Унгарын Засгийн газар ижил хүйст хосын хүүхэд үрчлэхэд тавьсан 2020 оны де-факто хоригийг цуцална

Европын Холбооны гишүүн Унгар улсын Засгийн газар ганц бие хүний үрчлэлтийн хүсэлтийг гэр бүлийн асуудал эрхэлсэн сайдын зөвшөөрлөөр шийддэг зохицуулалтаа өөрчлөхөөр болжээ. Тус улсын Ерөнхий сайд Петер Мажар шийдвэр гаргах эрхийг улс төрийн албан тушаалтнаас салгаж, мэргэжлийн байгууллагад шилжүүлэх нь ЛГБТК хүмүүсийн эрхийн орчныг өөрчлөх чухал алхам болно гэж мэдэгдсэнийг “Reuters” агентлаг мэдээлэв.

Унгарт 2020 оны эцэс хүртэл ижил хүйст хосын нэг нь ганц бие хүний хувиар хүсэлт гаргах замаар хүүхэд үрчлэх боломжтой байв. Харин тухайн үеийн Ерөнхий сайд Виктор Орбаны баруун жигүүрийн “Fidesz” нам хуульд өөрчлөлт оруулж, ганц бие хүний хүсэлтийг гэр бүлийн асуудал эрхэлсэн сайд заавал зөвшөөрдөг болгосон юм.

Ижил хүйст хосын үрчлэлтийг хуулиар шууд хориглоогүй ч сайдын зөвшөөрөл шаарддаг болсон нь бодит нөхцөлд боломжийг нь бараг хаасан буюу “де-факто” хориг болсон гэж хүний эрхийн байгууллагууд үзэж иржээ.

Мажар өөрийн байр сууриа “Үрчлэлтийн талаар улс төрчид бус, мэргэжлийн хүмүүс шийдвэр гаргах ёстой” хэмээн илэрхийлсэн байна.

Петер Мажар дөрөвдүгээр сарын сонгуульд үнэмлэхүй ялалт байгуулж, Виктор Орбаны 16 жилийн засаглалыг эцэслүүлсэн. Үрчлэлтийн журмыг өөрчлөх төлөвлөгөө нь шинэ Засгийн газар өмнөх эрх баригчдын нийгмийн бодлогыг эргэн харж буйн нэг хэсэг болж байна.

Орбан засгийн эрхэнд байхдаа өөрийгөө Өрнөдийн либерал үзлээс “христийн үнэт зүйлс”-ийг хамгаалагч хэмээн тодорхойлж, ЛГБТК хүмүүсийн эрхтэй холбоотой хэд хэдэн хязгаарлалт хэрэгжүүлсэн. Тухайлбал, албан ёсны бичиг баримтад бүртгэлтэй хүйсийг өөрчлөх боломжийг хааж, ижил хүйст хосын хүүхэд үрчлэх боломжийг хязгаарлан, сургуулиудад ижил хүйстэн болон хүйсийн шилжилттэй холбоотой зарим агуулгыг үзүүлэхийг хориглосон юм.

Унгар ижил хүйстний гэрлэлтийг хуулиар зөвшөөрдөггүй ч ижил хүйст хосын иргэний холбоог хүлээн зөвшөөрдөг байна. Тус улсын ЛГБТК бодлого Европын Холбоотой удаан хугацаанд маргаан дагуулсаар ирсэн. Европын Холбооны Шүүх дөрөвдүгээр сард Унгарын ЛГБТК агуулгад хандах боломжийг хязгаарласан зохицуулалт нь Холбооны хууль тогтоомжийг зөрчиж, гей болон транс хүмүүсийг ялгаварлан гадуурхсан хэмээн шийдвэрлэжээ.

Иймээс үрчлэлтийн шинэчлэл нь зөвхөн хүсэлт шийдвэрлэх процедурыг өөрчлөхөөс гадна Унгарын нийгмийн бодлогыг Европын Холбооны эрх зүйн стандарттай ойртуулах шинэ Засгийн газрын чиглэлийн нэг хэсэг болж байна.