Улаанбаатарын шинэ хөгжил: Ногоон байгууламжийг нэмэгдүүлж, эко тээвэрт шилжинэ

Нийслэлийн Засаг дарга Б.Пүрэвдагва Улаанбаатар хотын хөгжлийн бодлогод ногоон хөгжлийг тэргүүлэх чиглэл болгохоо танилцуулах үеэрээ ногоон байгууламж, цахилгаан автомашины дэд бүтэц, эрчим хүчний хэмнэлттэй орон сууц болон гэр хорооллын түлшний шилжилтийг онцоллоо.

Ногоон байгууламжийг нэмэгдүүлнэ

Сүхбаатар дүүргийн 9 болон 10, 11 дүгээр хорооны Ногооннуур орчимд 5.5 га талбайд “ХААН Банк”-тай хамтран цэцэрлэгт хүрээлэн байгуулах аж.

Мөн Баянзүрх дүүргийн 4 дүгээр хороо, хуучнаар Жуковын хөшөөний ард байрлах 6,000 ам метр газрын зөвшөөрлийг зургаадугаар сард цуцалж, тухайн талбайг парк, ногоон байгууламж болгох ажлыг эхлүүлээд байна.

Нийслэлийн зүгээс хүн амын төвлөрөл ихтэй бүсүүдэд нийтийн эзэмшлийн ногоон байгууламжийн хүртээмжийг нэмэгдүүлэх нь иргэдийн амьдрах орчныг сайжруулах нэг чиглэл гэж үзэж байна.

Цахилгаан автомашины 80 цэнэглэгчтэй болно

Тээврийн салбарын түлшний хэрэглээ болон агаарын бохирдлыг бууруулах шийдлийн хүрээнд цахилгаан автомашины дэд бүтцийг өргөжүүлэхээр төлөвлөжээ.

Цахилгаан автомашины цэнэглэх дэд бүтцийн “Ногоон өртөө” төслөөр энэ зун хоёр сарын хугацаанд 14 байршилд 38 цэнэглэгч суурилуулсан бөгөөд энэ онд нийт 80 цэнэглэгчтэй болох зорилт тавьсан байна.

Нийслэлийн тооцоогоор Улаанбаатар дахь цахилгаан автомашины тоо 50 мянгад хүрвэл жилд 300 сая литр шатахууны хэрэглээг орлож, 200 сая ам.долларын зардлыг хэмнэх боломжтой.

Ногоон орон сууц, хийн түлшний шилжилтийг үргэлжлүүлнэ

Орон сууцны салбарт Шархад болон Баянхошуу дэд төвүүдэд эрчим хүч, усны хэрэглээг 20-оос 25 хувиар бууруулах шийдэл бүхий ногоон орон сууцны төслүүдийг хэрэгжүүлжээ.

Төслийн хүрээнд нийтийн эзэмшлийн талбай болон орцны гэрэлтүүлгийн цахилгааныг дээврийн нарны хуримтлуураас эрчим хүчээр хангах шийдэл ашиглаж байгаа бөгөөд цаашид 270 айлын ногоон орон сууц нэмж барихаар төлөвлөсөн байна. Хотын удирдлага уг шийдлийг өрхийн хэрэглээний зардлыг бууруулж, эрчим хүчний үр ашгийг нэмэгдүүлэхэд чиглэж буй гэж тайлбарлав.

Агаарын бохирдлыг бууруулах өөр нэг чиглэлээр Баянгол, Чингэлтэй дүүргийн гэр хорооллын 5,000 өрхийг хийн зууханд шилжүүлжээ. Ирэх жилүүдэд нэмж 10-аас 15 мянган өрхийг хийн түлшинд үе шаттай шилжүүлэхээр төлөвлөж байна.

Түүнчлэн уурын зуухаар дулаанаа хангадаг сургууль, цэцэрлэг, эмнэлгүүдийг хийн халаалтад шилжүүлснээр 130 мянган өрхийн яндангаас гарахтай дүйцэх хэмжээний нүүрсний утааг бууруулах боломжтой гэж нийслэл тооцоолжээ.

Хотын удирдлага парк, цахилгаан автомашины цэнэглэх сүлжээ, ногоон орон сууц болон хийн түлшний шилжилтийг уялдуулснаар шатахуун, эрчим хүч, нүүрсний хэрэглээг бууруулж, Улаанбаатарын амьдрах орчныг сайжруулах зорилготой байгаагаа онцлов.