төлөө мөнгө төлөхөд бэлэн гэж хошигносон нь түүний анхаарлыг татжээ. Мөн уг бичлэг хүүхэд байхад аав нь нурууг нь маажиж унтуулдаг байсан дурсамжийг нь сэргээсэн аж. Тогтсон стандарт, туршлага бүхий салбар байгаагүй тул Жан маажих арга техник болон үйлчлүүлэгчдэд хамгийн тайвшруулах мэдрэмж өгөх хэлбэрийг өөрөө туршиж боловсруулсан гэжээ. Жаны хувьд “Suma” анхны бизнес нь биш. Хубэй мужийн уугуул тэрбээр их сургуулиа төгсөөд нэг жилийн дотор долоон өөр ажил хийж үзсэн бөгөөд 30 нас хүрэхээсээ өмнө хил дамнасан цахим худалдааны хоёр компани байгуулсан ч амжилтад хүрээгүй байна. Үүний дараа сошиал медиа контентын бизнест хүч сорьсон ч мөн төдийлөн өсөөгүй аж. Одоо Жан “Suma”-г Хятад даяар 100 салбартай болгож, хүний биеийг маажиж тайвшруулах үйлчилгээг тусдаа мэргэжил болгон хөгжүүлэх зорилготой байгаагаа илэрхийлжээ. Харин шинэ үйлчилгээ Хятадын сошиал медиад хэрэглэгчдийн байр суурийг хоёр хуваагаад байна. Зарим нь туршиж үзэх сонирхолтой байгаагаа илэрхийлсэн бол нөгөө хэсэг нь нэг цаг нуруугаа маажуулахын тулд 300 юань төлөх хэрэглэгч хэр олон байх вэ гэдэгт эргэлзэж байгаа юм.