Уолл Стрийтийн мягмар гарагийн арилжаанаас юуг анзаарах вэ?

АНУ-ын Засгийн газрын бондын өгөөж сүүлийн хэдэн жилийн дээд түвшинд хүрснээр хөрөнгө оруулагчид хувьцаанаас илүү өндөр өгөөжтэй тогтмол орлогын активыг сонирхох нөхцөл бүрдэж, Уолл Стритйийн арилжаанд болгоомжлол давамгайлж байна.

Тодруулбал, АНУ-ын Засгийн газрын хоёр жилийн хугацаатай бондын өгөөж сүүлийн 28 сарын дээд түвшинд хүрч, мягмар гарагийн арилжаагаар 4.879 хувийн түвшинд хаагджээ. Харин 10 жилийн хугацаатай бондын өгөөж 5.234 хувьд хүрсэн нь 2007 оноос хойших дээд түвшин болов. Мөн 30 жилийн хугацаатай бондын өгөөж өчигдрийн арилжааны үеэр 5.6 хувийг давж, 2002 оноос хойш үзэгдээгүй түвшинд хүрсэн байна.

Технологийн томоохон компаниуд оргил үеэсээ ухарчээ

АНУ-ын Ерөнхийлөгч Дональд Трамп мягмар гарагт хиймэл оюуны асуудлаар салбарын томоохон компанийн удирдлагуудтай уулзсан бөгөөд уулзалтад Илон Маск, Женсен Хуан, Марк Зукерберг болон Сундар Пичай нар оролцжээ.

Технологийн салбарын хэд хэдэн томоохон компанийн хувьцааны ханш өмнөх оргил түвшнээсээ буурсан хэвээр буй. Тухайлбал, сансрын технологийн “SpaceX”-ийн хувьцааны ханш зургадугаар сарын дээд түвшнээс 34 хувиар буурсан бол цахилгаан автомашин үйлдвэрлэгч “Tesla”-гийнх арванхоёрдугаар сарын оргилоос 30 хувиар унасан байна.

Мөн чип үйлдвэрлэгч “Nvidia”-ийн хувьцааны ханш тавдугаар сард тогтоосон дээд түвшнээсээ 4 хувиар буурсан ба компани даваа гарагт хувьцаагаа их хэмжээгээр эргүүлэн худалдаж авах хөтөлбөр зарлажээ. Түүнчлэн “Alphabet”-ийн хувьцааны ханш тавдугаар сарын оргилоос 16.5 хувиар доогуур түвшинд арилжаалагдаж байгаа бол сошиал медиа, технологийн “Meta Platforms”-ийнх хамгийн сүүлийн дээд түвшнээс 5 орчим хувиар буурсан байна. Гэхдээ “Meta”-ийн хувьцааны ханш есдүгээр сар гарсаар нийтдээ 29 хувиар өсчээ.

Банкны хувьцаанууд ч түүхэн дээд түвшнээсээ буурсан байна

CNBC-ийн “Mad Money” нэвтрүүлгийн хөтлөгч Жим Крамер хөрөнгө оруулалтын банкны “Goldman Sachs”-ийг анхаарах компаниудын нэгээр нэрлэсэн байна.

Дэвид Соломон найман жилийн өмнө “Goldman Sachs”-ийн гүйцэтгэх захирлаар ажиллаж эхэлснээс хойш компанийн хувьцааны ханш 300 гаруй хувиар өссөн бөгөөд ногдол ашгийг багтаасан нийт өгөөж 400 орчим хувьд хүрчээ. Гэсэн хэдий ч компанийн хувьцааны ханш зургадугаар сарын 15-ны дээд түвшнээс 20 хувиар буурсан байна.

Үүний зэрэгцээ бусад томоохон банкнаас “Bank of America”, “Citigroup”-ийн хувьцааны ханш оргил түвшнээсээ хоёр оронтой хувиар буурсан бол “JPMorgan”-ийнх 8.6 хувиар сулраад байна.

Хөдөлмөрийн зах зээл, инфляцын дата анхаарлын төвд

Хөрөнгө оруулагчдын анхаарал лхагва гарагт гарах хөдөлмөрийн зах зээл болон инфляцын шинэ мэдээлэлд төвлөрч байна.

ADP-ийн хувийн хэвшлийн ажлын байрны тайлангаар 68,000 ажлын байр шинээр нэмэгдэх төлөвтэй байгааг “Dow Jones”-ийн судалгаанд оролцсон эдийн засагчид тооцоолжээ. Өмнөх сард хувийн хэвшлийн ажлын байр 38,000-аар нэмэгдсэн юм.

Мөн наймдугаар сарын хувийн хэрэглээний зардлын үнийн индекс буюу PCE нийтлэгдэх юм. АНУ-ын Холбооны Нөөцийн банк инфляцын чиг хандлагыг үнэлэхдээ уг үзүүлэлтийг гол хэмжүүрүүдийн нэг болгон ашигладаг. “Dow Jones”-ийн зөвшилцсөн таамгаар PCE индекс сарын өмнөхөөс 0.3 хувь, өмнөх оны мөн үеэс 3.7 хувиар өсөх хүлээлттэй байгаа юм.